¹ Kiaremyta bilidike aseriòre boho-ò israelita mahãdu, Deuxu ijoi ni mahãdu kia Deuxu tureny rerinanymyhỹre. ² Deuxu Tyhyhykỹ rarybere iny mahãdu dee:— Adimy aõnaõmy marybeke, iòludumy marybeke, kiemy dori tii wahãwyy aõkõ-my rare ixyby, diarỹ ihãbu-my aõkõre. Tamy marybebekenyke hãbu-my ijara-ribi ixawikemy kiata ibirenareny biteònybenyke. ³ Kia tii tuu riwinyõkre-my, diarỹ ityy ibutumy iribi aritakre kiata tade-my ratxikre iwese uladu-my ruare wesemy. Diarỹ tamy ariwinykre bedero tyahãkỹ rỹimyhỹre wesemy relekre, suu irubu-my itere-my roimyhỹre wese, kia tahe tii bemomohure-my rurukre. ⁴ Kia iriòrereny-di arexibrunyõtyhy, kiemy dori wedena riòre boho roire. ⁵ Tii wedenalemy rarekre-my rexiwahinyre kiata ixỹru ibutumy iribi ixawiremy rexideòsinyremy iu rarybere: “wabirena mahãdu karikorykre, kiemy dokuri tiki boho wadeke riwahinyrenykre rỹsỹna, mona, tyky budoenisityky, kia anokòlỹre kia mona besò”. ⁶ –Kiaremy iwerura-ò aritidikre bedelelede kiata ryy-ò adobo weti ariwimykre, tii ry-txi reaõkremy. ⁷ Tii tabirena mahãdu hewo-my reake, kia tahe rimyrenyõhyykre; rakre iitxeserenymy kiata itxireny reaõhyykre. Taita rarybekre: “wahãbu-kò krakokesekre kiemy dokuri tiki-wana raremyhỹku arityhytyhy-my raremyhỹ”. ⁸ Tii rieryöhyyre kia diarỹ heka tamy mainodeni rewahinyre, mona besò, aõòlỹre; diarỹ heka tamy sõemy aõnaõna mana rỹsỹtyhy, mana rỹsỹ òtaòta, kiale tahe Bali (Baal): ynyxiwe-ò idi raxiwere. ⁹ Kiaremyta, aõwiredena-ò bede rehemynykreu, diarỹ ariwykre kaa hãwyy-ribi wamaixõmoni wamona besò kia iribi budoenisityy kia tyyesilytyhykỹ idi rexityynykremy tamy rewahinyre. ¹⁰ Ka tahe wiji tadetyhymy arisỹnykre iribirena mahãdurureny-ò, kia inyõ ritaõhyykre wabedeery debowo-ribi. ¹¹ Ibedesa ibutumy iribi arihukre: kia ixyby ihoõkre ixenana wyra-di rỹimyhỹre kia ixenana ahãdu-di rỹimyhỹre kia ixenana rỹimyhỹre sabaduu tule ixawikre kia aõtxile iwitxira ixenana. ¹² Diarỹ arihukre imona besò (uva) alòbrònana kia iaõbrònana kia tii riki rarybere taòwydỹỹnamy tabirena mahãdu-ribi rimyremy. Bijiutyhyle tuu rỹikre, kia iròdu iròdu deburele ibutumy tuu riroxikre. ¹³ Tii riwaatyre, Bali ỹnyxiwe-my rerinanyre kia tamy heòty riworony xiwena-my. Tii tule rexixiwedenyre debò-di kia aõnaõna-di kiata raijaranyre tabirena mahãdu hewo-my. Kia ibutumy iaõnaõna òraruki, diarỹ arirarytxynykre. Diarỹ, Deuxu Tyhyhykỹ, rarybera. ¹⁴ Deuxu rarybere Israel iny mahãdureny-ò: — Waderina ixidee adidykre ixybyle bedero-ò aridykre, tai tamy ararybekre tuu arerinanykremy. ¹⁵ Tai diarỹ ixyby ariwahinykre tamy imona besò (uva) alòbròna kiata arirahòkre Bede binabina iwory ijò rarysòna-my. Taita tii wadee kanarybekre timybo juhuu ijadòòmau riwinymy raremyhỹmy, kia Ejitu-ribi dòhònydeu. ¹⁶ Ixyby tii riwaninikre “Tahãbu-my”, kia “Bali-my” riwaninike-ribi. ¹⁷ Tiu ariwahinyõtyhy kia tii Bali-my riwaninikemy; tiu ixyby rarybeõtyhy kaa ỹnyxiwemy. Diarỹ kaa, Deuxu Tyhyhykỹ, kaa tuu rarybereri. ¹⁸ — Kuatxuu diarỹ ariwinykre bededỹỹnana rybena iròdu iròdu debure mahãdu-ò, nawii nawii mahãdu-ò, kia hemylala mahãdu-ò, kia tamy iròrenymy ijararenyõmyrenykre waderina-ò. Wounana debòna arikrokre, waxiahãte mahãdu kia tõnori mahãdu; ixyby wouna rỹiõhyykre, kia waijoi wasỹ mahãdu aõbinaõmy reximywiwi-my roirekre. ¹⁹ — Israel, diarỹ awana hãwyy-my aroikre, kia ikiemy kai wahawyytyhy-my mabekre. Diarỹ arerina-my umy ararekre araywiywinymy ²⁰ kia tahe ahãbutyhyhykỹ wesemy ararekre. Taita kai bexideòsinykre bexawaninymy wadee, Deuxu Tyhyhykỹ. ²¹ Kua txuu diarỹ Deuxu adeereny reòbymyhỹre rare: biuixitòedỹỹnana arirawyònykre; biu wetyy boho tahe suu ixitòedỹỹnana rirawyònykre, biulòra tamy riwahinykre; ²² Kia suu tahe rirawyònykre maixõmoni ruhunykre, mona besò (uva) kia azeitona.Kawesemy tahe diarỹ tamy areòbykre Israel iny mahãdu ixitòedỹỹna-ò. ²³ Waijoi wasỹ mahãdu aribrònyrenykre Suu Rawahikremy Roimyhỹre-ò. Kia tii boho walòbrònareny òbitikremy. Kia Diarỹ tahe arerinanykre kua raninire wahe Tuu Rerinaõre; kua boho raninirenyre Wasỹ waijoi Aõkõ Rare diarỹ ararybekre: “Kai wasỹ waijoi tate”, kia tii rirawyònykre: kai heka waDeuxureny tate.