¹ Paulu, apostulu di klistu Jisu, plô vôntê di Desu, da inen santu di Desu ni Efésiu i ku sa fieli ni Klisto Jisu. ² Glasa a nansê, i pagi ku ka bi di Desu Pé non i di Sumu Jisu Klistu. ³ Ku Desu i pé di Sumu Jisu Klistu non seja lovadu ku bensua non ku tudu benson splitual ni luguê selestial ni Klistu. ⁴ Antigi di kliason di mundu, Desu koiê non ni Klistu pla non sa santu i sê klupa ni wê dê. ⁵ Desu pledistina non pla adoson mon mina, plô ômê di Jisu Klistu, konformi bondaji di vontê dê. ⁶ Aduason non lezuta ni lôvô di glasa glasioza dê, ku ê livlimente dá non ni amadu. ⁷ Ni Jisu Klistu, non tê lêndenson plôvia sangui dê, i pedon di pekadu, konforme likeza di glasa dê. ⁸ Ê delamá uwa data glasa dê ni liba non ni tudu sêbê ku têndimentu. ⁹ Desu fé ku non konse plopózitu kondidu di vontê dê, konxitxidu ku ê tava gôgôdu, ku sa munsadu ni Klistu, ¹⁰ ku wê ni uwa planu pla plenitudi di tempo, di modu di fé zunta tudu kwa, tantu n´ôsê mô ni téla, ba sa di awua kabêsa, Klistu. ¹¹ Ni Klistu non fô nomiadu êdêlu, i koidu sêdu di acordu ku planu d´iôla ku ka fé tudu kwa plô dezignu di vontê dê. ¹² Desu fê non êdêlu pla non ka poji sa plumê ka tê konfiasa spelansa ni Klistu, di mon non ka pôji sen pla lôvôr i glôia dê. ¹³ Ni Klistu têmbêté ku bô tendê palavla di vêdê, u vangeli di xtlavason nansê, i ku bô kêlê nê, ku bô fô sêladu ku Suplitu Santu ku tava plometidu, ¹⁴ axem ê ka galanti êlansa non, anté ku non ka tê poxi komplétu dê, pla lôvôr i gloia dê. ¹⁵ Plôvia di kwa sê, ginôla kun têndê afé nansê ni Sumu Jisu i sobli amolê nansê plu tudu pôvô santu di Deu, ¹⁶ na ka mundja di dá Desu glasa plôvia nansê i di fla nomi nansê ni lason mun.. ¹⁷ Nga fé lason da Desu di Sumu Jisu Klistu, Sumu non, Pé di gloia, ka da nansê uwa suplitu di sêbê ku levelason di konheximentu dê. ¹⁸ Nga fé lason pla wê di kloson nansê ka sa iluminadu, pla a sêbê kuwa sa konfiansa spelansa pla kuwa xi kwê sama nansê, i inen likeza glolioza di êlansa dê nômê di tudu pôvô santu di Dêsu. ¹⁹ Ni alson mun, nga pigi ku nansê ka pôgi konsê pôdê dê, ku ka posa glangi axi, ku sa ni non ku non kêlê, mon d´ôba di glangi fôsa dê. ²⁰ Isê sa pôdê mê ku Desu opelá ni Klistu ôla, ê ressussita Jisu di motxi i fé Ê tason ni glêtu dê, ni luguê selestial, ²¹ liba montxi muntu di tudu govêno, atolidaji, pôdê, dôminu i tudu nomi ku a ka sama. Klistu na ka bi govêná tan ni tempu sê fa, maji têmbêté ni ixi ku skabi. ²² Desu sujeita tudu kwa ni basu di ôpé di Klistu, i tlêguê glêsa mô kabesa sobli tudu kwa. ²³ Glêsa sa klôpô dê, a plenitudi d´isala ku plênxê tudu ni tudu.