¹ Ka heka rybe wahidỹỹna Deuxu Tyhyhykỹ riwahinyre Joeli dee, Petuel riòre. ² Boholabenyke, matuari mahãdu! Juda iny mahãdu boholabenyke! Tuu aõbo rutỹỹnyre aõnaõna binabinahãkỹ Kawesemy , iny txureny bedeu yda iny Hỹỹnareny bedeu? ³ Marybebenyke ariòrereny bohodeereny aõherekibo bede rutỹỹnyremy. kia tii boho teriòrereny-ko relyyrenykremy, kia ka boho raryberenykre tuu tariòreriòrereny bohodeereny myỹ. ⁴ Biuwetyyura dirahude kia ixyby sei mahãdu biuwetyyura dirahudenyde, Kia ibutumy alòbròna sõehekỹ riròrenyre. ⁵ Bexixabenyke axaxa mahãdu mahãdureny! Bexixabenyke kiata mahinybenykre Kai boho mona besò-my (vinho) teòarimy atximyhỹtenyte, Kiaremy mona besò raty rexihurenyra, kia mona besò tỹmyra ihoõkre tuu biõbenykemy. ⁶ Sai rabrò dirahudenyde, kia sodadu nihikỹ wesemy kia teburemy, kiata wahãwa su ribyribydỹỹnyrenyre. Txureny heka Halòehekỹ hãwyy wesena rare Kia txuràdesemy Halòehekỹ-hãwyy txu wesemy. ⁷ Wamona besòreny (vinho) òkyreny rahurenyre kia wabederatyreny rahurenyre òwòru mahãdu tyyreny ritarenyre, kia bederade mahãdu iurahyylemy risỹnyrenyre. ⁸ Mahinybenyke iwese ijadòòma rexityynymyhỹre wesemy tarubu-ò, kia ròbumyhỹre tabirena rahi. ⁹ Deuxu rybe-di ijohodu mahãdu, Deuxu deòdu mahãdu, rahinymyhỹrenyre Deuxu Tyhyhykỹ rybena hetoki kiemy doei ixyby ihoõre xiwenamy rawahike byrena kia mona besò (vinho). ¹⁰ Bede yky rabrò rexihumy ratxirenyreri, suu rubu-ò rahinymyhỹremy ratxireri, kia dori rỹsỹna alòbròna rexihurenyre, kia mona besò òkyreny kia aõòlỹrena boho raruburenyre. ¹¹ Mohõti werywerybenyke, kai boho oworu bedeki taaõmysỹdỹỹnymyhỹtenyte; mahinybenyke kai boho mona besò òyky-di tarukimy atximyhỹtenyte; kia dori maini ihoõre kia ajiura node ijõdike aõkõre. Ibutumy alòbròna mahãdu rexihurenyre. ¹² Mona besò òyky kia bederaty boo raruburenyre; kia rarubumy rỹirenyreri roma bederaty boho, horeni mahãdu, maçã mahãdu kia ibutumy ijõ mahãdu bederade iratydimy rỹimyhỹre mahãdu! Iny mahãdu ibutumy bede riryrymy rỹirenyreri. ¹³ Deuxu rybe-di ijohodu mahãdu, kai boho tewahinymyhỹtenyte xiwena dena tyre-ò, bexityynybenyke tyy yxeyxereny-di kiata mahinybenykre. Deuxu deòdu mahãdu, bòdòidenyke Deuxu rybena heto ube-ò kiata ruu iyhyõmy mahinybenykre. Kiemy dori iny Deuxureny hetoki ixyby rỹsỹnaõ rỹiõhyyreri kia mona besò rỹike aõkõ. ¹⁴ Deuxu rybena hetoki rybe ibutumy rỹikemy marybeke kiata sohoji txu-my inarehe rỹikremy marybekre. Bibutunyke wedu ninihikỹ mahãdu kia ibutumy juda iny mahãdureny Deuxu rybena heto-ki, iny Deuxureny. ¹⁵ Aõhere taheka! Rehemynymy rareri Deuxu Tyhyhykỹ txu, kia heka Irurutere Nihikỹ bede ixihiduna kidiwykre. Kia aõhe-wana sohoji txuuhyyle bede binahãkỹ relekre! ¹⁶ Iny boho aõ riwinyrenyõhyyrenyreri, iny boho robirenyre iny alòbrònareny rexihuremy. Iny Deuxureny rybena hetoki bedesana ihoõhyyre kia ixena ijõdike aõkõre. ¹⁷ Bede yky irubumy rỹimyhỹre alòbrònaty ruhunyõhyymyhỹre; kia maini raheke aõkõre, kia alòbròna aõwi hynareny rejujumy rỹireri rayreyremy. ¹⁸ Iròdu robumy rỹireri ramadesemy, broreni mahãdu rõhõti werywerymy rariamy rỹireri tiweribi weribi-my, kiemy dori asi ihoõreki. Budoeni boho tule rururenylereri. ¹⁹ Diarỹ adee raryreri rahinyreri, Deuxu Tyhyhykỹ! Bederade mahãdu kia asi mahãdu rarubumy rỹirenyreri, iwese heòtyõ riworonymyhỹre wese ibutumy. ²⁰ Kia iròdu iròdu mahãdu deburereny dori adee rexitòenyrenyreri ixihedỹỹmy, kiemy dori bero mahãdu ruỹrenyra, kia ibutu bede bedemy bede rubu asi rahurenyre.