¹ Israel iny mahãdu, Deuxu tyhyhyky-ò bodòòsedenyke, aDeuxureny dee! Kai tariòwyte òraruna tewinyteki. ² Deuxu-ò bodòòsedenyke kiata myỹ maòranymy bexitòenybenykre: Ibutumy waòrarureny biixawidỹỹnymy wadeereny beòbyke, waixitòedỹỹnareny-ò boholake, kia wawiunanareny waxiwenarenymykre kia adee rewahinyrenyreri. ³ Assiria heka riwahedỹỹnyrenyke aõkõre, kia iawarureny timy riwaijerenyke aõkõre. Tiu ixyby ararybenyõtyhy aõòtaòta tyhydỹỹnareny-ò, wawidỹỹnareny dee, kia tiiboho heka wadeuxureny rare. Kai, Deuxu, aruxetòena nihikỹdire kiata arukimy atximyhỹte iny mahãdu iaõkõmy rỹimyhỹrenyre mahãdureny-di. ⁴ Deuxu tyhyhykỹ rarybere: — Wasỹreny waijoireny ariteytenyrenykre ityhy iraykyreny nohõtinareny ribi kiata tureny arerinanykre ibutumy wawo ribi, kiemy dori ixyby wakyaramy aõkõ direny watxireri. ⁵ Kia biulòra wesemykre Israel dee, kia tii tahe rõiròsònykre, noiròsò wesemy. Irarutireny heka sỹymy rỹirenykre Libano bederade wesemy. ⁶ Irade rurureny rateremy rateterenykre. Iruxerare òwòru rarie nihikỹ wesemy kia tỹnyrere Libano òwòru wesemy. ⁷ Kia ixyby Israel ratxikre wawòtena rawoki; tiiboho raumynyrenykre maixõmoni wesemy, kia raratynyrenykre mona besò raty wesemy kia tahe inidehedeherenykre Libano mona besò wesemy. ⁸ Israel iny mahãdu raryberenykre: Mana rỹsỹhỹkỹ, womati ritxoo heka aõke aõkõre. Jiarỹ heka Deuxu tyhyhykỹ rare kia tamy reòbymyhỹre wasỹ waijoi mahãdureny ixitòedỹỹnanare-ò; jiarỹ heka idireny warukimy watximyhỹre. Kia bederade lỹre wesemy, jiarỹ tamyreny iixiwòtenarenymy ariwahinykre, kia waribi tahe tiiboho ibutumy warybe wiwihikỹ rimyrenykre. ⁹ Iny mahãdu bedeeryreny kia iraykydirenyre rierymyhỹrenyre ta tyyriti ijyy kiata idi rõhõtinymyhỹrenyre. Deuxu tyhyhykỹ ryy sõe heka òbitihyymy nodu rare; iny wiwi mahãdu heka idi rariarenykre, ka òrarudu widỹỹdu mahãdu tahe tatiowomy kia rariòwyrenykre.