SEL'HIC SELET E ARAHAM ¹ Nok hee Yesus emele honi hellame, mong Yudea palik med Yordan mol hoso alay fa, homi name tofang taunu foil o lubung, nok hee biasa ho safoy supi ajar. ² Nok hee Farisi hinu foil olaphok taain puin ari pate, "lotenu soob atain fe honi ho mak nok em aay?" ³ Yesus supi o taain pak abor, "Musa naba parenta fe u ira huk tang?" ⁴ Supi ubang ho, anolote nuso soob atain he e surak satain e panen am fe satain. ⁵ Honi sobo Yesus supi ara mateng ubang ho asel iom mi tetang horo ele, Musa parentah ho hul ien. ⁶ Honi sobo mong aai nang homi Lahtal name nok aten ho den lote den ob. ⁷ Horo ele, lote fe honi ho uil-uil sofo soma atain. ⁸ Nok hee aloho sanok hirnu, horo hee supi ho ealo neneam, honi sobo hir nu. ⁹ Honi fe naba so Lahtal anok nu am, name nok haai asak e. ¹⁰ Nok hee bang ommi ho osakola aybar foil na ho utaain. ¹¹ Horo hee sasupi ara mateng ubang ho, "mang ano haro soob atain he'e fai beng ara nika he'e sa ahal panen so ob araham. ¹² Sobo ob taro so lote atain e foil beng ara nika di sa so ahal panen."

¹³ Name tofang e kabar ara hok Yesus olap hok ho o sakola aybar u hab. ¹⁴ Yesus sakola aybar o hap ho mang maeh horo he e sa ariing, nok he e saubang ho, ekabar ho senolap ma! Supi tahang nene fe'de e il luling ho ekabar honi horo ona. ¹⁵ Mang ano horo il luling med fe so he e, sanok ekabar kaay honi fe. ¹⁶ Nok hee Yesus ekabar afoh satang taahir supiu berkat.

NAME KAFACH YESUS ATAAIN U SAAIN

¹⁷ Yesus sari utarok lame bit honi he e, namenu te eng hok abung ekfafan nok he e atan, "naba honi horo napanenfe na il luling so em ho na med?" ¹⁸ Horo hee Yesus ara mateng ubang ho, "Naba e fe iu bang ho nari ho nok?" Nameden enok nene, selal Lahtal solo. ¹⁹ Iri ho hukung ahol: "Name amine e, ahal panen e, taudur e, ladima labor e, aba kalufe e, adahol med ife iman araham. ²⁰ Horo he e name ho arahuk tang ubang ho, "Guru, naday bouw kaay ta honi he e, barpi ho naalol ataain oham." ²¹ Honin bo, Yesus aforayho edun he e sa om esah nok he e saaramateng ubang ho,"Nanu day okurang, aborsam e okafach ho fail e med name sasah en. ²² Honi bo mateng pak ho puin um anuk susah sapuin, sabor, fede e satanut so kafaich tofang ahol. ²³ Nok he e, Yesus dun safading sefalofe e sa so sakola aybar are mateng ubang ho, "Name kafach il luling soen ho med fe honi ho susabik! ²⁴ Sakola aybar o mateng pak usiud, sobo Yesus foi supi ara mateng ubang ho,"O no aybar, surga lefa fe ho so susabik. ²⁵ Unta nu bating bay lolfa ho mi nok, sobo name kafach sorga lefa fe ho susabik." ²⁶ Sakola aybar mang siud ta, e usara huktang ubang ho anoso mak sorga ho med? ²⁷ Yesus supi edun e ubang ho, "piri name nok tetaraham he e, tom upir honibo Lahtal e araham he e tom o upir aay.

YESUS ATAAIN O UNTU

²⁸ Petrus Yesus ara mateng ubang ho,"Edun, ninaernu ho meng oh e ni ataain!" ²⁹ Yesus ubang ho, "Na ubang abul uara mateng, mateng den e ara day, nameba sobang atain, eme souding lote bar, eme sauding ob bar, eme sofo, eme soma, eme ay, eme but, asel nari e med surak bolang, ³⁰ Ba fed masa ho omi foy nanu med diaay ho, bang e med uding lote, med uding ob, med ofo med ay, med but, e med susa malo, e med sama mong maeh ho, fetang so em. ³¹ Ehonisobo name tofang ba oa aynangmi ui-ui sofek, oba mong o amuij mi sotur.

YESUS VOY SO MIN UBANG

³² Supi selol mid Yerusalem leam, Yesus supi ahoy milame supi apa nok, name ba supi ataain ho baroch, Yesus supi ara sabor osakola aybar pir ernu faling alo ara, naba so mipanekta sa adangtoh ho sa u supi ara mateng, O ³³ mateng,"E dun pi Yerusalem lemid eh, name nok ay ui med iman-iman e, ahli Taurat en, supi hukung sam min med name ba e Yahudi nene araham. ³⁴ Supi uil anok sah-sah, maley o puich beh par, amine, honibo tareng o mitow mi sasahirtoh.

YAKOBUS E YOHANES PEKBANG

³⁵ Honiamfe, Yakobus e Yohanes, Zebedeus o aybar, Yesus olap hok,"Supi ubang ho, Guru niom ho a nanu panen niraham nabafe ni bang." ³⁶ Yesus supi ara mateng ubang ho,"Nabaso iom uma naakala ien?" ³⁷ Supi ara mateng ubang ho, niri ho o anu tub mong atang tani lol mih e nuho mong atang fiing lol mih, mong omura rame om mi. ³⁸ Honisobo, Yesus supi ara mateng ubang ho nabafe ibang, ie ahol nene, imak nok em aay cawan ba nauil na feho isona soeme iri baptis, sobo baptisan ba puin nari baptis horo? ³⁹ Supi ubang ho,"Ni kufak toh! Horo he e Yesus supi ara mateng ubang ho, cawan banana ho ina, baptisan ba puin bari baptis ho puin iri baptis. ⁴⁰ ehoni sobo, mong fiing lol mih med tani lol mih fe ho named iensah, sobo nameba Lahtal utarak horo eleme. ⁴¹ Mang maeh horo he e, sakolah aybar pir ernu Yakobus e Yohanes e ariing. ⁴² Horo he e Yesus supi olofe e ara mateng ubang ho, i ahol supi ba parenta o aneng bo e Yahudi nene ho, o panen o rupa supi semota, mede parenta omate nun kaer aden semo mota lap. ⁴³ Sobo iri ho e honin nene. Honinfe ano so om mate uma fe, iri ho so uil-uil inok kaay lama. ⁴⁴ Nok he e mang ano horo om sanok e otur anok inai ho mi fe he e, uil-uil kaai lam beng ho anai. ⁴⁵ Fe'de e name no ai di hok hobo e esah ukarang bang nene honibo esah ukarang puin hok, e solaman ho med name tofang ereeng.

BARTIMEUS EKFAIL SAH YESUS ANOK BIRANG

⁴⁶ Yesus med osakolah aybar, emed name tofang ara sam Yerikho mi. Yesus e sakolah aybar med name tofang Yerikho mi hel lame bit he e name nababang nu ekfail sah sari ho Bartimeus, Timeus o ay, sekdi tamieh. ⁴⁷ Samaeh he e Yesus Nazaret mi ho am, salofe samateng,"Yesus Daud o ay, nari ukarang!" ⁴⁸ Name tofang ehap ahow por, honi bo samang beat ta, "Daud o ay nari ukarang." ⁴⁹ Yesus aer horo he e, saubang ho,"O lofe e ara mateng ubang ho, om anok dume! ahirtoh sa o lofe." ⁵⁰ Name e fail sah ho toh jubah hing Yesus olap ma. ⁵¹ Yesus ara mateng ubang ho,"Naba fe om uma napanen araham?" Name ek fai sah ho o abor ubang ho,"Rabi nase dun nak ahol." ⁵² Horo he e Yesus ara mateng,"Lame o ndume so anok birang. so sel homi horo hee sa dun nak ahol horo he e sa Yesus ataain selai-lai lol.