¹ Kaa heka Ninive bededỹỹnamy rarybere, kia Deuxu tuu ritòbexidỹỹnyre Naum dee riwahinyre, tii heka Elcos hãwaludu rare. ² Deuxu heka iwitxira ỹnyxiwe òtaòta riraòõhyymyhỹre Deuxu heka ikyanadire kia taòludu mahãdu dee rexiòwynymyhỹre. Deuxu taòludu mahãdu ixiòwydỹỹna ritamyhỹre. Kia rakyaranymyhỹreu tahe rirarytxynymyhỹrenyre. ³ Deuxu Tyhyhykỹ heka ywimy nodu rare, urile tahe iruruterehekỹre, kia iòrarurenydimy ratximyhỹrenyre rirarytxynyhyymyhỹre. Tii rariamy ratximyhỹre yhydebure ykymy kia yhy deburetyhy ykymy; biuwetyyura node heka iwati riukòmyhỹre. ⁴ Deuxu heka berohokỹ rimymy ritxuhunymyhỹre, kia tii ruỹmyhỹre; Deuxu bero mahãdu riturỹdỹỹnymyhỹre. Basã asireny kia carmelo bera ratòò rirubudỹỹnymyhỹre, Libano bede ratòò boho noiròsòreny rirubudỹỹnymyhỹre. ⁵ Hãwalò hãwalò ikoki ramytàtàmyhỹrenyre, kia bede ratòò mahãdu tahe rexitxiwimyhỹrenyre. Tiu tii rexitynynynymyhỹreu, suu kia ibutumy tai hãwadu mahãdu rexihumyhỹrenyre. ⁶ Tiu Deuxu Tyhyhykỹ iky reamy ratximyhỹreu, mobo tahe làmamy rỹike? Mobo tahe riemy rỹikre ikyarana? Kia teburehỹ rejujumyhỹre bero heòty wesemy; ikoki heka mana rabrò rõderõdenymyhỹre. ⁷ Deuxu Tyhyhykỹ heka awire rare. Kia bede isirasiramy rỹimyhỹre bedeu tii tasỹ taijoi rihedỹỹnymyhỹre kiata tarukimy ratximyhỹre iny mahãdu iixiwotena riemyhỹrenyre. ⁸ Kia beòrahakỹ wesemy tii taòludureny rahumyhỹrenyre; tii riteònymyhỹre taòludureny rubu mahãdu ykyreny-ò. ⁹ Aõbo heka kai boho bede teywinytenyteri Deuxu Tyhyhykỹ òludumy? Tii heka ibutuhyylemy arahurenykre. Deuxu òludumy inyõ rexilàmadỹỹnyke aõkõre inatxi ixybymy? ¹⁰ Kia bede ratòò ledelede wesemy, horeru rubu wesemy, kai boho ibutuhyylemy bexihubenykre! ¹¹ Ninive hãwa-ribi hãbu nade ibinabinamy rõhõtinymy, kia aõnaõna ibinamy riywinyre Deuxu Tyhyhykỹ òludumy. ¹² Kiaremyta, Deuxu rarybere Israel iny mahãdu-ò: “Assírio mahãdu rexihurenykre kia riõrenykre, kia iruruterenyre hãre kia sõerenyre hãre. Diarỹ arawahinyrenyre kai boho aõhỹỹmy butỹỹnybenykremy, kia tahe ixyby tuu ariwinyõtyhy. ¹³ Diarỹ araheddỹỹmyrenykre assírio mahãdu deburehekỹ-ribi; diarỹ aratarenykre wetxumy atximyhỹtenyte-ribi”. ¹⁴ Assírio iòlò bededỹỹnanamy Deuxu Tyhyhykỹ rarybere mỹỹ: “Tii iriòrereny ihoõkre, kia kawesemy tahe ini riõkre. Diarỹ arihurenykre iinyxiwereny kia ihetoworenymy rỹimyhỹrenyre iritxoo dỹnyxireny. Kia arituunykre, kiemy dori tii aõkõ awiõhyyre”. ¹⁵ Betehebeny ini. Hãwalò hãwalò-di rubewahidỹỹduõ namyhỹde ijyywiwi-di, ijyy ywimy rỹimy rarekremy. Juda iny mahãdu, abedesanareny aixenareny biwinybenyke kiata Deuxu-ò tuu maubenybenykre tuu kai tarybete mynamy. Ahãwahãkỹreny tiu ixyby iwitxira hãwa mahãdu tamy inorenyõna iny binabina mahãdu; tii boho dori ibutuhyylemy rexihurenyre.