¹ Deuxukiamy rarybere: — Hãburiòre, txijolu-õ bimyke, irahudi tahe akotxi bitdikre, ityreki tahe Jerusalẽ bidexeãnkre. ² Kaa dexeã-ki iòldu riyrawonymy biwinykre, iòtursòna, iòwòna ijõdimy, itỹhinareny ijõdimy tule imakinareny ijõdimy, mnaòtity dejuxuna. ³ Myjina wotimy ije bimykre, irahudi òtity wsemy bitdikre, kai, hãwa-wna awotyarenytxi. Hãwãwerbitxi betehekre. eresyna robymy roireri, kai tahe teyrawonymy idi atxiteri, kaa heka Israel mahãdu deòrxinakre. ^4-5 Hywe werbitxi boike, atyre Israel mahãdu òraru ariutxienykre. Kai kuaki herimy boibekre, iòrarureny utxiedi betyymy, trezento noventa txu-my, kiemy diarỹ tiiemy retxuhòrenyra aõbina bina-my rutỹỹnyrenykremy, sohoji txu-my wyra-di. ⁶ Kaa tiubo mahukreu, ruruwerbi-ò bexirahorekre, tai tahe Juda òraruna utxiedi betyykre, kuarenta txu-my, kia wsemy, sohoji txu-my, wyra-di aõhõkỹmy rutỹỹnymyhỹrenykre. ⁷ -- Òbitimy betehekre Jerusalẽ-di iòldureny riyrawonymy idireny rỹireri. Tahe õredera birasenymy hãwahãkỹ-my marybekre timybo rutỹỹnykremy. ⁸ Arataataakre, taki tahe timy aixirahoreseõna, tuhyy tahe iòldureny hãwahãkỹ riyrawonykre. ⁹ -- Katahe trigo bimykre, xevada, ervila, letxila, trigo smo ta aveia ijõra. Butumy wimy biurinykre idi pão biwinykre. Tii heka birsỹmy mabekre, trezento noventa txu bdeu, ruru werbi-ò bexirahorekreu bdeu. ¹⁰ Kai inaubiòwalemy pão smo biymyhỹkre txu sohoji-di, ywimy biymyhỹkre. ¹¹ Bee biõmyhỹkre, tule iurihixina ijõdikre: inatxi bedeò-my biõmyhỹkre txu sohoji-di, tule ywimy biõmyhỹkre. ¹² Iny ijny werbu wetby-di heòty, biworonymyhỹkre, paõ iburesò-di bisõmyhỹkre tahe pão biymyhỹkre, butu iny mahãdu ruki. ¹³ Deuxutule rarybere: — Tiubo Israel mahãdu bdebde-my ariubtỹnykreu, kawsemy rabyremy roirkre, rsỹna ibinamy ratòemyhỹre rirsỹrenykre. ¹⁴ Kiamy rerawyònyre: — Wadeoxo, wawedu, kiahe aõkõre! Diarỹhe tiú rsỹna ibinamy rỹiradi tiú rexisunyõmyhỹre. Uladu tuhyy raumynyre, tiu iròdu xinamy rurumyhỹre reròõhyymyhỹre da kõmy aõbo iròdu debure riròmyhỹre uhe. ¹⁵ Tai tahe WaDeuxu rarybere: — Heboxe. Broreni ijnylebohe ixinamy biuhekre, idi heòty biworonykremy; ityre-ò apaõ bisõbekre. ¹⁶ Ixby rarybere: — Hãburiòre, paõ aritòenykre, Jerusalẽ hãwa-ò rehemnyke. Tai tahe iny mahãdu, rsỹna ta bee riwòrenykre. ¹⁷ Tii boho irsỹnareny ihoõmy rekoakre tule bee ihoõmy rekoakre. Sõemy rõhõtiweryweryrenykre, ihyy tahe rituerenykre, taòrarureny òraru-ki.