¹ Cànà y èmyɛ́ dwã shí-èlyè ǹdə́ nə̀na yù wə, Esərayɛl lyì byǎ bɛ́ tú dwã yó nyì-lyõṍ yilə. Bə̀ y'à zù ywə́ə́le, bə súlí bə ló shó bə̀ yə́-pǎlsɛ́ wa. ² Byɛ̀bɛ́ gakó bə̀ y'à wɔ́ Esərayɛl dwí rí lyì mú shə́r dwə́ né dwã bɛ́ gakó wẽ́ bə jòm bə̀ nyí, bə̀ la m'e tùrhì bə̀ yə̀-bəlwàálɛ́ e súlí bə̀ nàmbala bɛ́ dwə́ə́ré. ³ Bə̀ zɛ̃̀ bə zhì dɛ̃̌ bə̀ jààsɛ́ wa, sə bə̀ kàrmə̀ Cinu, bə̀ Yi rí, Nyí rí sɛ́bɛ́ rɛ́ lùr rǝ̀tɔ̀; bə zɛ̃̀ bə tùrhì bə̀ yə̀-bəlwàálɛ́ bə súlí bə wùlì tɛ̃́ Cinu bə̀ Yi rí yé né lùr rə̀tɔ̀ myɛ bə m'e lwə̀l re sǔbri. ⁴ Zhozwe ǹdə́ Bəni ǹdə́ Kadəmyɛl ǹdə́ Shəbanya ǹdə́ Buni ǹdə́ Shərəbya ǹdə́ Bəni e súlí Kənəni zɛ̃̀ bə zhì byúlú w bə̀ y'à fwar Levyi dwí rí lyì bí yil mú yó bə bya dɛ̃̌dɛ̃̌ bə ce Cinu, bə̀ Yi rí ni. ⁵ Levyi dwí rí lyì Zhozwe ǹdə́ Kadəmyɛl ǹdə́ Bəni ǹdə́ Ashabənəya ǹdə́ Shərəbya ǹdə́ Oja ǹdə́ Shəbanya e súlí Pətaya zɛ̃̀ bə wɔ̀: «Zɛ̃̀-na dɛ̃̌! Cèrhé-nə Cinu, á Yi rí twéé twéé yilə! «Bə̀ cèrhé ǹ yil ré rə̀ zhe zùwə́ mó, rə̀ du gar dwí gakó ju ǹdə́ còrhó dwí gakó mó! ⁶ Wɔ́ ǹmyɛ́ ǹ wɔ́ Cinu, ǹmyɛ́ dúdú sásá! Wɔ́ ǹmyɛ́ ǹ wɛ̀rhɛ́ dɛ̃̌-yi rí, dɛ̃̌-yi rí púlə́púlə́ ǹdə́ rə̀ cã̀mə́sɔ̌sɛ́, e súlí cɛ y ǹdə́ kɔn dɛ̀bɛ́ gakó rə̀ wɔ è wẽ́ mó, nə̀-fwààlɛ́ ǹdə́ kɔn dɛ̀bɛ́ gakó rə̀ wɔ rə̀ wẽ́ mó. Wɔ́ ǹmyɛ́ ǹ nə́ pɛ nyǔ rə̀myɛ́ mɔ́ gakó ne, dɛ̃̌-yi rí ŋwɔ̀nɔ́ dwí gakó n'ê wùlì tɛ̃́ ǹ yé né ò m'ô cèrhé mó. ⁷ Wɔ́ ǹmyɛ́ Cinu Yi ǹ cír Abəram, ń ce n shə́r Uur ní Kələde lyì bí tənà y wa, ń zɛ̃̀ ń ce ń yil bə̀ Abəraam. ⁸ Ǹ púrí bə̀ ń zhǐ ń nà yó ǹdə́ mɔ́, ń zɛ̃̀ ń bwəl mo nyí bə̀ ǹ m'ǎ pɔ̃ Kanaã lyì bí ǹdə́ Yititəbá ǹdə́ Amɔritəbá ǹdə́ Pərəzhitəbá ǹdə́ Zhəbuzhitəbá e súlí Gərəgəshitəbá tənà yá, ńmyɛ̌ ǹdə́ ń nɛ̀mɛ́ nɛ́ nɛ. Ǹ pyìrh ǹ nyí rí ǹ bwəl mó, ǹ gə́ wɔ́ cángá cə́bal mɔ́ yilə. ⁹ 9 Ǹ nɔ nə́ nàmbala bɛ́ zúzúnú w Ezhibti ní mú, ń súlí ń nyɛ̀ɛ̀ bə̀ búbwéé vwal-gɔ nə̀-fɔ̀lɔ̀ w nyí ni mú. ¹⁰ Ǹ wɛ̀rhɛ́ màmyaarhɛ ǹdǝ́ wò-jààrɛ ń mə́ pə còrhò-tum Faraɔ̃ ǹdə́ ń tùntùnnə bé ǹdə́ ń tənà y lyì bí gakó ne, bə̀ ǹ yà ǹ yě bə̀ bə̀ cìn-byilu mú ce bə̀ y'à nwɛ̀nɛ̀ bɛ, sə ǹ ce ǹ yil du ǹdə rə̀ gə́ wɔ́ nɛ́ zà. ¹¹ Ǹ bɔ̀n nə̀-fɔ̀lɔ̀ w dwã w bə̀ yé né, bə tó cə-kùlì wẽ́ ò cəcəl w bə byɛrhɛ; sə ǹ ju lyì byɛ̀bɛ́ bə̀ y'à pú bə̀ kùr bə̀ n'ê jì mú nə̀-elyìmú wə, bə dùr bə vò ò kùr wə, ǹdə nə́kulu bə̀ dul nə̀-zha w ta. ¹² Nə̀nyɛ́nɛ́ nɛ, ǹ tó ébɔ̃ nà dɛnnɛ ń mə́ kál bɛ; cəcɛ̃ nɛ, ǹ tó myìn-zho dɛnnɛ ń yə̌r sɔ́má y kɛ̀bɛ́ bə̀ y'à kwè mó. ¹³ Ǹ só tɛ̃́ Sənəyi pyɔ̀ w yó, ń zɛ̃̀ ń zhì dɛ̃̌-yi w ń zɔ̀m ǹdə́ bɛ; ǹ pɔ bɛ nyə́ nyɛ̀bɛ́ nə̀ mǎ; nə̀ wɔ́ zhə̀na, e súlí cúcú mɔ̀bɔ́ ǹdə́ lùl-e-púrsi shɛ̀bɛ́ sə̀ càn. ¹⁴ Ǹ tó ǹ tùntùnnə Muyiisi dɛnnɛ ń ce bə lwar shìrhə́ y dɛ̃ rɛ́ rə̀ wɔ́ ǹ dɛ̃ rɛ́ mɔ́ párá, ń súlí ń pə bɛ lùl-e-púrsi, cúcú ǹdə́ Nyə́. ¹⁵ Ǹ pɔ bɛ búrú kɔ̀bɔ́ ò shí dɛ̃̌-yi w bə̀ nɔrh mɔ́ zhùlù yilə, ń súlí ń ce nɛ̃̌ shí nə́kulu w mə du bə̀ nə̀-nyɛ̀lsɛ̀ gu yilə. Ǹ wə̀l be bə̀ bə̀ zhəl bə zwẽ tənà y ǹ zhẽ̌ ǹ jɛ̃̀ ń mə́ bwəl be nyí bə̀ ǹ la bɛ pɔ bə cìní mú. ¹⁶ Sə bə̀myɛ́ ǹdə́ nə́ nàmbala bɛ́ wɛ̀rhɛ́ cìn-byilu, bə twĩ̀ yó-kùlù, bə zɛ̃̀ bə̀ yə̀ ǹ nyə́ né zwẽ yé. ¹⁷ Bə cẽ bə̀ yə̀ cili yé, bə̀ yə̀ màmyaarhɛ́ ǹ yà ǹ wɛ̀rhɛ́ bə̀ yil mú yò lyǐrh yé; bə̀ twĩ̀ yó-kùùlì, sə bə̀ twə́r tɛ̀nɛ́ ǹdə́ mɔ́ tũ̀twĩ̀ĩ̀ rí wẽ́ mó, bə̀ gu bə̀ wẽ́ bə̀ bə̀ la k'a kwɛ̃̀ bə̀ vò yómə́-jè yə́. Sə ǹmyɛ́, ǹ wɔ́ Yi tɛ̀bɛ́ rə̀ n'ê pɛ sǔbri, wu-bɔ̀nɔ̀ ǹdə́ nɔ̀nɔ̀-dǔr cə́bal mɔ́, ǹ lyim t'â zɛ̃̀ làlà yé, ǹ sú ǹdə́ wu-bɔ̀nɔ̀; ǹ yə̀ be yẽ̌ yé, ¹⁸ má bə̀ gə́ yə̌l lù bə m'e zùrhì nũ̌-bwə̀lə̀ bə zɛ̃̀ bə wɔ̀: ‹Nyǐ ǹ Yi rí rə̀ ce ń du Ezhibti ní mú.› ga. Bə̀ dó ǹdə́ dwə́ə́re nánfwààlɛ. ¹⁹ Sə ǹmyɛ́, nɔ̀nɔ̀-dǔr nánfɔ̀lɔ̀ w ce, ǹ yə̀ be yẽ̌ gɔ elũ-èpòlò w wẽ́ yé: Ébɔ̃ w ò y'à n'ô byili bi sɔ́má y kɛ̀bɛ́ bə̀ y'à kwè mó yə̀ bə̀ nyí ni kɔl nə̀nyɛ́nɛ́ nɛ yé, myǐn-zho w ò y'à n'ô yə̌r sɔ́má kɛ̀bɛ́ bə̀ y'à kwè mó myɛ yə̀ bə̀ nyí ni kɔl cəcɛ̃ nɛ yé. ²⁰ Ǹ pɔ bɛ ǹ éshìrhə́ kɛ̀bɛ́ è càn mùnì bə lwar ywẽ̀ dwã w pɔr; ǹ yə̀ be mánnɛ y vòm bə̀ la jú yé, ǹ súlí ń pə bɛ nɛ̃̌ bə m'e gu bə̀ nə̀-nyɛ̀lsɛ́. ²¹ Byinə shə́-èna wẽ́, ǹ nyǐ bə̀ yò gɔ-elũ èpòlò w wə; kaka yə̀ be mùrì yé, bə̀ gàndɛ́ yə̀ cì yé, bə̀ nə̀rh myɛ yə̀ fùrh yé. ²² Ǹ co tənə̀rh ǹdə́ dwə́ bə̀ jɔ̃̀ wa, ń zɛ̃̀ ń tə̀ tənèsé sə̀ wɔ bə̀ yala nɛ mɔ́, Eshəbɔ̃ pyɔ̌ Shəwɔɔnɛ tənà y e súlí Bashã pyɔ̌ Oge tənà y ń pə bɛ bə cìní. ²³ 23 Ǹ ce bə̀ byǎ bɛ́ pù bə jǐrh nánzhɔ̌ ǹdə dɛ̃̌-yi cã̀mə́sɔ̌rh ta, ń zɛ̃̀ ń ce bə b'e zù tənà y kɛ̀bɛ́ ǹ yà ǹ yò bə̀ nàmbala bɛ́ nɛ bə̀ bə̀ zhəl bə zwẽ bə cìní mú wẽ́. ²⁴ Bə̀ byǎ bɛ́ zù è wẽ́ bə zwẽ y bə cìní; Ǹ ce bə cìní tənà y lyì bí, Kanaã lyì bí, ǹ co bə̀myɛ́ ǹdə́ bə̀ pyǎ bɛ́ ǹdə́ tənà y dwə́ né bə̀ jɔ̃̀ wa, mùnì ga bə wɛ̀rhɛ́ bɛ ǹdə bə̀ gə́ n'ê yǎl nɛ́. ²⁵ Bə̀ zwẽ cɛmɛ nyɛ̀bɛ́ bə̀ lù byílsí dɛ̃̌dɛ̃̌ bə m'e kə́kɛ́lɛ́ nɛ mɔ́ e súlí cɛ kɛ̀bɛ́ è càn mɔ́; Bə̀ zwẽ jìrh sə̀ sú ǹdə́ nə̀cɛ̀ndɛ dwí gakó, zhǐlse sə̀ y'à kùwə̀ ǹdə́ də̀vɛ̃́-cèmé ǹdə́ Olyivyére e súlí cèmé nə̀ n'ê ce byǎ nə̀ y'à já dɛ̃́dɛ̃́ bə cìní; Bə̀ jú kùjú bə sú, bə nù, bə̀ jòm ǹdə́ wu-nyɔ̃̀ nánfɔ̀lɔ̀, ǹmyɛ́ wu-bɔ̀nɔ̀ w nánfɔ̀lɔ̀ w yilə. ²⁶ Sə ǹdə́ rə̀myɛ́ ga bə̀ cẽ bə̀ yə̀ ǹ nyí ni shɛ̀nɛ́, bə̀ twə́r k'ê tɛ̀nɛ́ ǹdə́ mɔ́ yé; bə̀ dwĩ̀ ǹ Nyə́ né pyépyé bə̀ kwã nɛ́. bə̀ gu ǹ nyì-zwennə bé bə̀ y'à wɔ bə̀ kwã nɛ́ bə̀ n'ê kúrh be bə̀ bə̀ k'a kwɛ̃̀ bə bə̀ ǹ sõ mó; sə bə̀ dó ǹdə́ dwə́ə́re nánfwààlɛ. ²⁷ Rə̀myɛ́ ce, ǹ co be bə̀ zwə̀ bé jɔ̃̀ wa, bə nwɛ̀nɛ̀ bɛ. Bə̀ zúzúnú w yi ní, bə̀ y'à n'ê búbwéé bə̀ ce mó, sə ǹmyɛ́ y'à nə́ ǹ zhì dɛ̃̌-yi w ǹ nyɛ̀ɛ̀, sə ǹ y'à nə́ ǹ pɛ bɛ zwennə bə̀ zwẽ be bə̀ zwə̀ bé jɔ̃̀ wa, ǹ wu-bɔ̀nɔ̀ w nánfɔ̀lɔ̀ w yilə. ²⁸ Sə bə̀ gə tú bə̀ nɔ bə̀ cìn yi ní, bə̀ y'a k'a zɛ̃̀ bə̀ n'ê wɛ̀rhɛ́ kɔn dɛ̀bɛ́ rə̀ wɔ́ lwɛlɛ ǹ yé né, ǹmyɛ y'a zɛ̃̀ ń yẽ̌ be bə̀ zwə̀ bé jɔ̃̀ w bə nwɛ̀nɛ̀ bɛ. Bə̀ y'a zɛ̃̀ bə k'e búbwéé bə ce mó, sə ǹmyɛ́ nə́ ǹ zhì dɛ̃̌-yi w ǹ nyɛ̀ɛ̀ bə̀ búbwéé yə́, sə ǹ zwẽ be twər nánzhɔ̌, ǹ wu-bɔ̀nɔ̀ w yilə. ²⁹ Ǹ yà ǹ wɔ bə̀ kwã nɛ́ ǹ nə́ ǹ kúrh bi bə̀ bə̀ k'a tó ǹ Nyí rí ni, sə bə̀myɛ́ y'à n'ê kùl bə̀ wun ní, bə̀ t'â shɛ̀nɛ́ bə̀ cili ǹ nyə́ né yé; bə̀ dó ǹ nyə́ né nyɛ̀bɛ́ numbyíní mə̌ s'e zwẽ mùnì e zə myə̌l mó. Bə̀ pyə́pyɛla nɛ́ cẽ zhĩĩ rí rə̀myɛ́ mɔ́ yò, bə jǐrh yó-kùùlì cìnə́; bə̀ yə̀ cili yé. ³⁰ 30 Ǹ pyɛ́nɛ́ ǹ cìn ǹdə́ bɛ byinə nánzhɔ̌; Ǹ zə ǹ éshìrhə́ y ń tó ǹ nyì-zwennə bé dɛnnɛ ń yə̀ bə̀ kwã nɛ́ ń kùrh be, sə bə̀ yə̀ cili yé. Rə̀myɛ́ ce ǹ co be tənə̀rh dwã dwə́ jɔ̃̀ wa. ³¹ Ǹ wu-bɔ̀nɔ̀ w nánfɔ̀lɔ̀ w yilə, ǹ yə̀ yẽ̌ bə ce bə jé tɛ̃́ lyə́m lyə́m yé, ǹ yə̀ ǹ kwã zə ń mə́ zǎ bɛ yé, bə̀ ǹ wɔ́ Yi rí tɛ̀bɛ́ rə̀ wɔ́ wu-bɔ̀nɔ̀ ǹdə́ nɔ̀nɔ̀-dǔr cə́bal. ³² Sə èlǎsɛ̃́, nə́ Yi, Yi rí tɛ̀bɛ́ rə̀ jàn rɛ́ já, rə̀ bə swɛ̃́ zhe mó, rə̀ mə̌ ǹdə́ nyɔ̀mɔ̀ mɔ́, rə̀ n'ê zhì rə̀ dɔbrɛ nyí rí ǹdə́ rə̀ nà yó mó, ǹ bə̀k'á nyǐ zúzúnú w kɔ̀bɔ́ gakó ò zɔ nə́ba mɔ́ ǹdə kɔn námpɔ́lɛ́ nɛ yé; zúzúnú w kɔ̀bɔ́ ò zɔ nə́myɛ̌ ǹdə́ nə́ pyǎ bɛ́ ǹdə́ nə́ yó-cìnə́ bé ǹdə́ nə́ vwĩ̀-zwə́lnə bé ǹdə́ nə́ nyì-zwennə bé ǹdə́ nə́ nàmbala bɛ́ e súlí dwí rí gakó mó, kɔn zhì Ashəri pyǎ bɛ́ yi ní e m'e yí zà mɔ́. ³³ Sə ǹmyɛ́ yàl cángá cə́bal kɔn dɛ̀bɛ́ gakó rə̀ zɔ nə́ba mɔ́ wẽ́, bə̀ ǹ twĩ̀ zhə̀n wẽ́, sə nə́myɛ̌ twĩ̀ ǹdə́ wu-bárhɛ́. ³⁴ È gə wɔ́ nə́ pyǎ bɛ́ ǹdə́ nə́ yó-cìnə́ bé ǹdə́ nə́ vwĩ̀-zwə́lnə bé e súlí nə́ nàmbala bɛ́ myɛ̌ yilə, bə̀ yə̀ twĩ̀ ǹdə ǹ Nyí rí gə́ n'ê byili ní yé, bə̀ súlí bə̀ yə̀ ǹ nyə́ né ǹdə́ ǹ cúcú mú ǹ yà ǹ nə́ ǹ pɛ bɛ ǹ ká ǹ bwérhé mó nyǐ ǹdə kɔn ta yé. ³⁵ Sə bə̀ pyɛ̀lɛ̀ rɛ́ jú yi ní e súlí nə̀cɛ̀ndɛ nánzhəzhɔ̌ w kɔ̀bɔ́ ǹ yà ǹ pɔ bɛ mɔ́, tənà y è pyě è la e jà è cɛ y càn mɔ́ ǹ yà n cĩ́ bə̀ yé né mó wẽ́, bə̀myɛ́ yə̀ mó cèrhé yé, bə súlí bə̀ yə̀ bə̀ tùm-bəywààlɛ́ nɛ yẽ̌ yé. ³⁶ Rə̀myɛ́ ce, nyǐ nə́ba nə́ wɔ́ yómə́ zà, nə́ wɔ́ yómə́ tənà y kɛ̀bɛ́ ǹ pɔ nə́ nàmbala bɛ́ nɛ mùnì bə jí è cɛ y byǎ bɛ́ ǹdə́ è nə̀cɛ̀ndɛ́ mɔ́! ³⁷ Nə́ yə̀-bəlwàálɛ́ ce cɛ y byǎ bɛ́ nánzhəzhɔ̌ w wɔ́ pyǎ bɛ́ byɛ̀bɛ́ ǹ ce bə̀ cǐ nə́ba mɔ́ nyǎn; Bə̀ zhe ŋwɔ̀nɔ́ nə́myɛ̌ ǹdə́ nə́ vwàmá nɛ́ yó w bə̀ n'ê wɛ̀rhɛ́ ǹdə bə̀ gə́ n'ê yǎl nɛ́; sə nə́myɛ̌ wɔ zúzúnú nánfɔ̀lɔ̀ wẽ́.» ³⁸ Wɔ́ rǝ̀myɛ́ gakó è ce, nǝ́ dɔbrɛ, nǝ́ kɛ̃ rɛ sɛ́bɛ́ yó, nǝ́ yó-cìnǝ́ ǹdǝ́ Levyitibá ǹdǝ́ nǝ́ vwĩ̀-zwǝ́lnǝ bé shɛ̀nɛ́ bǝ cĩ́ bǝ̀ jɛ̃̀ nɛ́.