¹ Yi rí rə̀myɛ́ wẽ́, bə̀ kàrmə̀ Muyiisi sɛ́bɛ́ rɛ́ dwí rí gakó yírh wə, sə bə̀ púrí bə̀ kɛ̃ rə̀ wẽ́ bə̀ Amɔ̃ byǐ ǹdə́ Mɔwaabɛ byǐ bə mə̌ sə n zù byɛ̀bɛ́ bə̀ tú dwã yó Yi còrhó yil mú wẽ́ gaga yé; ² bə̀ bə̀ yə̀ twí bə jəl Esərayɛl lyì byǎ bɛ́ ǹdə́ búrú ǹdə́ nɛ̃̌ yé. E súlí myɛ, Mɔwaabɛ lyì bí y'à kɔ̀n Balaam mùnì n bwəl lwɛlɛ n pə bɛ; sə nə́ Yi rí ce bwelé námməlwɛ̀lɛ́ y jǐrh bwələ́ náàcɛ̀nɛ́. ³ Sə bə̀ gə́ nyɛ̀ɛ̀ nyí rí rə̀myɛ́, bə j'a vùr lò mɔ̀bɔ́ ń jal gùlí ǹdə́ jal dõa gakó Esərayɛl lyì byǎ bɛ́ cəcəl wə. ⁴ Sə wɔ́ vwĩ̀-zwə́lnə Elyəshiibi bə̀ y'à ce ń jɛ̀nɛ̀ ń nə́ nyǐ nə́ Yi jì y jǐnsí yò; ń yà ń wɔ́ Tɔbya dwí lò; ⁵ ń yà ń tɛnɛ jìní nánfwɛ̀lɛ̀ n pɔ̃. Shãã ga wɔ́ jìní y èmyɛ́ mɔ́ wẽ́ bə̀ y'à n'ê ce vɔ̀lɔ́ pansɛ́ ǹdə́ ãsã́ y ǹdə́ Yi jì y wẽ̀ ré, e súlí bə̀lɛ́ y ǹdə́ də̀vɛ̃́ nándwə̃̀ y ǹdə́ nwə̃̌ y kùr ré rə̀dù rə̀dù y shí gakó yó w mó, bə̀ y'à mə̌ sə bə pə Levyi dwí rí lyì bí e súlí, núnnə bé ǹdə́ bwə̀rsé dɛ̀nna bɛ́ nɛ mɔ́ e súlí kɔn rɛ́ tɛ̀bɛ́ bə̀ y'à n'ê vùr vwĩ̀-zwə́lnə bé yil mú myɛ. ⁶ Rə̀myɛ́ mɔ́ gakó y'à n'ê wɛ̀rhɛ́ ǹdə́ à y'à tɛ̀nɛ́ Zhərəzalɛm nɛ́ yé, bə̀ à y'à k'a kwɛ̃̀ à bə̀ Babyəlɔnɛ pyɔ̌ Artazɛrzɛɛsɛ sõ ń pyɛ̀lɛ̀ rɛ́ jú byinə shə́-ètɔ̀ ǹdə́ nə̀lyè byin rí. Sə dwã màngɛlɛ́ gə́ lyɛ̃ kwã nɛ́, à lwə̀l sɔ́má pyɔ̌ nɛ. ⁷ Sə à kwɛ̃̀ a bə̀ Zhərəzalɛm; rə̀myɛ́ yó à lwar lwɛlɛ rɛ́ tɛ̀bɛ́ Elyəshiibi wɛ̀rhɛ́ mɔ́ gə́ mə̌ nɛ́ ma, jìní y kɛ̀bɛ́ ń tɛnɛ Yi jì y yé y w n pə Tɔbya nɛ mɔ́ yilə. ⁸ À lyìm yù dɛ̃́dɛ̃́ rə̀myɛ́ mɔ́ yilə, a zɛ̃̀ a ce bə vùr Tɔbya wẽ̀ ré jì w bə ló pwẽ̀ ne. ⁹ A zɛ̃̀ a pə nyí bə̀ bə̀ ce jǐnsí yə̀ zwẽ́zwẽ́. Sə rə̀myɛ́ kwã nɛ́, a k'a ce bə zə Yi jì y wẽ̀ ré, pansɛ́ ǹdə́ ãsã́ y bə̀ b'e ce né. ¹⁰ Bə̀ súlí bə byili ni myɛ bə̀ bə̀ y'à t'â pɛ Levyi dwí rí lyì bí ni bə̀ cəl ré yé, rə̀myɛ́ ce Levyi dwí rí lyì bí ǹdə́ núnnə bé y'à n'ê twĩ̀ tum rí mú y'à dùr, lò gakó vò ń cɛ y wa. ¹¹ À ju bù-kárna bɛ́ búlə́, a zɛ̃̀ a wɔ̀ bɛ: «Byè yil á k'á t'á cili Yi jì y sõ?» A zɛ̃̀ a k'a cĩ́ Levyi dwí rí lyì bí ǹdə́ núnnə bé dwã yó a ce lò gakó ká n kwè ń tum rí. ¹² Rə̀myɛ́ yó Zhəda lyì bí gakó zɔ bə̀lɛ́ y ǹdə́ də̀vɛ̃́ nándwə̃̀ y e súlí nwə̃̀ y kùr ré rə̀dù rə̀dù y shí gakó yó w mó bə m'e bə̀ bə ce rə̀ cṹ jààsɛ́ wa. ¹³ A zɛ̃̀ a pə nyí bə̀ bə̀ ce vwĩ̀-zwə́lnə Shɛlɛmya ǹdə́ sá-kanna Sadɔɔkɛ ǹdə́ Levyi dwí rí lò mə̀dù Pədaya yìlì jààsɛ́ sə̀myɛ́ nɛ; sə Zəkuuri byǐ Anã, Matanya nɔ̃̌ wá, sɛ̃ bɛ, bə̀ bə̀ y'à n'ê nyǐ bi ǹdə́ zhə̀n cìnə́ ta. Wɔ́ bə̀myɛ́ bə̀ y'à mə̌ sə bə tə̀ rɛ bə pə bə̀ da-byǎ bɛ́ nɛ. ¹⁴ À Yi, lyǐrh à yò rə̀myɛ́ mɔ́ yilə, bə̀ k'á swě zhə̀n tɛ̀bɛ́ à m'a twĩ̀ à Yi rí jì y yil a súlí a m'a twĩ̀ ń tum rí yil mú yò yé. ¹⁵ Yi rí rə̀myɛ́ mɔ́ wẽ́, Zhəda tənà y wa, à nɔ lyì bə̀ y'à n'ê pyárh də̀vɛ̃́-cèmé byǎ nə̀ pyárh jààsɛ́ w shìrhə́ y dɛ̃ rɛ́ yù wə; bə̀ dwã y'à n'ê pwà bə̀ jíjí cílə́ né, bə̀ n'ê zhĩ də̀vɛ̃́ ǹdə́ də̀vɛ̃́-cèmé byǎ ǹdə́ épyìlə́ e súlí zhĩĩ dwí gakó, bə̀ bə̀nesé ne bə̀ m'ê twí Zhərəzalɛm shìrhə́ dɛ̃ rɛ́ yù wə; à wə̀l be bə̀ bə̀ bə̀ wẽ̀ ré dɔ̌l shìrhə́ y dɛ̃ rɛ́ yù w yé. ¹⁶ 16 Tiiri lyì bí byɛ̀bɛ́ bə̀ y'à wɔ cɔ w mɔ́ y'à n'ê ce émɔ̌rh ǹdə́ wò-yə̀ə̀re dwí gakó twí shìrhə́ y dɛ̃ rɛ́ yù wə, bə zɛ̃̀ bə̀ n'ê yè re ǹdə́ Zhərəzalɛm ǹdə́ Zhəda lyì bí. ¹⁷ À ju Zhəda lyì-fwààlɛ́ búlə́, a zɛ̃̀ a wɔ̀ bɛ: «Bə̀kɔ́n tum-bəyɔ̀lɔ̀ á n'á twĩ̀ èta mɔ́ á m'á t'á nyàm shìrhə́ dɛ̃ rɛ́? ¹⁸ È də̀ èta á nàmbala bɛ́ wɛ̀rhɛ́ nɛ́ nà? Wɔ́ rə̀myɛ́ rə̀ ce, nə́ Yi rí zɛ̃̀ rə̀ ce lwɛlɛ rɛ́ tɛ̀bɛ́ gakó pú nə́myɛ̌ ǹdə́ nə́ cɔ w ga. Sə ámyɛ́ gə́ zɛ̃̀ á t'á nyàm shìrhə́ y dɛ̃ rɛ́, á n'á pɔ̀lɛ̀ Yi lyim rí rə̀ n'ê yì Esərayɛl lyì byǎ bɛ́ mɔ́. ¹⁹ Rə̀myɛ́ yó, à j'a pə nyí bə̀ bə̀ pyi Zhərəzalɛm bwə̀ə̀lé, cɛ y gə tú è n'ê yìì yi ní, ǹdə́ shìrhə́ y dɛ̃ rɛ́ gwẽ̌ yə̀ kùr ji yé; sə bə pul re rə̀ lyɔ̃ mɔ́ kwã nɛ́ dúdú. À cĩ́ à tùntùnnə bé jàlà bwə̀rsé nyə́ ne mùnì zhĩĩ rə̀dù ga myɛ bə̀k'a zù cɔ w w shìrhə́ y dɛ̃ rɛ́ yù w yé. ²⁰ Sə rə̀myɛ́ ce, twər rə̀dù ráá twər rə̀lyè wò-yə̀ə̀ré dwí gakó zhízhílnə bé ǹdə́ dɔ̌lna bɛ́ dwí gakó mɛ̃ pwẽ̀ ne bə zɔ̃̀, bə̀ yə̀ Zhərəzalɛm nɛ́ zwɛ̃̀ yé. ²¹ À lyəlyɔ bɛ jə̀fɔ́lɛ́ a súlí a wɔ̀ bɛ: «Byè yil á n'á zwɛ̃̀ byílí y kùr wə? Á gə bwérhé à m'a ce bə twĩ̀ ába tum!» Kɔn zhì dɛ̃ rɛ́ rə̀myɛ́ mɔ́ bə̀ k'é yə̀ twí shìrhə́ y dɛ̃ yù w yé. ²² A zɛ̃̀ a wɔ̀ Levyi dwí rí lyì bí ni bə̀ bə̀ tɛnɛ bə̀ cìn bə yə̀ wárhgáá sə bə b'e yìlì bwə̀rsé mùnì ga bə ce shìrhə́ y dɛ̃ rɛ́ yə̀ Yi dɛ̃. Rə̀myɛ́ súlí rə ce, lyǐrh à yò à Yi; ǹ wu-bɔ̀nɔ̀ nánfɔ̀lɔ̀ w yilə, dǔr à nɔ̀nɔ̀! ²³ Wɔ́ dwã nɛ́ nə̀myɛ́ myɛ wẽ́ à lwar bə̀ Zhwifubá bə̀ y'à jú Ashədɔɔdɛ ǹdə́ Amɔ̃ e súlí Mɔwaabɛ lyì bə̀kwá; ²⁴ Bə̀ byǎ bɛ́ kə̀kàlà y y'à n'ê zɔ̀m Ashədɔɔdɛ dwí rí zɔ̀mà nɛ́, bə̀ dwã bɛ́ n'ê zɔ̀m dwí rí tɛ̀bɛ́ ráá rə̀ dõ tɛ̀bɛ́ zɔ̀mà nɛ́, sə bə̀ mə̀dù ga myɛ yà ń ká ń wàr ń nə́ ń zɔ̀m Zhwifubá dwí rí zɔ̀mà nɛ́ yé. ²⁵ 25 À ju bi búlə́, a bwəl lwɛlɛ a pə bɛ; a mà bala jàlà a súlí a mǔr bə̀ ywə́rh; a zɛ̃̀ a ce bə zə Yi yil ré bə m'e bwəl nyí ǹdə́ kɔn rɛ́ tɛ̀bɛ́ à wə̀l be mó, bə wɔ̀: «Bə̀-na á bə̀kwá bɛ́ bə̀ byǎ nɛ pə bə jí yé, sə á byǎ bɛ́ ǹdə́ á cìcì mú bə̀k'á jí bə̀ bə̀kwá bɛ́ yé!» ²⁶ È də̀ rə̀myɛ́ rə̀ ce Esərayɛl pyɔ̌ Saləmɔ mə n wɛ̀rhɛ́ yə̀-bəlɔ̀lɔ́ nà? Dwə́ né nánzhəzhɔ̌ w gakó cəcəl wə, pyɔ̌ yə̀ né yàl ǹdə ń ta yé. Ń Yi rí y'à só mo, rə zɛ̃̀ rə cír mu ń wɔ́ Esərayɛl púlə́púlə́ pyɔ̌. E jà wɔ́ ńmyɛ̌ dwə́ né dwã bɛ́ kana bɛ́ cìrh bə ce yə̀-bəlɔ̀lɔ́ w wẽ́! ²⁷ Sə ámyɛ n'á yǎl bə̀ bə̀ lwar bə̀ ámyɛ n'á dwé nə́ Yi rí ni dɛ̃́dɛ̃́ á gə́ yə̀ á nà yó zhì ǹdə́ rɛ, á m'a jí dwə́ né dwã bɛ́ bə̀kwá bɛ́ mɔ́?» ²⁸ Yɔyada byǐ mə̀dù, vwĩ̀-zwə́lnə náncɛ Elyəshiibi nɔ̃̌, yà ń wɔ́ Orɔ̃ lyì bal Sambalaatɛ cə́m-bal. A jì mu à nyí ni a ce kwã nɛ́ pyépyé! ²⁹ Lyǐrh bə̀ yò ń pə bɛ còrhò-tum, à Yi, bə̀ bə̀ ce vwĩ̀-zwə́lnə bé tum rí zɛ̃̀ rə̀ zhe jìndi, rə̀myɛ́ ǹdə́ dɔbrɛ́ ǹ zɔ ǹdə́ vwĩ̀-zwə́lnə bé ǹdə́ Levyi dwí rí lyì bí mú! ³⁰ À vùr dwí dõ lò gakó Esərayɛl lyì byǎ bɛ́ wẽ́ a cĩ́ kwã nɛ́ a yẽ̌ be zwẽ́zwẽ́, a zɛ̃̀ a ce vwĩ̀-zwə́lnə bé ǹdə́ Levyi dwí rí lyì bí tumə né k'a cĩ́ kùrə̀, lò gakó ká n twĩ̀ ń tum rí; ³¹ À súlí a ce bə̀ k'â n'ê pɛ dǎr rɛ́ yi rí tɛ̀bɛ́ bə̀ y'à cír mú wə, e súlí wẽ̀ ré byǎ nã́yə́ə́ bé. Lyǐrh à yò, à Yi, sə zə nɛ ǹdə́ wu-bɔ̀nɔ̀!