2

¹ ولی تو ای پسرجان، خودتَ اون فیضی مرَه کی مسیحِ عیسی بخشه تقویت بوکون، ² و اونچی کی شاهدانِ زیادِ ورجَه می جَه بیشتَأوستی یَ، کسانی کی اَمین و قابلِ اعتماد بوبودَ بیسپار تا دیگرانَ تعلیم بدد. ³ به عنوانِ مسیحِ عیسی سربازِ فداکارْ، سختیانَ تَحمل بوکون. ⁴ هیچ سربازی خودشَ گرفتار اُمورِ روزمره نوکونه تا بتَأنه خو فرمانده یَ راضی بدَأره. ⁵ و هَطو ورزشکاری هم کی مسابقه ایی دورون شرکت کونه، نتَأنه جایزه یَ بوبوره مگر اَنکی اون مسابقه قوانینِ جَه پیروی بوکونه. ⁶ و اونی کی وَأستی اول محصولِ جَه نصیب بوبوره اون کشاورزیه کی زحمت بکشه دَأره. ⁷ دربارۀ اَ سه تَه مثالی کی بأوردم خوب فکر بوکون، خداوند ترَه کمک کونه تا همه چیَه بفهمی. ⁸ بخاطر بأور کی عیسی مسیح، جی نسلِ داوود بودونیا بأمو و مَردن پسِ رِه ایبار دیگر زندَه بوست، اَن هون انجیلِ پیغامه کی من اعلام کونم. ⁹ و هَنه وَسیه کی رنج و زحمت دینم و دکفته دَأرم زندانْ و ایتَه مُجرمِ مَأنستَأن مرَه زنجیر بوکوده دَأرد، ولی خدا کلامْ زنجیر نییه. ¹⁰ ولی من حاضرم خدا انتخاب بوبُسته یانِ وَسی همه جور زحمت بیدینم تا اوشَأن نجاتی کی عیسی مسیحِ دورون نَهه یَ اون جلالِ جاودانی مرَه بدس بأورد. ¹¹ اَ گب قابلِ اعتماده کی گویه: اگر اونِ مرَه بمردیم، اونِ مرَه زندگی هم کونیم. ¹² اگر تحمل بوکونیم، اونِ مرَه سلطنت هم کونیم. اگر اونَ اِنکار بوکونیم، اونم اَمرَه اِنکار کونه. ¹³ اگر بی وفایی بوکونیم، اون وفادار مَأنه، اَنِ وَسی کی نتَأنه خودشَ اِنکار بوکونه، چون اَمَأن جزئی جی اونِ وجودیم.

¹⁴ اَ چیزانَ همیشه کلیسا اعضایَ یادآوری بوکون، و خدا حضورِ جَه اوشَأنَ هشدار بدن کی کلماتِ سر بحث و جدل نوکوند، چون اَ بحثان آخر عاقبت نَئره و فقط کسانی کی ایشتَأودَه گومراه کونه. ¹⁵ سعی بوکون خدا مقبول بیبی، ایتَه خدمتکاری مَأنستَأن کی دلیلی شرمندگی رِه نَئره و خو کارِ جَه خجالت نکشه، سعی بوکون خدا کلامِ مفهومَ خوب درک بوکونی و اونَ دوروست تعلیم بدی. ¹⁶ جی بحثهایِ زشت و بی معنی دوری بوکون، چون انسانَ بی دینی طرف فَأکشه و خدا جَه دورَ کونه. ¹⁷ اَ بحثانِ دورون حرفهایی رد و بدل بِه کی خُورِه مَأنستَأن دکفه آدمی جانِ میَأن، هیمینائوس و فلیطوس جُزِ کسانی ایسد کی اَجور بحثانَ علاقه دَأرد. ¹⁸ اوشَأن حقیقتِ جَه مُنحرفَ بوستد و گوید هَسَه قیامت بوبُسته! و اَطو خیلیانَ ایمانِ جَه مُنحرفَ کوده دَأرد. ¹⁹ ولی با اَنحال اون پِی مُحکمی کی خدا بنَه دَأره پابرجایه، و اَن کلماتِ مرَه مُهر بوبُسته کی:«خداوند خو کسانَ شنَأسه» و «هر کی مسیحِ نامَ دخَأنه وَأستی شرارتِ جَه دوری بوکونه» ²⁰ ایتَه پیلدانه خانه دورون فقط ظرفِ طلایی و نُقره ایی ننَه، بلکی چوبی و گیلی ظرف هم نَهه، اوشَأن کارایِ مهمِ رِه بکار اَیدْ اَشَأنم کارایِ روزمره و عادی رِه. ²¹ پس هر کس خورَه اونچی جَه کی بوگوفتم پاک بدَأره، ایتَه ظرفِ بااَرزشِ مَأنستَأنه، ظرفیه کی کارایِ مهمِ رِه بکار اَیه و ایتَه ظرفِ مفید و مقدّس بِهه صاحبخانه رِه، و هر کارِ خوبِ رِه بکار اَیه. ²² شَهوتانی جَه کی مربوط به جوانی دورانه فرار بوکون، اوشَأنی مرَه معاشرت بوکون کی قلبی خالص و پاکِ اَمرَه خداوندِ نامَ دخَأند، و اوشَأنِ مرَه عدالت و ایمان و مُحبت و سلامتی دونبال بوبون. ²³ بحثهایِ پوچ و بی معنی جَه دوری بوکون، چون دَأنی کی دعوا و عَصبانیتَ باعث بِه. ²⁴ و خداوندِ خادم نوَأستی دعوا بوکونه، بلکی وَأستی همه کسِ اَمرَه مهربان بیبه، و صبر و مُلایمتِ مرَه کسانی کی اشتباه دورون ایسَدَه تعلیم بده. ²⁵ وَأستی مخالفانَ مُلایمت و نرمی اَمرَه اِرشاد بوکونه، شاید خدا اوشَأنَ کمک بوکونه تا توبه بوکوند و حقیقتَ بشناسد ²⁶ و به خودشان بأید، و ابلیسِ دامِ جَه آزاد بوبود کی اوشَأنَ خو دامِ دورون اَسیر بوکوده تا اونِ اِراده یَ انجام بدد.