4
1
خدا حضورِ جَه و عیسی مسیحِ حضورِ جَه کی روزی زنده یانُ مُرده یانَ داوری کونه و ترَه قَسم دهم به اونِ ظهور و پادشاهی
2
کی هر موقعیتِ میَأن، وخت و بی وختْ خدا کلامَ موعظه بوکون، آماده بوبون تا هر وخت لازم بوبُست مؤمنینَ اصلاح و توبیخ و تشویق بوکونی، همیشه صبر و تحملِ مرَه خدا کلامَ اوشَأنَ تعلیم بدن.
3
چون زمانی فأرسه کی مردم تعلیمِ دوروستَ گوش نوکوند، بلکی بر طبقِ خوشأنِ مِیل مُعلمینِ زیاد خوشَأنِ دؤرُ وَر جمعَ کوند تا اونچی کی اوشَأنِ گوش دوس دَأره بیشتَأوه یَ اوشَأنِ جَه بیشتَأود.
4
و دِ حقیقتَ گوش نوکوند و اَفسانه یانِ طرف مُنحرفَ بود.
5
ولی تو هر شرایطی دورون تی حواس جمع بیبه و رنج و زحمتِ رِه آماده بوبون، سعی بوکون اِنجیلَ منتشر بوکونی و خودتِ وظیفه یَ به عنوانِ خدا خادم به بهترین شکل انجام بدن.
6
چون من هَسَه هدیه فوکودَنی مَأنستَأن فووَستَأن درم، می رِحلَتِ زمان فَأرسه دَأره و بزودی راهی آسمان بؤم.
7
من خداوندِ رِه، دیل و جانِ اَمرَه جنگ بوکودم، مسابقه یَ تا آخر تومامَ کودم و می ایمانَ محفوظ بدَأشتم.
8
هَسَه تاجِ عدالتْ مِرِه حاضره، تاجی کی خداوندْ اون داورِ عادلْ او روزِ رِه مرَه فَأده، و نه فقط مرَه، بلکی همۀ کسانی کی اونِ وَأگردستَأنِه مُشتاقد.
سفارش شخصی
9
سعی بوکون هر چی سریعتر بأیی می ورجَه.
10
چون دیماس اَ دونیا عشقِ وَسی مرَه ترکَ کوده و بوشو دَأره شهرِ تسالونیکی. کریسکیس بوشو دَأره شهرِ غَلاطیه و تیطُس بوشو دَأره شهرِ دَلماتیه.
11
فقط لوقا می اَمرَه ایسَه. مَرقُسَ اوسَأن و خودتَ مرَه بأور، چون می خدمتِ دورون مرِه مُفیده.
12
تیخیکوسَ اوسَه کودم شهرِ اَفِسُس،.
13
وختی آمون دری اون عَبایی کی شهرِ تروآسِ دورونْ کارپوسِ ورجَه جا بنَمَ تی اَمرَه بأور. می کِتابانم بأور و مخصوصاً می اوراقِ پوستی یَ.
14
اِسکندرِ مِسگر مرَه خیلی بدی بوکود، خداوند اونِ کارانِ جَزایَ اونَ فَأده.
15
تونم اونِ جَه دوری بوکون، چون شدیداً اَمی پیامِ مرَه مُخالفه.
16
می اولین جلسه دادگاهی دورون هیچکس می جَه دفاع نوکود، بلکی همه تَه مرَه ولَ کودد، اُمیدوارم خدا اَ خطایَ به اوشَأنِ حساب ننه.
17
ولی خداوند خودش می کنار بِئسَه و مرَه قُوّت بدَه تا بتَأنم دلیری مرَه اِنجیلَ موعظه بوکونم و اونَ همۀ دونیا مِلتانِ گوش فأرسَأنم، پس شیرِ دهنِ جَه نجات پیدا کودم.
18
خداوند مرَه هر بدی و شرارتِ جَه نجات دِهه و به سلامت به خودشِ ملکوتِ آسمانی فأرسَأنه. جلال بر اون تا اَبداآباد، آمین.
سلامهایِ آخر
19
می سلامَ پریسکیلا و آکیلا و اونیسیفوروسِ خانواده یَ برسَأن.
20
اِراستوسْ شهرِ قُرَنتُسِ میَأن بِئسَه، و من تروفیموسَ شهرِ میلیتوسِ میَأن جا بنَأم و بأموم، چون مریض اَحوال بو.
21
سعی بوکون قبلِ زمستان بأیی اَیَ، یوبولوس ترِه سلام رسَأنه، و همچنین پودِنسْ، لینوس، کِلودیا و باقی برأرأن ترِه سلام رسَأند.
22
خداوندْ تی روحِ اَمرَه بیبه، فیض شیمی اَمرَه بیبه. آمین