¹ ۔ جس وقت تُو حُکمران کے ساتھ کھانے کو بیٹھے تو خُوب غور کر کہ تیرے سامنے کون ہَے ۔ ² ۔ اگر تُو کھاؤ ہَے تو اپنے گلے پر چھُری رکھّ ۔ ³ ۔ اُس کے لذیذ کھانوں کی خواہش نہ کر کیونکہ وہ فریب دینے والی خُوراک ہَیں۔ِ ⁴ ۔ دولتمند ہونے کے لئے دُکھ نہ اُٹھا ۔اپنی اس دانِشمندی سے باز آ۔ ⁵ ۔ جُونہی تُو اُس چیز پر نگاہ کرے گا۔وہ جاتی رہے گی کیونکہ وہ اپنے لئے اُس عقاب کی مانند پَر بنالیتی ہَے جو آسمان کی طرف اُڑ جاتا ہَے ۔ ⁶ ۔ تُو کُنجوس آدمی کی روٹی نہ کھا۔اَور اُس کے لذیذ کھانوں کی خواہش نہ کر ۔ ⁷ ۔ کیونکہ وہ اپنے آپ میں سوچتا رہتا ہَے وہ تُجھ سے کہتا ہَے کہ کھا اَور پی ۔مگر اُس کا دِل تیرے ساتھ نہیں۔ ⁸ ۔جو نوالہ تُو نے کھایا تُو اُسے قے کر دے گا اَور تُو اپنی مِیٹھی باتیں ضائع کرے گا۔ ⁹ ۔ بے وقُوف کے کان میں کلام نہ کر ۔وہ تیری حِکمَت کی باتوں کی بے قدری کرے گا۔ ¹⁰ ۔ بیوہ عورت کی حدوں کو نہ سر کا اَور یتیموں کے کھیتوں میں داخِل نہ ہو۔ ¹¹ ۔ کیونکہ اُن کا وّلی طاقتور ہَے اَور وہ اُن کے مُقدّمے کے لئے تیرے ساتھ جھگڑےگا ۔ ¹² ۔ نصیحت کی طرف اپنا دِل لگا اَور عِلم کی باتوں کی طرف اپنے کان دھر۔ ¹³ ۔ لڑکے تربیت میں کوتاہی نہ کر۔ اگر تُو اُسے چھَڑی سے مارے گا تو وہ مَر نہ جائے گا۔ ¹⁴ ۔تُو اُسے چھَڑی سے مارے گا تو اُسے پاتال سے چھُڑائے گا۔ ¹⁵ ۔ اَے میرے بیٹے ! اگر تیرا دِل دانِشمند ہو تو میرا دِل بھی خُوش ہوگا ۔ ¹⁶ ۔اَور جب تیرے ہونٹ راستی کی بات کریں تو میر ادِل بھی شادمان ہوگا۔ ¹⁷ ۔اپنے دِل کو خطاکاروں پر رَشک نہ کھانے دے۔بلکہ دِن بھر خُداوند سے خوف کرتا رہ۔ ¹⁸ ۔ کیونکہ اَجر یقینی ہَے۔ اَور تیری اُمیّد نہ ٹُوٹے گی۔ ¹⁹ ۔ اَے میرے بیٹے ! سُن اَور دانِشمند ہو اَور راہ میں اپنے دِل کی ہِدایت کر ۔ ²⁰ ۔ مَے خواروں اَور گوشت کھانے والوں کا شریک نہ ہو ۔ ²¹ ۔ کیونکہ مَے خوار اَور پیٹو کنگال ہو جائیں گے اَور نیند اُنہیں چِیتھڑے پہنائے گی۔ ²² ۔ اپنے باپ کی بات سُن جس سے تُو پیدا ہؤا اَور اپنی ماں کی تحِقیر نہ کر جب بُوڑھی ہوگئی ۔ ²³ ۔راستی کو خِرید لے اَور اُسے مت بیچ ۔اَور ایسا ہی حِکمَت اَور تربیت اَور فہم کو ۔ ²⁴ ۔ صادِق کا باپ بڑی شادمانی کرے گا۔اَور دانِشمند آدمی کا والد اُس سے خُوش ہوگا۔ ²⁵ ۔ پس تُو اپنے باپ کو شادمان کر اَور اپنی ماں کو بھی جس سے تُو پیدا ہُؤا۔ ²⁶ ۔ اَے میرےبیٹے! اپنا دِل مُجھے دے اَور تیری آنکھیں میری راہوں کی نِگہبانی کریں ۔ ²⁷ ۔ کیونکہ فاحِشہ ایک گہرا گڑھا ہَے۔ اَور بیگانہ عورت تنگ کُنواں ہَے ۔ ²⁸ ۔ ہاں وہ ڈاکُو کی طرح گھات میں بیٹھتی ہَے۔ اَور بنی آدم میں بے وفاؤں کی تعداد بڑھاتی ہَے۔ ²⁹ ۔کِس کے لئے افسوس ہَے ۔؟ کِس کے لئے غِم ہَے؟ کِس کے لئے جھگڑے ہَیں؟کِس کےلئے شکایت ہَے ؟ کِسے بے سبب زخم لگے ہَیں؟ کِس کے لئے آنکھوں کی سُرخی ہَے ؟ ³⁰ ۔اُن کے لئے جو دیر تک مَے نوشی کرتے ہیں اُن کے لئے جو مُرکّب مَے کے چکھنے کےلئے جاتے ہَیں۔ ³¹ ۔مَے کی طرف مت دیکھ جب وہ سُرخ ہو اَور جب پیالے میں اُس کا رنگ چمکتا ہو۔ وہ مزے کے ساتھ گلے سے نیچے اُترتی ہَے۔ ³² ۔لیکن آخر کار وہ سانپ کی طرح کاٹتی ہَے۔ اَور اَفعی کی طرح اپنا زہر بکھیرتی ہَے۔ ³³ ۔تیری آنکھیں عجیب چیزیں دیکھیں گی اَور تیرے مُنہ سے اُلٹی سِیدھی باتیں نکلیں گی ۔ ³⁴ ۔اَور تُو اُس کی مانند ہوگا جو سمُندر کے درمیان لیٹا ہُؤا ہو۔اَور اُس کی طرح جو مستُول کے سر پر سو جائے۔ ³⁵ ۔ " اُنہوں نے مُجھے مارا مگر مُجھے درد نہ ہُؤا۔ اُنہوں نے مُجھے پیٹا پر مَیں نے معلُوم نہ کیا۔ مَیں کب جاگُوں گا ؟ مَیں پھِر اُس کی تلاش میں پھِروں گا "