¹ Israel iny mahãdu bededỹỹnanamy Deuxu Tyhyhykỹ rarybere: “Israel uladumy raremyhỹuhukỹle , diarỹ tuu rerinanymy raremyhỹ, kia Egitu bedeki roiremyhỹu wariòre-my tamy raryre. ² Kiaremyta, diarỹ tamy ixyby ixyby rarymyhỹre-wana, kia ire tii waribi rexilòhòrarienymyhỹre. Wasỹ waijoi xiwena riwahinyrenyre Bali (Baal) ỹnyxiwe dee kiata owoji riõrenyre tatyhydỹỹnareny dee. ³ Ka riarỹ heka wasỹ waijoi reixinanyrenyre rariarenykremy; diarỹ waaxiòtiki remymy idireny raremyhỹ, kiaremy tahe tii boho reiryrenyõhyyrenyre kia diarỹ idireny warukimy raremyhỹmy. ⁴ Loysana derinahỹkỹ-di reywiywinymy diarỹ nadidydenyde ixityy-ò; kia diarỹ iaxiòrenyki remyrenyre iwese uladu tawyòki rimymyrenyre wesemy. Diarỹ rebedenymy kia tamyreny rỹsỹna rewahinyre.” ⁵ –Tii boho wadee òkese deralemy rekoarenyreri kia iurenana heka ixyby Egitu-ò ròirenykre kia tahe Assiria rimyrenymy idireny rarekre. ⁶ Kia wounana kanakre, kia iòludu mahãdu hãwa hãwa ijòtòbòna ribòhòbòhònyrenykre kiata arahurenykre. Wasỹreny waijoireny rururenykre kiemy dori dohodỹỹna binabinahãkỹ-di ratxirenyreki. ⁷ Wasỹreny waijoireny heka rõhõtiõrenyre kiata waòludumy rekoarenyre; iurenana heka tii boho brejudureny wesemy iòludureny ridyrenykre, kia inyõ rihedỹỹnyrenyke heka ihoõre. ⁸ “Israel, timybohe diarỹ araatykre? Timybohe awiòhedỹỹõmy ararikre? Kia aõbo diarỹ arahukre, iwese Admá rehure wese? Yda adee aõbo ariwinykre Zeboim dee rewinyre wesemy? Kõre; tuu adee ariwinyõkre, kiemy dori wawo raukỹykỹreri, Kia sõemy diarỹ adi rexiwobruny nihikỹre. ⁹ Kia wajyaramy aõ adee ariwinyõkre, ixyby wasỹ waijoi arihurenyõkre. Kiemy dori diarỹ Deuxu rare kia iny su ludu aõkõ; Diarỹ, Deuxu Tyhyhykỹ, wasỹreny waijoireny ykyki watxireri kia ixyby arihurenyõkre.” ¹⁰ –Kia diarỹ rawobrumyhỹreu halòehekỹ wese waòludu mahãdureny òldudumy, kia tahe wasỹ waijoi wahewomy rariarenykre. Wasỹreny waijoireny ynaijaranykre txuòlòna weribi-ribi; ¹¹ kia nawii wesemy tii boho wytyhylemy Egitu-ribi ydòidenykre kia bòtòe wesemy Assiria-ribi ydòidenykre. Diarỹ tuu ariwinykre ixybyle tasurenyki rahãwanyrenykremy. Diarỹ, Deuxu Tyhyhykỹ, rarybera. ¹² Deuxu Tyhyhykỹ rarybere: — Israel iny mahãdu riwayhyarinyrenyre roidihyyle kia bòdỹỹnadihyyle, kia Juda iny mahãdu waòludumy rekoarenyre, Deuxu Tyhy rare, kia ikiemy òbitihyylemy watximyhỹre.