¹ Lyì bí gakó bə̀ dwã yó, ǹdə lò mə̀dù ta, Nàná bɛ́ bwə̀rə̀ y yé né, bə zɛ̃̀ bə wɔ̀ Yi nyə́ né byilnə Esədəraasɛ nɛ, bə̀ ń kwě Muyiisi Nyə́ né nyɛ̀bɛ́ Cinu Yi yà ń tó ń dɛnnɛ n pə Esərayɛl lyì bí ni mú sɛ́bɛ́ rɛ́ n mə n bà. ² Vwĩ̀-zwə́lnə Esədəraasɛ kwè Muyiisi Nyə́ né sɛ́bɛ́ rɛ́ n mə n bə̀ lyì bí bə̀ y'à tú dwã yó mó yé né: è y'à wɔ́ bala ǹdə́ kana e súlí lyì bí byɛ̀bɛ́ gakó bə̀ y'à wɔ̌ kɔn dɛ̀bɛ́ bə̀ n'ê cili mú kùr bə̀ la nyɔ̀ɔ̀ mɔ́. È yàl cànsɛ̀ shàlpyɛ̀ nyǎ y dɛ̃ nã́yéé ré. ³ N zhì jàà y kɛ̀bɛ́ è wɔ Nàná bɛ́ bwə̀rə̀ y yé y w mó, bala bɛ́ ǹdə́ kana bɛ́ e súlí byɛ̀bɛ́ bə̀ y'à wɔ̌ bə̀ m'a nyɛ̀ɛ̀ kɔn dɛ̀bɛ́ bə̀ n'ê cili mú kùr mú yé né, n kàrmə̀ sɛ́bɛ́ rɛ́ kɔn zhì nəkɔkɔ́lɛ́ nɛ e m'e yí nə̀nyɛ́nɛ́ cəcəl wə. Lyì bí gakó y'à pyèrhè bə̀ zhã̌ bə̀ n'ê cili Nyə́ né sɛ́bɛ́ rɛ́ zɔ̀mà nɛ́ bə̀ y'à n'ê kàrmə̀ mɔ́. ⁴ Yi nyə́ né byilnə Esədəraasɛ yà ń jìl ń zhǐ dɛ̃̌ dǎr byúlú bə̀ y'à fwar rə̀myɛ́ mɔ́ yil mú yó. Macəca ǹdə́ Shəma ǹdə́ Anaya ǹdə́ Urəya ǹdə́ Yələca e súlí Maasəya y'à zhǐ ń jə̀-gwã̀ sõ, Pədaya, Myəkayəə ǹdə́ Maləca ǹdə́ Ashuumi ǹdə́ Ashəbadana ǹdə́ Zakarɛ e súlí Məshəlam zɛ̃̀ bə̀ zhǐ ń jə̀-jĩ́ sõ. ⁵ Esədəraasɛ yà ń zɛ̃̀ ń wɔ dɛ̃̌dɛ̃̌ du lyì bí gakó. Ń gə́ pul sɛ́bɛ́ rɛ́ lyì bí gakó nə mɔ bə j'a zɛ̃̀ bə̀ zhǐ dɛ̃̌ bə̀ nə̀-pyìlə̀ yó. ⁶ Esədəraasɛ zɛ̃̀ n cèrhé Cinu Yi, Yi rí tɛ̀bɛ́ rə̀ wɔ́ jàn cə́bal mɔ́, lyì bí gakó zɛ̃̀ bə zhẽ̌ bə̀ jɛ̀rh dɛ̃̌ bə kwɛ̃́ ń nyí ni bə wɔ̀: «Amɛ̀n! Amɛ̀n!». Bə zɛ̃̀ bə lwəl tɛ̃́ bə wùlì Cinu Yi yé né, bə tu bə zə bə̀ yə́rh bə pú tɛ̃́. ⁷ Lyì bí gə́ zɛ̃̀ bə̀ zhǐ dɛ̃̌ yi ní, Levyi dwí rí lyì bí Zhozwe ǹdə́ Bəni ǹdə́ Sərəbya ǹdə́ Yəmiini ǹdə́ Akuubi ǹdə́ Shəbətəyi ǹdə́ Oja ǹdə́ Maasəya ǹdə́ Kələta ǹdə́ Azarəya ǹdə́ Yɔzabaadɛ ǹdə́ Aanã e súlí Pəlaya y'à n'ê ce bə̀ swí Nyə́ né kùrə̀. ⁸ Bə̀ y'à n'ê kàrmə̀ Yi Nyə́ né sɛ́bɛ́ rɛ́ cɛ̀nɛ̀ cɛ̀nɛ̀ mùnì bə nyɛ̀ɛ̀ nə̀ kùrə̀, bə súlí bə̀ n'ê byili kɔn dɛ̀bɛ́ bə̀ y'à n'ê kàrmə̀ mɔ́ kùrə̀. ⁹ Lyì bí gakó gə́ nyɛ̀ɛ̀ Nyə́ né sɛ́bɛ́ rɛ́ zɔ̀mà nɛ́ bə zɛ̃̀ bə̀ n'ê kúrhə́. Rə̀myɛ́ yó, tənà y kə̀kàlà y yó-cə́bal Neemyi ǹdə́ vwĩ̀-zwə́lnə Esədəraasɛ ń súlí ń wɔ́ Yi nyə́ né byilnə, e súlí Levyi dwí rí lyì bí bə̀ y'à n'ê cĩ́ zɔ̀mà nɛ́ kùr lyì bí ni mú, zɛ̃̀ bə wɔ̀ bə̀ gakó ne: «Zà dɛ̃ rɛ́ wɔ́ Cinu á Yi rí dɛ̃. Á bə̀k'á ce á wun zhìlì yé, á bə̀k'á kúrh yé!». ¹⁰ N wɔ̀ bɛ: «Zhəl-nə, á jí kùjú-ènyɔ̀lɔ̀, nyɔ́-na kɔ̀-nyɔ̀ɔ̀mà mɔ̀bɔ́ mə̀ nyɛ̀, sə á pə cəl bə vò bə pə lò mɔ̀bɔ́ ń yə̀ ŋwɛ̀nɛ́ n tɛnɛ mɔ́ nɛ, bə̀ zà dɛ̃ rɛ́ wɔ́ nə́ Cinu Yi rí dɛ̃. Á bə̀k'á ce á wun zhìlì yé, bə̀ wu-nyɔ̃̀ w kɔ̀bɔ́ ò n'ô shí Cinu sõ mó, wɔ́ òmyɛ́ ò wɔ́ á jàn rɛ́.» ¹¹ Levyi dwí rí lyì bí y'à zɛ̃̀ bə̀ n'ê swẽ́ lyì bí wun ni bə̀ zhe: «Shĩ̌-nə á nyí, bə̀ zà dɛ̃ rɛ́ wɔ́ Yi dɛ̃. Á bə̀k'á ce á wun zhìlì yé!» ¹² Rə̀myɛ́ yó, dwí rí lyì bí púlə́púlə́ lyɛ̃ bə̀ la bə vò bə jí sə bə nyɔ̀, bə tə̀ ǹdə́ lyì, sə bə wɛ̀rhɛ́ wu-nyɔ̃̀ nánfɔ̀lɔ̀, bə̀ bə̀ y'à nyɛ̀ɛ̀ zɔ̀mà nɛ́ bə̀ y'à byili bi mú kùrə̀. ¹³ Dwã nə̀lyè dɛ̃ rɛ́ yù wə, Esərayɛl púlə́púlə́ dwə́ né yó-cìnə́ bé ǹdə́ vwĩ̀-zwə́lnə bé e súlí Levyi dwí rí lyì bí tú dwã yó Yi nyə́ né byilnə Esədəraasɛ sõ mùnì ga bə pyà bə sú Nyə́ né zɔ̀mà nɛ́ kùrə̀. ¹⁴ Bə̀ nɔ rə̀ kɛ̃ Nyə́ né wẽ́ bə̀ Cinu Yi yà ń tó Muyiisi dɛnnɛ n pə nyí bə̀ Esərayɛl lyì byǎ bɛ́ mə̌ sə bə yə̀ kwə̀ə́rhe wẽ́ cànsɛ̀ shàlpyɛ̀ nyǎ y címsí jú yi ní; ¹⁵ bə̀ bə̀ mə̌ sə bə bwə̀l re bə byili bə̀ cɛmɛ nɛ́ ǹdə́ Zhərəzalɛm nɛ́, bə wɔ̀: «Zhəl-nə pyàr rɛ́ w á zə olyivyé kɛ̀bɛ́ bə̀ zhele ǹdə́ kɛ̀bɛ́ è púrh tɛ̃́ è cìn ni ga jɛ̀rh ǹdə́ myiirəti jɛ̀rh ǹdə́ kwə̌rh jɛ̀rh e súlí cèmé né nyɛ̀bɛ́ nə̀ vɔr rɛ́ pyi mú jɛ̀rh á m'á b'ǎ pú kwə̀ə́rhe, ǹdə rə̀ gə́ kɛ̃ nɛ́.» ¹⁶ Rə̀myɛ yó, dwí rí shə́r rə vò rə zə wẽ̀ tɛ̀bɛ́ rə̀ la m'e pú rə̀ kwə̀ə́rhé mó rə m'e kwɛ̃̀ rə bà, lyì jàlà bə̀ lyarha nɛ́ wa, jàlà bə̀ sə̀pwà kǎlsɛ́ wun ní wẽ́, jàlà Yi jì y kǎlsɛ́ wun ní wẽ́, jàlà myɛ Nàná bɛ́ bwə̀rə̀ y yé y w ǹdə́ Efərəyim bwə̀rə̀ y yé y wə. ¹⁷ Lyì bí byɛ̀bɛ́ gakó bə̀ shí yómə́-jè bə kwɛ̃̀ bə bə̀, bə̀ y'à tú dwã yó mó pú kwə̀ə́rhe bə zɛ̃̀ bə zù rə̀ wẽ́. E jà kɔn zhì Nuuni byǐ Zhozwe yi ní ga e m'e yí zà, Esərayɛl lyì byǎ bɛ́ y'à gwẽ̌ yə̀ rə̀myɛ́ mɔ́ wɛ̀rhɛ́ yé. È yàl wu-nyɔ̃̀ nánfɔ̀lɔ̀ dɛ̃́dɛ̃́. ¹⁸ Címsí dwã nɛ́ gakó bə̀ kàrmə̀ Yi Nyə́ né sɛ́bɛ́ rɛ́ dɛ̃ gakó, sə̀ dɛ̃ nã́yéé ré e m'e yí sə̀ dɛ̃ nánkwɛɛ́ rɛ́. Címsí jú dwã nyàlpyɛ̀, sə sə̀ dwã lyɛlɛ dɛ̃ rɛ́, zhɔ̌ kúlí nánfwɛ̀lɛ̀ jòm, ǹdə nyí rí gə́ y'à n'ê byili ní.