¹ Ajuròna sõe-di burònybenyke Siaõ bede ratòòki, Deuxu bede ratòòki mawodỹỹbenymy birajuabenyke! Brebumy mamytàtàbenyke, Juda iny mahãdu, kia dori rehemynymy rareri Deuxu Tyhyhykỹ txu. ² Kia heka sohoji txu ru-my kia bedeluruhukỹmy rỹikre, sohoji txu-my biurawetyyura turumy rỹikre. Sei mahãdu adeburemy rekoamyhỹrenyre iwese sodadu ruru ninihikỹ rekoamyhỹrenyre wesemy, iwese biuwetyyura luru hãwalò hãwalò rihetynymyhỹre wesemy. Tiu bede txuu tuu rutỹỹnyõhyyre kawesemy juhu bedeu kia tiu tuu rutỹỹnyõtyhy ijõ wyra wyra bedemy. ³ Tii boho ibutumy rirònymyhỹrenyre, heòty wesemy, iwese heòty ratoodỹỹmyhỹre kiata rihumyhỹre. Komy kiditehemynydenykre koki, suu biuluruhuhỹkỹmy roimyhỹre; ka irahudi ditehemynydenydeu tahe, tii bedelyty wesemy relere. Sei mahãdu ibutumy aõnaõna rahurenyre. ⁴ Tii boho heka awaru wesena roire kiata raijaranymyhỹrenyre awaru mahãdu woumy rekoamyhỹrenyre wesemy. ⁵ Rawayrytòmy dòimyhỹdenyde hãwalò hãwalò rariehekỹ-di rawodỹỹnyrenymy iwese ityti heòty rabrò woumy rirahumyhỹre wesemy, iwese heòty bederade ruru riworonymy ramyhỹre wesemy. Kia iwese sodadu sõehekỹ rateòdỹỹmyhỹre wesemy wimynamy aõbinamy rekoarenykremy. ⁶ Tii boho raaõbinanymy roimyhỹrenyre, kiata ibutumy iny mahãdu brebumy ramytàtàmyhỹrenyre, ibutumy iòtireny rỹrenyrenymyhỹre brebumy. ⁷ Tii boho aõbinamy rekoamyhỹrenyre iwese sodadu mahãdu deburehekỹreny wesemy; raijaranymyhỹrenyre, adobo uhuari weti-di raòwònymyhỹrenyre kia tuhyy ikiemy raaõbinanymyhỹrenyre. Ririranymy roimyhỹrenyre ryy òbiti-di ⁸ kia wii ritorutorunyöhyymyhỹrenyre, kia dori iny sohoji sohoji tary mynamyna-di ramyhỹre. Ikiemy takoòhyy ririranymy ròimyhỹrenyre, kia aõ tebònareny-di ribrebunymy ritxuhudỹỹnyrenyke aõkõre. ⁹ Tii boho hãwa hãwa-ò aõbinamy rekoamyhỹrenyre, kia heto heto weti-di raòwònymyhỹrenyre kia heto rurerure-di rirònymyhỹrenyre wasidu mahãdu wesemy. ¹⁰ Kia rexitxuhunyrenymy aõkõ rekoamyhỹrenyre, kiata suu ramytàtàmyhỹrenyre, biuwetyy ramytàtàmyhỹre, txuu kia ahãdu rexilurunymyhỹrenyre, kia taina mahãdu rarỹsỹnymyhỹrenyre-ribi ixawirenyre. ¹¹ Tasodadureny koki, Deuxu Tyhyhykỹ katxiterehekỹmy tarybe riwahinymyhỹrenyre. Exércitu heka inihikỹrenyre, kia isodadureny tahe teburerenyre! Kiahe ibinatyhy rare Deuxu Tyhyhykỹ txu! Mobo tahe riijekre! ¹² Deuxu Tyhyhykỹ rarybere: “Ka tahe wiji wadee bòdòòsebedenykre ibutumy aworeny-wana, benarehebenymy mahinybenymy bobubenymy arubereny bitxiwibenymy. ¹³ Ixideereny texirahetenyte deòsinamy, uritre atyyreny yrayrarenyõmyreny, kiaaworeny tahe aõwaxina tukre.” Deuxu Tyhyhykỹ-ò bòdòòsedenyke iny Deuxureny, kiemy dori tii awihikỹre kia inydee tòedu nihikỹ rare; kia ywimy nodu rare kia sõemy inymy rerinanymyhỹre kia ikiehyy rexihumy ratximyhỹre tarati riwiurònykremy kia rarytxydỹỹmy aõkõ. ¹⁴ Aõhe-wana Deuxu Tyhyhykỹ, iny Deuxureny, tarati riwiurònyre kia tarybe wihikỹ riwahinyre tasỹ taijoideereny, tamyreny riwahinyrenyremy alòbròna redena wihikỹ. Tai tahe kai boho aõwaxina Deuxu dee biteòsinybenykre xiwena rỹsỹna kia mona besò (vinho). ¹⁵ Tambu biwodỹỹnybenyke Siaõ bede ratòò-ki! Tuu marybebenyke sohoji txuu inarehena tyhyna rỹiremy kiata iny mahãdu-di biwisỹbenyke Deuxu rybena heto-ki rexibutunyrenykemy! ¹⁶ Ibutumy iny mahãdu bibutunybenyke kiata tamyreny marybebenye tii boho rexisuhòsuhòrenykemy. Kia ibutumy ydòidenykre, matuari mahãdu senadu mahãdu kia uladu mahãdu kia uladu sõmo huỹtòdu mahãdu dorile. Kia hãwyy-my hãbu-my heridu tỹmyra mahãdu tahetoreny-ribi ydòhònydenymy Deuxu rybena heto-ò ydòidenykremy. ¹⁷ Kai boho Deuxu rybe-di ijohodu boho, Deuxu rybena heto ube-ki Deuxu Tyhyhykỹ dee maaõmysỹdỹỹnybenykre, mahinybenykre bobubenykre kiata kawesemy bexitòenybenykre: “Deuxu, uritre asỹreny aijoireny rarytxydỹỹrenyõmykre! Uritre wamynarỹỹrenyõmy iny witxira mahãdu rurenyki Kia tii boho wadireny risinyrenykelau kia myỹ rỹỹraxirenykre: ‘Titxibo tahe rare aDeuxureny?’ “ ¹⁸ Taita Deuxu Tyhyhykỹ riteòsinyre taaõmy derinana nihikỹ tasudee kiata tasỹ-di taijoi-di rexiwobrunyre. ¹⁹ Kia rirawyònyre: “Ka tahe wiji adee ariwahinykre alòbròna, mona besò (vinho) rỹsỹna adỹỹ; kawesemy tahe kai boho biroxibenykre kiata awityhymy matxibenykre. Tiu ixyby arawahinyrenyötyhy iny witxira mahãdu adireny risinyrenykemy. ²⁰ Irehemy aribireny ariteònyrenykre sei rabrò binahãkỹ ibràra-ribi dirahudenyde kiata bedero tyahãkỹ-txi idireny arehukre. Sei rabrò komy kanakre kia ididehureny Bero Rubuhukỹ-ò rỹirenykre, kia ihewomy ydòidenykre mediterrâneo Bero-txi rejujurenykre. Sei rabrò rubu boho, sõemy rasunyrenykre, kiata sõemy rarònyrenykre. Diarỹ aõnaõna ninihikỹ ariwinykre! ²¹ Beysabenyke bijiu mahãdu, kia uritre breburenyömy, kiemy dori Diarỹ Deuxu Tyhyhykỹ, aõnaõna ninihikỹ rewinyre! ²² Iròdu iròdu bederahy ludu uritre breburenyõmy, kia dori asi rỹrenykre, bederade mahãdu raratynyrenykre, kia sõemy mona besò raty ijõdikre (vinho). ²³ Beysabenyke, Jerusalë-ki hãwadu mahãdu, kiemy dori Diarỹ Deuxu Tyhyhykỹ aDeuxureny, inihikỹmy aõnaõna rewinyre. Diarỹ adeereny rewahinyre biulòra tiweseubo ròamyhỹre mynamy òbitimy, wyra kia noiròsò bedeu sõemy biu ròare, ijõ wyra ixawire wesemy. ²⁴ Maini alòbròna heka awimy rahekre, kia sõemy mona besò raty (vinho) ijõdikre kia sõemy rỹsỹna adỹỹ ijõdikre. ²⁵ Ariwahinykre ibutumy adeereny aõbo aribireny riõrenyre tiubo diarỹ adeereny reteònyre inihikỹmy biuwetyyura sei rabrò, kia sodadeu mahãdu wesemy, kia rihurenyre alòbrònareny. ²⁶ Kai boho arỹsỹnareny ijõdirenykre ihyyta urile irỹsỹreny araõjinyrenykre kiata Deuxu Tyhyhykỹmy aDeuxurenymy berinanybenykre, kia sõemy atyrereny tarybewihikỹ ritxiwire. Kia wasỹreny waijoireny tiu ixyby anarỹỹnamy rekoarenyõtyhy. ²⁷ Kai boho bede bierybenykre kia diarỹ awanareny watxirerimy; bede bierybenykre diarỹ Deuxu Tyhyhykỹ, diarỹ heka aDeuxureny raremy kia ixyby Deuxu witxiraõ ratxiõhyyre. Kia wasỹreny waijoireny tiu ixyby webòhònamy anarỹỹnamy ratxirenyõtyhy.” ²⁸ Deuxu Tyhyhykỹ rarybere tasỹ taijoi dee: “Irahudita diarỹ atyrereny watyytybytyhy ibutumy atyrereny aritxiwikre: Ariòrereny weryry mahãdu kia hirari mahãdu relyyrenykre warybe bededỹỹnanamy; matuari mahãdu rarasinyrenykre, kia weryrybò mahãdu tahe iruereny ruarenykre reteherenymy. ²⁹ Kiata hãwyy mahãdu wetxumy hãbu mahãdu wetxumy rỹimyhỹrenyre dori tyre diarỹ watyytybytyhy aritxiwikrfe kua bede txuu! ³⁰ Ariwinykre ròhònykremy aõnaõna brebuna biuwetyyki kia su-ki: Ijõdikre hãlubu kia heòty kia biuwetyy wàdàsi. ³¹ Txuu rurunykre, kia ahãdu tahe hãlubu wesemy relekre, kia komy edehemynykrekoki bede binabina nihikỹ Deuxu Tyhyhykỹ txu.” ³² Taita ibutumy rexitòenyre mahãdu Deuxu Tyhyhykỹ wiòhedỹỹnamy kia mahãdu rahenyrenykre. Kiemy dori Deuxu Tyhyhykỹ tuu rarybere ibutumy kia rexihurenyõre mahãdu kia Siaõ bede ratòò-ki ratxirenykre, Jerusalë bede-ki. Kua mahãdu Deuxu Tyhyhykỹ ritare kia rahenyrenykre.