¹ Nyǐ kɔn dɛ̀bɛ́ Akalya byǐ Neemyi byili mú: Byinə shí-èlyè byin rí, Cəsələ cànà y wa, à gə́ y'à wɔ Suuzi, pyɔ̌-dǒ w yi ní, ² Anəni à da-byǎ bɛ́ mə̀dù, shí Zhəda, ńmyɛ̌ ǹdə́ bala màngɛlɛ́ bə bà. A zɛ̃̀ a bwə̀rh be Zhwifubá byɛ̀bɛ́ bə̀ lú mú, bə̀ shí yómə́-jè bə̀ yírhə́ gwẽ̌ ŋwɛ́nɛ́ mɔ́ e súlí Zhərəzalɛm yò. ³ Bə̀ lyár nɛ, bə wɔ̀: «Byɛ̀bɛ́ bə̀ shí yómə́-jè kùr ré, tənà y nyí rí w gàà mɔ́, wɔ zúzúnú nánfɔ̀lɔ̀ ǹdə́ cìzhìl nánfɔ̀lɔ̀ wẽ́; Zhərəzalɛm cɔ w byílí y pwə́r pwə́r kókó, ò bwə̀ə̀lé jí myǐn.» ⁴ À gə́ nyɛ̀ɛ̀ zɔ̀mà nɛ́ nə̀myɛ́, à jòm tɛ̃́, a kúrh, sə à yàl wu-zhùlù wẽ́ dwã nánzhɔ̌. À súlí a lyẽ à nyí, a lwə̀l dɛ̃̌ Yi rí ni. ⁵ À yòwə̀: «Aa! Cinu, dɛ̃̌ Yi, Yi rí tɛ̀bɛ́ rə̀ zhe jàn bə̀ súlí bə̀ n'ê nyàm rɛ́ mɔ́, rə̀ n'ê zhì rə̀ dɔbrɛ́ ǹdə́ rə̀ wu-bɔ̀nɔ̀ w nà y yó ǹdə́ lyì bí byɛ̀bɛ́ bə̀ só re bə zɛ̃̀ bə súlí bə̀ n'ê zwẽ rə̀ nyə́ né mó, ⁶ à n'â lwə̀l mó bə̀ ǹ pyèrhè ǹ zhɛ̃̌ sə́ púr ǹ yírhə́, ń mə́ cili ǹ tùntùnnə mó lwə̌l mó. Yi rí tɛ̀bɛ́ wẽ́, nə̀nyɔ́nɔ́ ǹdə́ cəcɛ̃ ga, à n'â lwə̀l mó ǹ tùntùnnə bé Esərayɛl lyì byǎ bɛ́ yilə: à n'â tùrhì mú Esərayɛl lyì byǎ bɛ́ yə̀-bəlwàálɛ́ nə́ m'é dó mó mó. Àmyɛ́ cìcì mú ǹdə́ à nàmbala bɛ́ ga dówə́. ⁷ Nə́ dó mó zhə̀n zhə̀na, nə́ yə̀ ǹ nyə́ né ǹdə́ ǹ byilu mú e súlí ǹ lùl-e-púrsí ǹ pɔ ǹ nyì-zwennə Muyiisi ni mú zwẽ yé. ⁸ À n'â lwə̀l mó bə̀ ǹ lyǐrh ǹ zɔ̀mɛ̀ rɛ́ ǹ ce ǹ tùntùnnə Muyiisi byili mú yò, ǹ wə̀lə̀: ‹Ámyɛ̌ gə yə̀ á nà y yó zhì, à m'a làà ába dwə́ né dwã bɛ́ cəcəl wə. ⁹ Sa á gə kwɛ̃̀ á k'á bə̀ à sono, á zwẽ à nyə́ né, á wɛ̀rhɛ́ ǹdə nə̀ gə́ n'ê byili ní, má á lyì bí byɛ̀bɛ́ bə̀ pwà bə vò m'e yómə́-jè mó gə wɔ cə-yala gakó dɛ̃̌-yi w myɛ, à m'a k'a cĩ́ bi dwã yó, a zɛ̃̀ a zə bɛ a bə̀ jàà y kɛ̀bɛ́ à cír è la yə̀ àmyɛ́ yil ré còrhó jàà y mɔ́ wẽ́.› ¹⁰ 10 Bə̀ wɔ́ ǹ tùntùnnə bé byɛ̀bɛ́ ǹdə́ ǹ dwí rí tɛ̀bɛ́ ǹ zwẽ ǹdə́ ǹ jàn rɛ́ nánfɔ̀lɔ̀ w e súlí ǹdə́ ǹ jɛ̃̀ y jàn rɛ́ mɔ́. ¹¹ À n'â lwə̀l mó, Yó-cə́bal, pyèrhè ǹ zhɛ̃̌ ń cili ǹ tùntùnnə mó lwə̌l mó; cili ǹ tùntùnnə bé bə̀ só mó nyám mɔ́ lwə̌l mó. À n'â lwə̀l mó bə̀ kɔn dɛ̀bɛ́ ǹ tùntùnnə mó la wɔ̀rhɔ́ zà mɔ́ zə kùrə̀, sə́ súlí ń ce bal mɔ́ mɔ̀bɔ́ zwẽ mo ǹdə́ nɔ̀nɔ̀-dǔr!» Rə̀myɛ́ yi ní ǹdə́ wɔ́ e pə sɛ̃́ pyɔ̌ nɛ è y'à wɔ́ à tum à y'à n'â twĩ̀.