¹ Rumy iòlò Belsazar, Babilonia ludu, byrenana riwinyre, kia mili sõemy hãwãhãwãwedu ninihikỹ mahãdu riteòarinyrenyre ydòidenykremy, kia tahe mona besòmy (vinho) riõmyhỹreny tarariròwysyna mahãdureny-wana. ² Kia sõetyhymy mona besòmy riõrenyreu, kia rarybere mana rỹsỹ bedeò idiwydenykremy kia mana rỹsỹ deòsa kanakremy kia Nabuodonosoru tyby, ditade Jerusalë Deuxu rybena hetowo-ribi. Belsazar bedeò-my reare tii kia taijoi mahãdurenytyhy-wana, kia tahãwyyreny-wana tabiraludureny-wana riuherenymy mona besòmy idi riõrenykremy. ³ Kia diwydenyde mana rỹsỹ bedeò sõe kia tahe ibutumy bedeò-di mona besò-di riõmy ratximyhỹreny ⁴ kiata mana rỹsỹ bedeò ỹnyxiwe-my raryberenymy ratximyhỹreny, mana rỹsỹ òtaòta, womati, òwòru kia mana ỹnyxiwemy. ⁵ Kia isitere-ribile hãbu debòõ ratỹnymy reare kiata ròritidỹỹmyhỹ byrena hetowo urahãkỹki, kia loosòna tỹnyhỹỹ-ki. Ka debòmy robireu iòlò ⁶ aõmybo rõhõtinykemy rieryõhyyre; kia tỹrehekỹmy relere brebumy kiata tarati-ribi ramytàtare tawaòhòkỹle. ⁷ Irahudi rirajuamy, rarybere rarariòwyrenykemy urerarudu mahãdureny dee, bedeery mahãdu dee kia biu-di aõmysỹdỹỹdu dee. Kia iòhòtyhyle tii ritehemynyrenyre, Belsazar rarybere: — Kua-di iny rariakre aõmy raritimy roireri heto weti-ki kia wadee riòbitinykre aõmybo rarybereri, kia heka tyywihikỹ-di ratyydỹỹkre, kia mana rỹsỹ reruti tòysanamy rawahikre, kia tahe inataõna wedutyhyhykỹmy rarekre waiòlòna bedeu. ⁸ Ibutumy bedeery mahãdu hetowo-ò rirònyrenyre, kiata ijõrenyõ idi rariarenyke aõkõre aõbo heto weti-ki raritimy roimyhỹ, kia iòlò dee riòbitinyrenyke aõkõre aõmybo rarybereri. ⁹ Iòlò ihãremy ixyby ruberure, kia iòsỹny ire rỹrenytyhymy relere. Kia wedu mahãdu rariehekỹ aõ rieryrenyke aõkõre aõ riwinyrenykemy. ¹⁰ Taita iòlò-se, roholare iòlò rirajuare-ò kia iijoireny mahãdu rirajuarenyre-ò, hetowo-ò ralore kiata iòlò dee rarybere: — Kia ikòlò ikiehykymy ratximyhỹre! Uritre brebukõmy kia wesemy amasajuramy, ¹¹ kiemy dokuri kaki ikòlòkumy atximyhỹteki hãbuno ijõdire kỹnyxiwe tykytyby tai ratximyhỹre. Tikubo Nabuodonosoru buu, ikòlòkumy raremyhỹ bedeku, kaa hãbu rikerytyhyre irakykydimy, ibedekerytyhymy kỹnyxiwe wesemy. Kia Ikòlòku Nabuodonosoru kaa hãbu risỹnyre bedekery mahãdu wedumy, kurerarudu mahãdu wedumy, hàri mahãdu wedumy kia biku-di anomysỹdỹkỹdu mahãdu wedurenymy. ¹² Kia Danieli, kaa hãbu ikòlòku nii tamy riwahinyre Beltessazar-my, rõhõtinymyhỹre itỹnytyhymy; tiki heka ibederytyhyhykỹre kia rasi kidikòbitinyke, ano iwasimy rỹimyhỹre rikòbitinymyhỹre kia rybe sirasira rikywinymyhỹre. Kiaremyta, mararitxòwyke Danieli-kò kia tikita rikòbitinykre anobo raritimy roireri hetoku wetiki. ¹³ Danieli ridyrenyre iòlò ratximyhỹ-ò kia ritỹỹraxinyre: — Kai aõbo Danieli tyhy tate, judeu mahãduõ waha iòlò Nabuodonosoru, anadyde juda-ribi brejuna wesemy? ¹⁴ Wadee raryberenyre kia ỹnyxiwe tyytyby aki ratximyhỹremy kia kai itỹnytyhymy riki tahõtinymyhỹte kia sõemy abedeerytyhyhykỹmy. ¹⁵ Iòhòtyhylemy karibi ròirenyra bedeery mahãdu kia biu-di aõmysỹdỹỹdu mahãdu, kia diarỹ tamyreny rarariòwyra wadee rybe-di ririranyrenykremy heto weti-ki raritimy roireri, kia wadee riòbitinyrenykemy aõmybo raritimy roireri. Kiaremy tii boho wadee riòbitinyrenyõhyyrenyra. ¹⁶ Kiaremy inyõ wadee rarybere kai wadee biòbitinykremy rybe sirasira kia biywinykremy rybe sirahäkỹ. Kiaremyta, txibo kai idi mariakre-wana aõmybo raritimy roireri kia wadee biòbitinykre aõmybo rarybereri, kai matyykre tyyòwyhykỹ-di, mana rỹsỹ reruti-di bòysananykre kia inataõna wedutyhyhykỹmy matxikre waiòlòna bedeki. ¹⁷ Danieli rirawyònyre: — Aõwaxina atxikre aaõnaõna-di yda biwahiny aõbo iny witxira-ò. Kia ihãrele diarỹ idi arariakre rybe heto weti-ki raritimy roireri-di kia adee ariòbitinykre aõmybo tii rarybereri. ¹⁸ Iòlò, Deuxu Rariehekỹ iòlòmy runykremy bu-ò riwahinyre, iòlò Nabuodonosoru, kia tule riwahinylere iruruteremy rynana rarieki runymy rarekremy. ¹⁹ Deuxu ibedeery nihikỹtyhymy tamy riwahinyre, kia ibutumy iny mahãdu hãwãhãwamy bede bedemy rỹimyhỹrenyre ilau ramytàtamy ruberumyhỹrenyre tii ratxira-wana. Txibo tii iny rubudỹỹmy rarybe-wana, iny rirubunymyhỹre; yda txibo irumy ratxikemy rarybe-wana, irumy ratximyhỹre. Inyõ-di rityhynymy ratximyhỹre kia ijõ-di tahe urile risinymyhỹre. ²⁰ Ka tii tahe ixiwedetyhymy relere, tõhõtiõtyhymy kia rexityhytyhynymy, tai tahe iòlòna wedu-ribi rariowyre kia ibutumy iaõwiwi iribi ixawire. ²¹ Rateòdỹỹre iny mahãdu yky-ribi, irayky rusare kia iròdu wesemy rariamy raremyhỹ. Rasỹnymy raremyhỹ jumentu debure mahãdu-wana, asimy riroximy raremyhỹ broreni mahãdu wesemy kia bederahyki rõrõmy raremyhỹ, kia nonoe rituunymy raremyhỹ, kia heka tuu rutỹỹnyre ihyy tahe tii ixyby rieryre Deuxu Rariehekỹ ibutumy iòlò mahãdu bede bedemy rỹimyhỹrenyre riwedunymyhỹrenyremy kia risỹnymyhỹre iòlòmy inyõ ixideewimy. ²² –Kai iòlò Belsazar, Nabuodonosoru riòre, ibutumy tuu teeryte, kia ihãremy tahe ywimy atxiõhyyte. ²³ –Iribi òtumy tewinyte, kai heka Iòlò biu ludu-di tesinyte kia bedeò sõe kanakremy tarybete, kia irybena hetowo-ki rỹimyhỹrenyre, kia kai aijoi mahãdureny-wana, ihãwyyreny-wana kia iwedenareny-wana idi mona besòmy (vinho) biõbenykremy. Kia ihãremy, kai arybewihikỹreny tewahinytenyte mana rỹsỹ deòsa ỹnyxiwe-ò, mana rỹsỹhỹkỹ ỹnyxiwe-ò, womati ỹnyxiwe-ò, kia òwòru ỹnyxiwe-ò kia mana ỹnyxiwe-ò, kia reteherenyõre, roholarenyõre kia aõ rieryrenyõhyyrenyre. Ka kai tahe tarybeõhyyte Deuxu aõwiwihikỹmy, kua ibedeery ijõdire iny rirubunykremy yda iny irumy ratxikremy, kia ibutumy rihumyhỹre aõhe adee rutỹỹnykre. ²⁴ Iurenana heka tii kaa debò riteòsinyre heto weti-ò kaa rybe riritinyre: ²⁵ “Mene, Mene, Tekeo kia Parsim”. ²⁶ — Ka tahe ariòbitinykre.Mene heka Deuxu aiòlòna txu-di rariare kiata riixawidỹỹnykre. ²⁷ — Tekeo kia heka kai utxiena-ò talidite kiata urihimyole tautxienyte. ²⁸ — Peres kia heka aiòlòuna rawirareakre kiata rawahinykre medos mahãdu-ò kia persas mahãdu-ò. ²⁹ Tai iòlò Belsazar rarybere Danieli ratyydỹỹnykremy tyy òwyhyy-di, tamy ratidikremy mana rỹsỹ reruti tòysanamy, kia turybe rỹikremy wiji bedemy rỹire tii inataõna wedutyhyhykỹmy ratxiremy Babilonia iòlòna-ki. ³⁰ Kua ruutyhyle Belsazar, Babilonia iòlò rurure, ³¹ kia Dario, Média iòlò, 62-my iwyra, tii teròwymy runyre.