¹ Naa ce a jɔn gɔsɛrɛ la lakala ɲi tan, na ni lanbara la lakala na ni kafɔniya na ni jusari na ni yile gɔsɔ ɲama lakala. ² Yila ma yen bisɛnri durɔ san ɲa len ɲɔn, na yɔrɔ vamara jɔn len yen dama nɔnɔ so so na lege la muan apa, yele apa ganri na won a na kirisi la na won, ³ Naa ce apa ɲino o si ni E ci cana. ⁴ A daba E ci san bɔa kumele cana. La la yen siɔn tan ma, naa osa ko tɔsɔ wa, o yiri zɔn vamara sa tan. ⁵ Apa dabɔ o san dama bɔa sayɔ. Yele apa zangali dama kunmara cana na yɔrɔ, pemere bri a cala cana yala, a na bri pemere le cana le ma ɲɔn vamara na. Yezu kirisa pan won. ⁶ Na yilena kitabu ɲamɔ ni wo: Sumu tee, mɛ ji ja jimi ceri bɔa ce Siɔn, o sa ko tɔsɔ wa, o yiri zɔn fo kɔrɔnɛ. Le siɔn o na o ja da ci seba. ⁷ Apa lema siɔn o na, o labara juɛ yii lakala na apa sa tan, naa ce kole muan bɛlɛ ca jɛn ya, ja luan cala jɔn bɔa le, na da ja la jimi tan bɔa lakika na. ⁸ Na ba da san bɔa na ni tan vura para. Ana baa n disi, naa ce a na yen sɛn ana mɔ vamara kole ba. Na ma la ɲi tan cira bɛn. ⁹ Naa apa ke ju la tɔsɔ wa, na ni pemere bra ca pa yala na ni ju yala lema ka poro na ni vamara la lema bre, yele le komu apa na o lurɔ tan bino la o ce apa ma murɛ pola won, a ɲama na ma can na dari yala. ¹⁰ Apa tari ka vamara la dere ba, naa bisaso apa ko o laa. Apa tari yen makari na cɔn na ba, naa apa na naa bisaso. ¹¹ E ɲibio lema maɲuma dana, apa vero wa na ni jina yiya so diɲɛ so won, naa ce mɛ ziri apa ni wo a jɔn yara nama mayala ɲi tan, naya cɛrɛ weri lo bɛlɛ bi san dɛ. ¹² Apa vara veri ko cana wo vamara ɲina bɛlɛ ca sɛrɛ won. Na were, hali ana ɲimi apa yile gɔsɔ ni wo napa ke magɔsɔ dari caa, a na je apa ma cana dari la na ana da vamara mawali nayilena, ni o ko lurɔ apa yan lenwura. ¹³ A cusa sa la la ɲɔ ciri ya lakala tan Eci la yilena. A sian pa bala tan, o wa len yen yii la lakala ɲɔ na. ¹⁴ A sian gɔfɛrɛnɛrɛ tan, na yilena o ko babɔ pa ba yala yan o fɛn fɛn magɔsɔ dari cala san, o da ma cana dari cala tandu. ¹⁵ Vamara bɛlɛ yile ni so na ni wo apa da haciri temele lema ɲuno ba apa pɛ na ya ɲi ni apa dari wali cana yala na. ¹⁶ Apa hɔrɔn yaa, na lakala na, apa hɔrɔn ya ba da magɔsɔ lepile na ba, naa na apa ke vamara bɔri yaa. ¹⁷ A ce co la lakala bɛn, a ɲibio la ma ɲɔma ana na.A sua vamara cilen, a ce co pa bala bɛn. ¹⁸ Wali bio la a sian a ɲɔ cala tan ni co lakala na, ɲɔ ca cana la na ni zuro yala se mini ba hali gɔsɔ la mu. ¹⁹ Naa ce lo mɔna ni pɛnmɛ le na ba, ni o da muɲu vamara sa cilen sua yilena, na ke tanduli la sababu wa. ²⁰ Haya ni n mara magɔsɔ la dari yilena, ben co yen na muɲuni la won? Naa ni n pian ma cana dari wali la yilena, ni n da na muɲu, naa ke tanduli ya vamara sa tan. ²¹ Apa komu na yilena, naa ce kirisa se mu pian apa yilena, o bɔra na sa apa na, yele apa cungunu o ba nian dapɔn. ²² O yen ma gɔsɔ pɔyi da, lanbara jɔn pɔyi yen lurɔ len. ²³ Ana cusɔ lenwere, o yo o ɲi na wɛn ma. O piɛn lenwere la, o yen kankari ce ana na ba, naa o jɔn ma lakala vamara lugo, na le cirɛ ciri ni cɛnsa na. ²⁴ Kirisa se turɛ na ma gɔsɔ la ni o yara nama na piyan duru la bɛn, yele e da cɔ na magɔsɔ jɛn ya, e na sayɔya cɛnsa la yilena. Apa da cɛn o mɛra nian la yilena. ²⁵ Epa tari yen dama pisi lema ka tununi, naa bisaso apa kunmara la juge apa jusa ci na ni o yɔrɔga ci na.