¹ Ka heka rybe Deuxu Tyhyhykỹ riwahinyre Sofonia dee, ibedeu Josia, Amõ riòre Juda iòlò-my raremyhỹ bedeu. Sofonia heka cusi riòre rare, Gedalia rioreriore, Amaria ta tyby labiere kia Ezekia iòlò tahe tyby labie tybyre. ² Deuxu Tyhyhykỹ rarybere: — Ibutumy arahukre aõtyhytyhybo su-my rỹira, ³ kaa wahe iny mahãdu, iròdu iròdu, nawii nawii kia utura utura. Diarỹ arirarytxcynykre ibinabina mahãdu. Arahukre ibutumy iny mahãdu rỹirenyra mahãdu. ⁴ –Arirarytxynykre iny mahãdu Juda su-my rỹimyhỹrenyre kia Jerusalë-my rasỹnymyhỹre dorile. Jerusalë-ribi ariixawidỹỹnykre aõtyhytyhybo rohenymy rỹimyhỹre Bali-my derinana kia ibutumy tõhõti rusarenykre ỹnỹxiwe rybe-di ijohodu rotohodỹỹmy rỹiramyhỹ taỹnyxiwereny dee. ⁵ Ibutumy arahukre su-di raòwònymy rỹimyhỹrenyre, ihetoreny ratyymy, kia ibedeki tahe txuu-my, ahãdu-my, taina-my rerinanymyhỹrenyre. Kia arihulekre aõtxile inyõ wamy rerinanykre, Deuxu Tyhyhykỹ, inatyhymy tuu rarybereri wani-my, ka tuu ararybelekre inatyhymy Moloki ỹnyxiweni-my. ⁶ Arihukre ibutumy waribi rexilòhòrarienyrenyre, kia wawiòhedỹỹna rierenyõhyymyhỹrenyre kia warybe wahidỹỹna rityhynyrenyke aõkõre. ⁷ Txuuhe dehemynymy namyhỹde iu iny tybyhỹkỹreny, Deuxu Tyhyhykỹ taijoireny tasỹreny aõhỹỹmy risỹnyrenykre. Kiaremyta, boholabenyke ibutumy edehemynykre-ò! Tiihe taijoi mahãdu tasỹ mahãdu riwahinykre xiwena wesemy kiata iòludu mahãdureny-ò rarariowykre riwiòhenanymy tuu riwinykremy. ⁸ Deuxu Tyhyhykỹ rarybere: — Kua txuu diarỹ arirarytxynykre aõ dinodu dinodu mahãdureny, iòlò riòre boho kia ibutumy motyhytyhybo iwitxira tyhydỹỹdu aõnaõna riuhemyhỹrenyre. ⁹ Tule arirarytxynykre ibutumy wamy rerinanyrenymy ratximyhỹrenyre iwitxira tyhydỹỹdu wesemy tatyhydỹỹnareny rityhynymyhỹrenyre kia kua mahãdu taỹnyxiwe heto ritỹxinymyhỹrenyre aõnaõna ributunymyhỹrenyre tawasinareny uludumy taaõbinareny uludumy. ¹⁰ — Kua txuu aõnaõna desedese rajua ijõdikre utura mahãdu ijò tyyki, Jerusalë hãwaki. Iny mahãdu rirajuarenykre ixihedỹỹrenymy hãwa tỹmyra bedeki, kia hãwalò hãwalò bedeki roholarenykre aõhỹỹmydỹỹnana rajuana-ò. ¹¹ Mahinybenyleke bobulebenybeke, kai boho tasỹnymyhỹtenyte hãwa ibedeki, kiemy dori ibutumy aõnaõna-di ijohodu mahãdu rururenykre! ¹² –Kua txuu diarỹ atesina arimykre kiata aretehekre Jerusalë hãwa-ò. Arirarytxynykre ibutumy ywimy ratximyhỹrenyre kia ywityhymy ratximyhỹrenyre, kia myỹ rõhõtinymyhỹrenyre mahãdu: “Deuxu Tyhyhykỹ aõ riwinyõhyykre; ròhedỹỹke aõkõ kia ròrarytxydỹỹke aõkõre.” ¹³ Iurenana heka iaõnaõnareny wasinamy reakre, kia ihetoreny tahe rexihurenykre. Tii boho iwitxira riwinyrenykre kia tahe tai rasỹnyrenyõkre; mona besò alòbròna ribrònyrenykre kia tahe tuu riõrenyõhyyrenykre. ¹⁴ Deuxu Tyhyhykỹ txu nihikỹ iòhòmy namyhỹde kia wylemy dehemynymy namyhỹde! Kia heka txu binahãkỹmykre, kia heka sodadu mahãdu teburehekỹmy rỹimyhỹrenyrele brebumy rirajuarenykre. ¹⁵ Kia heka txu kyarana txu-my rỹikre, kia aõhỹỹmydỹỹnana txu-my bede rỹikre, ibinahãkỹmy kia ixihuduna rubuna txu-my rỹikre bedeluruhukỹmy; kia heka biuwetyy bedeluru txumy rỹikre kia iutxietyhymy. ¹⁶ Kia heka txuu ibedeu rỹikre ajuròna rawodỹỹnykre kia sodadu mahãdu rirajuarenykre rawounyrenykremy rihurenykremy hãwa hãwa rayrawomy roireri adobo uhuari-di kia tahe iitxesedureny tò rariehekỹ rỹireri. ¹⁷ Deuxu Tyhyhykỹ rarybere: — Ariwinykre ityrereny aõnaõna binahãkỹ rariowykremy iny mahãdu tyrereny, kia tii boho rariarenyklre tiòtiòle iwese iruebetà mahãdu rariamyhỹrenyre wesele. Kaa inymahãdu heka waòludumy òraruna riwinyrenyre, iurenana heka ihãlubureny rejujurenykre bee rejujumyhỹre wesemy, kia irubureny-di tahe adehu rỹikre iwese rỹnysityby-di adehu rỹimyhỹre wesemy. ¹⁸ Kua txuu mana rỹsỹ òtaòta kia mana rỹsỹtyhyhykỹ rihedỹỹnyke aõkõre Deuxu Tyhyhykỹ kyara. Ikyara deburehekỹ heòty heka rahukre ibutumy hãwa hãwa bede bede. Inyõ rahenyõhyykre, kiemy dori Deuxu rahukre sohoji bedehyylemy ibutumy su-my hãwadu hãwadu mahãdu.