¹ Mohõtinywibeny kia araykyreny bitxuamy, iny mahãdu iixỹruterehekỹ boho, ² komy kai boho madybenykederamy horeru wesemy kia txu sohojidile riõmy reamyhỹre; komy Deuxu Tyhyhykỹ kyara deburehekỹ atyrereny reserenykelau; komy Deuxu Tyhyhykỹ kyara deburehekỹ txu rehemynykederamy. ³ Deuxu dee bòdòòsedenyde ibutumy iny mahãdu iywimy rỹimyhỹrenyre ka hãwahãkỹ ludu, ibutumy tetyhynymyhỹtenyte Deuxu rybe wahidỹỹnana. Aõ òbitimy rỹimyhỹre biwinymyhỹbenyke kia tahe ywihyy atximyhỹbenyke. Aõhewana kawesexiery kai boho mahenybenyke rarytxyna-ribi kia Deuxu Tyhyhykỹ kyarana rỹikreu. ⁴ Gasa hãwa bede syrarohyylemy roikre, kia Askilõ tahe raatymy roikre. Asdode-ki hãwadu mahãdu rateòdỹỹrenykre sohoji txu rimyõdile, kia Ekrõ-ki hãwadu mahãdu tahe radyrenykre iwese breju mahãdu radymyhỹrenyre wesemy. ⁵ Kai boho tahe Filisteu boho, kia mediteerrâneo bero nihikỹ weijàtiki tasỹnymyhỹtenyte! Deuxu Tyhyhykỹ kaa rybe riwahinyre aòludurenymy; “Kanaỹ arihukre isureny; ibutumy tai hãwadu mahãdureny rexihurenykre. ⁶ Ihãwahãkỹreny bero weijàtimy rỹimyhỹre, kia asiykymy rexirahorekre, ibedeki budoeni-di aõmysỹdỹỹdu mahãdu tabreò riderenymy rỹirenyrakre kia uhuari iròdu iròdu uhuarirenymy.” ⁷ Juda bedeki iny mahãdu ruruõrenyre mahãdu kia suu bero weijàtimy rỹimyhỹrenyre-di ratxirenykre. Ibedeki tahe tii boho tairòdureny-di tarukimy roirenyrekre kia Askilõ hetorenyki rõrõrenymy roirenyrekre. Kiemy dori Deuxu Tyhyhykỹ tõhõti reakre tasỹ mahãdu taijoi mahãdurenytxi kia tahe ixybyle ixidee rimyrenykre. ⁸ Deuxu Tyhyhykỹ, ibutumy tabedeeryhỹkỹ-di rarybere: — Raholare moabita mahãdu kia amonita mahãdu risinyrenymy rỹimyhỹreny wasỹreny-di waijoireny-di kia tureny rahỹỹhỹỹmyhỹreny. Tii boho rexibònyrenymyhỹreny kia isureny ixideereny rimyrenykremy. ⁹ Kiaremyta diarỹ, Israel Deuxu, wabededỹỹnanamy kia Moabe kia Amõ hãwahãkỹreny rexihurenykre iwese Sodoma kia Komora hãwa weserenymy rexihurenykre. Isureny heka bede syraro wesemy roikre ikiemy; kia bede ledelede-di raõkynymy roikre, kia Saa behãluu sõemy tai ijõdikre tiòtiòlemy. Aõbo wasỹreny waijoireny mahãdureny-ribi rohenyrenykre kia ibutumy riwyrenykre aõtyhytyhybo moabita mahãdu kia amonita mahãdurenymy rỹimyhỹrenyre, kia tahe isureny-di rahãỹnanyrenykre. ¹⁰ Kawesemy heka tii boho rararytxyrenykre. Kiemy dori rexityhytyhynymy ratxirenyre, aõhỹỹhỹỹmy Deuxu Tyhyhykỹ ijoi mahãdu risỹnyrenyre, kia rexibònyrenyre tureny rahãỹnanyrenyremy. ¹¹ Deuxu Tyhyhykỹ rihurenykre bede binahỹỹmy; tii ibutumy iwitxira ỹnyxiwe mahãdu hãwa hãwamy rỹimyhỹrenyre rahukre. Tai tahe ibutumy iny mahãdu, tahãwa tahãwa-wana Deuxu-my rerinanyrenykre. ¹² Etiopia iny mahãdu rexihurenylekre Deuxu Tyhyhykỹ tõnori-di. ¹³ Deuxu tebò riterenyre Assíria òludumy, iraru weribitxi. Tii rihukre kua hãwahãkỹ, kia Ninive hãwa rihukre kia tai hãwadurenyõhyymy ririkre, iwese txibo bederahy bee tai ihoõmy rỹimyhỹre wesemy. ¹⁴ Budoeni mahãdu kia ibutumy iròdu iròdu debure ihãwarenyki rexielehynyrenykre. Maõloolo rururenykre heto heto binahãkỹrenyki kia heto rurerure tyre raòwò òwònyrenykre, kia waarere boho tahe roburenykre ijò ijò-my. Ibutumy heto heto-my òwòru rỹimyhỹre rasihesihekre. ¹⁵ Ibutumy heka tuu rutỹỹnykre Ninive-ki, hãwa rexityhytyhynymy ratximyhỹre rexibònymy tarurutere-di, myỹ: “Iwitxira hãwa hãwa irurutere ihoõmy rỹimyhỹre wawesemy!” Kia tii tahe bedero-my rexirahorekre, tai iròdu iròdu rahãwanyrenykre. Mobo ibire-di rakre kia urile ruberukre kia bede riòtiinykre hãwa ixihuduna-di retehekreu.