¹ Deuxu rarybere: — Hãburiòre, mayrehe jureeõ bimyke, idi tahe aòsiri ta arade biòròkre. Irahudi tahe arade biutxienykre, aòsiri tule, utxiena ersyna-di, irahudi inataõmy biwirareakre. ² Tiubo iòldureny hãwahãkỹ weryràdỹỹ ririkreu, hãwãtya-ò makre, tai tahe arade sohoji inataõ urihixinarbi bisõkre tule aòsiri.irahudi tahe hãwahãkỹ werura-di mariakre tai tahe mayrehe-di arade uhe biruxmonykre, ijõ uhe tahe biu-txi idi behukre, tahe yhy ridykre. Tai tahe diarỹ wamayrehe-di tamy areakre. ³ Radeti-õ birarenykre tahe atyy ijeti-ò bitdikre. ⁴ Irahudi tahe radeti-õ bitakre, idi heòty-ò behukre ixinamy tai rookre. Heòty irbi ròhònykre, butumy Israel hãwãhãwa-my roberakre. ⁵ WaDeuxu rarybere: — Jerusalẽ hãwa-di ini beteheke. Butu bde bde tyamy resnyre tule iwitxira hãwãhãwãiweruramy reteòtenyre. ⁶ Kia tahe Jerusalẽ warybederamy rekoare, tai tahe hãwãhãwãwitxira rỹira ratyrehe, irybe siradỹỹmy relere, iny mahãdu iwerurarenymy rỹira ratyre warybesiradỹỹmy relenyre. Jerusalẽ warybe deramy rekoare, wabdeywidỹỹna rarsedỹỹderamy rekoare. ⁷ Wiji tahe Jerusalẽ mahãdu, boholawibenykre warybe-ò, diarỹ Deuxu rarybereri-ò. Wabededỹỹnana-ò teòbytenyõte tule aõmybo adeereny rarybere terarenytenyõte, taiki heka sõemy jei jei ixideereny tewahinyte, hãwãhãwãwitxira witxira ryira ratyre aweryrarenymy. Iwitxira iny rỹira bdedỹỹnana hakỹle tewinytenyte. ⁸ Taikita heka diarỹ Deuxu, umyreny rahitxireri. Diarỹ butu iny ruki aõbina bina renymy adeereny ararybekre. ⁹ Aõbina binahãkỹ tewinytenyte òraruki, Jerusalẽ, aõhỹkỹmy arasnyrenykre, tiu tuu rewinyõre tule tiu ixby tuu tamy ariwinyõtyhy. ¹⁰ Iiòrari-ki, Jerusalẽ-ki tby mahãdu tariòle riròrenykre, iriòre mahãdu tbyle riròrenykre. Diarỹ tuu aõhỹkỹmy arasnyrenykre, mobo irumy rarikre tahe bde bde-my ariubtỹnykre. ¹¹ Taiki tahe, kaahe Deuxurybere: kaiboho waheto tebinanytenyte, aõbina binahãkỹ-di tule aõxuxu-di texunytenyte, taiki tahe kiamy rexirybenyre, arahurerekre adeereny aratòenymy aõkõ, adireny arawobruke ihoõre. ¹² Inataõ butuna rbi, sohoji butuna rituekre, rbuna-di ta rmadesemy ijõra, hãwãwokile, ijõ sohoji butuna urihixina tasỹ, mayrehe-di rituekre, ahãwareny webròmy, ijõ inataõ urihixina tasỹ, yhyòle ariuberanykre tai tahe mayrehe-di iherenymy areakre. ¹³ -- Kai boho waruru ixiki bierybenykre, wadebure waehehe bierybenykre, wawo rihykrexiery ixãwikre. Kaa butumy rutỹỹnykreu, kaiboho biwatyhynybenykre, diarỹ kamy butumy adeereny raryberemy, kiemy sõemy tiwateburenytenyte, arybesiradỹỹrenydi.