¹ Iòlò Nabuodonosoru riwahinyre iny mahãdu dee ibutumy hãwãhãwãbede bede-ò, myỹ rarybemy: — Bedesawihikỹ kia bedeywihikỹ ibutudeereny! ² Kia bierybenykre ibutumy aõnaõna wiwihikỹ bedeòtiidỹỹna Deuxu Rariehekỹ riwinyre wadee waweribi-ò. ³ Inihikỹre ibedeòtiidỹỹnana, kia aõnaõna tii riwinyre heka brebunahãkỹ rare! Kiemy dori tii Iòlò ikiemy nodu rare kia ikiemy wedumy rarekre. ⁴ Kia tarybe ritõranyre: — Diarỹ Nabuodonosoru, awityhytyhymy waõmysỹdỹỹnaki watximyhỹ, kia ibutumy awihyymy raremyhỹ. ⁵ Kia rumy rarasinyre kiata riwanohõtiyrenyre. Rarõmyhỹ-wana, raykymy aõnaõna binabinahãkỹmy rabimy waumy ritòbònyre. ⁶ Iurenana rarariowyre ibutumy Babilonia bedeery mahãdu-ò, kia tii boho wadee warasi riòbitinyrenykremy. ⁷ Taita bedeery mahãdu dòidenyde, urerarudu Mahãdu, biu bede-di aõmysỹdỹỹdu mahãdu kia hàri mahãdu, kia diarỹ ikoreny warasimy relyyre, kia ijõrenyõ wadee riòbitinyõhyyrenyre. ⁸ Ikonanau tahe Danieli dehemynyde kia raerylemyhỹre Beltessazar-my, kia nii tamy rewahinyre waỹnyxiwe deewihikỹmy. ỹnyxiwe tyytyby tai ratximyhỹre, kia iurenana diarỹ warasimy iko relyyre. Diarỹ rarybere: ⁹ Beltessazar, urerarudu mahãdu wedu, diarỹ araeryre ỹnyxiwe tyytyby aki ratximyhỹre kia aõ iwasiõhyyre kai tuu biòbitinykre. Iurenana ako arelyykre warasimy kia wadee biòbitinykre aõmybo rarybereri. ¹⁰ Diarỹ herinaki herimy raimyhỹ kiata isitere-ribile aõnaõnamy rabire. Tai bederade rarie nihikỹmy rabire, rabròmy rỹimyhỹ bedetyahãkỹ-ki. ¹¹ Bederade ranihikỹmy rare kia ranihikỹre biuwetyyòhòkỹ rỹire kia heka inihikỹtyhyre, kia aõtxile bede bede-ribi tu robixi rỹire. ¹² Txiru rade heka iruxerare, kia tii sõemy raratynyre, kia ibutumy iny mahãdu iribile riroxirenyre. Iròdu iròdu debure mahãdu rexielehynymy rỹimyhỹreny iubròrò rawoki, nawii nawii iruru sõmo sõmo-my rasinymy rỹimyhỹreny, kia ibutumy iròdu iròdu, nawii nawii, iny mahãdu iratymy riroximy rỹimyhỹreny. ¹³ Diarỹ rarasinymyhỹ wana-wana, kia isitere-ribile rabire Deuxu tyytyby anju-my kia biu-ribi desedeu ¹⁴ kia rarybemy katxiterehekỹmy: “Bederade-di behuke, irurururu biyròke, Txiru rade bihebenyke kia iraty-di ahãna-ò behuke. Iròdu iròdu bisonybenyke kia iubròrò-my rexielehynymy rỹirenyreri kia nawii Nawii iruru-my rỹirenyreri. ¹⁵ Ka iòkre tahe biribenykre kia iraruti biribenylekre kiata bitaabenykre Womati reruti-di kia womati reruti witxira-di, kia bedeyky debure yky Bederahyki. Kawesemy tahe nonoe tuu ityre resemy rarekre kaa iòkre-txi, — kaa hãbu— Kia tii rirỹsỹnymy rarekre asi iròdu iròdu wesemy. ¹⁶ Tii irayky rusakre kia tahe iròdu wesemy raraykynymy rarekre; debò inatxi wyra sõemy kawesemy bede riekre. ¹⁷ Kaa heka Deuxu tyytyby tuu rarybere, Anju biuludu itxeredu, kia iny Mahãdu ibutumy rieryrenykremy Deuxu Rariehekỹ ibutumy bede bede hãwãHãwãrimymy ratxiremy. Tii wahinymyhỹre kaa iòlòna inydee ixideewimy, Kia iny iityhymy ratxire ibutumy hãbu mahãdu-ribi.” ¹⁸ Kia Nabuodonosoru tarybe rahure myỹ: — Kamy heka diarỹ rarasinyre, kia wabedeerydu mahãduõ wadee riòbitinyõhyyreri aõmybo rarybereri. Ka kai tahe Beltesaazar, wadee bidiòbitinykre kiemy dori ỹnyxiwe tyytyby aki ratximyhỹre. Kiaremyta, bidiòbitinykre warasi aõmybo rarybereri. ¹⁹ -Tamy roholareu Danieli, tule raerylemyhỹre Beltessazar-my, kia ruberure iurenana aõmy rõhõtinyõhyyre. Iòlò tamy rarybere: — Beltessazar, uritre nohõtiyreõmy rasimy kia aõmybo raryberemy. Ka Danieli rirawyònyre: — Iòlò, mobo tahe ryrybere rasi aõmybo rarybere abededỹỹnanamy aõkõ, kia tahe aòludu mahãdu bededỹỹnanamy rarybere! ²⁰ Kai tabite bederade nihikỹmy rararienyre rararienyrehyy biuwetyyòhyy rỹire kia heka inihikỹtyhyre, kia tuu alobixi rỹire aõtxile bede bede-ribi hãwãhãwa-ribi. ²¹ Irade txiru heka iruxerarenyre, kia sõemy raratynyre, ibutumy bede bedemy iny rỹira iribi riroxirenymy. Iròdu iròdu debure rexielehynymy rỹimyhỹ iubròròmy, kia nawii nawii iruru-my tasina riwinyrenymy rỹimyhỹreny. ²² Kua bederade wahe, kia heka kai tate. Kiemy dori arurutere kai aruruteremy abedeery nihikỹmy texirahorete, kia aixỹdinodu sõemy ranihikỹre, kia biurawetyyòhòkỹle rehemynyre, kia hãwãhãwãibutumy temyte bede bede-my roberare. ²³ Kai tabilete anju itxeredumy biurawetyy-ribi rubeheremy kia rarybemy: Biatyke bederade kia ibutumy iruru sõmosõmo biòròkre, kia iòkre tahe iraruti-wana biribenykre kiata womati reruti-di womati reruti witxira-di bitaataabenykre, kia ratxikremy asiyky debure tyaki, bedeykyki. Kawesemy nonoe rejujukre kaa hãbu tyre, kia tii tahe rirỹsỹkre iròdu iròdu rirỹsỹmyhỹrenyre. Debò inatxi wyra sõemy tii kawesemy bede riekre.” ²⁴ Kia Danieli tarybe ritõranyre: — Ka tahe adee ariòbitinykre. Kaa rasi heka Deuxu Rariehekỹ tuu bede riywinyre aòludumy Iòlò. ²⁵ Kai heka beokre iny mahãdu yky-ribi kia masỹnymy mabekre iròdu iròdu debure mahãdu-wana. Kai asi rade biròmy mabekre broreni mahãdu wesemy, bedetyaki morõmy mabekre kia nonoe aratuunymy rarekre. Kia heka debò inatxi wyra sõemy bede biekre, kia tahe ihyy kai bede ixyby bierykre Deuxu Rariehekỹ ibutumy iòlò bede bedemy rỹimyhỹre riwedunymyhỹremy, kia iòlò-my hãbu risỹnymyhỹre tii ixideewimy. ²⁶ Anju tuu rarybere kia rarikremy bederade òkre tararuti-wana, kia kai ixybyle iòlò-my bunykre, kia heka tiubo kai marybekreu Deuxu ibutumy bede bede riwedunymyhỹremy. ²⁷ Iòlò wadohodỹỹna-ò beòbyke. Òraruna widỹỹ-ribi ixawike kiata aõ òbitimy biwinyke; aaõbinabina mahuke kia iny iaõkõmy rỹimyhỹrenyre biwiòhenanyke. Kawesemy tahe aõhe-wana kai ywimy kia abedesamy matxikre. ²⁸ Kia inatyhymy ibutumy tuu rutỹỹnyre iòlò Nabuodonosoru dee. ²⁹ Waò inatxi wyra sỹtybymy, tii rariamy ratximyhỹ taõmysỹdỹỹna hetowoki Babilonia hãwaki. ³⁰ kia rarybere: — Timywe inihikỹre Babilonia hãwa! Warurutere nihikỹ-di diarỹ rewinyre waiòlò aõmysỹdỹỹna hãwa-my, kia ariteòsinykremy ibutumy waõmysỹdỹỹ nihikỹ kia waaõwiwi. ³¹ Iòlò rarybemyhỹ wana-wana iu rybe wodỹỹ biurawetyy-ribi nade, kia rarybere: — Boholawike, iòlò Nabuodonosoru! Kaa hãwãtewedunymyhỹte ahõrõmy aõkõ wiji rare. ³² -Kai heka beokre iny mahãdu yky-ribi, kia iròdu iròdu debure mahãdu-wana masỹnykre, kia asimy biroximy mabekre broreni wesemy. Kia heka debò inatxi wyra sõemy bede tuu biekre, ihyy tahe kai ixyby bierykre Deuxu Rariehekỹ ibutumy iòlò mahãdu bede bedemy hãwãhãwãriwedunymyhỹremy, kia tii iòlò-my iny ixideewimy risỹnymyhỹre. ³³ Kua bedeutyhyle tuu rutỹỹnyre Nabuodonosoru òludumy. Tii rateòdỹỹre iny mahãdu ykyreny-ribi, kia tahe asimy riroximy raremyhỹ broreni mahãdu weserenymy. Bedeykyki rõrõmyhỹre kiata nonoe rituunymy raremyhỹ. Irade irehehekỹmy relere nawiihikỹ wesemy, kia texià tahe inihikỹmy raumynyre, kia nawiihikỹ dexià wesemy relere. ³⁴ Iòlò rarybere: — Debòinatxi wyra sõe rexihureu, diarỹ biurawetyy-txi retehere, kiata warayky ixyby doosede. Tai Deuxu Rariehekỹmy reàlàre kia tamy warybewhikỹ inihikỹmy rewahinyre kua ikiehyymy ratximyhỹre dee. Diarỹ rarybere: Deuxu Rariehekỹ rurutere heka ikiehyymy nodu rare; Wedu nihikỹmyhỹre heka ionana ihoõre. ³⁵ Tamy heka iny mahãdu iaõtyhyke aõkõre; tii heka riwedunymyhỹre anju mahãdu biuki kia ibutumy su-my rahãwanymyhỹrenyre mahãdu.Tiu inyõ rikokròõtyhy aõ riwinykemyreri; tiu inyõ tarurumy tamy irybeõna aõ riwinyre riòbitinykemy.” ³⁶ –Warayky ixyby doosedeu, Nabuodonosoru tarybe ritõranyre, diarỹ ixybyle wedu nihikỹmy ranyre, warynana wiwihikỹ waiòlònaki. Wadohodỹỹdureny kia wedu rarie nihikỹ waõmysỹdỹỹnaki ratximyhỹrenyre ixybyle wadee reòbyrenyre. Ixybyle iòlòmy ranyre, kia ixyby waruruteretyhymy juhutyhy-ribi. ³⁷ Kiaremy, diarỹ iòlò Nabuodonosoru, reàlàre iòlò biu ludumy kia tuu ararybehyy ararekre inihikỹmy. Ibutumy Aõ riwinymyhỹre òbitimy awityhymy, kia tii aõtxile iny rexityhytyhynymy rỹimyhỹrenyre ribederyrynymy ribedetxinymyhỹre.