koussoube-marc-lee_mrk_text

Kǝ̀kàl-fwɛ̀lɛ̀ 1

¹ Yò-ècɔ̀nɔ̀ nyí rí rǝ̀ n'ê zɔ̀m Yezu Kristǝ yò mó kùr-ju. ² Bǝ̀ y'à kɛ̃ Yi-nyì-zwennǝ Ezǝyi sɛ́bɛ́ rɛ́ wẽ́ bǝ̀ Yi wòwǝ̀: Nyǐ à n'â twĩ̀ à tùntúm ń la yǝ̀ ǹ yé né, n kwɛrhɛ ǹ sɔ́má yá. ³ Cǝl n'ê bwǝ̀l go-elũ èpòlò wǝ, rǝ̀ zhe: Kwɛrhɛ-na Cǐnnǝ mó sɔ́má yá, s'á wɛ̀rhɛ́ sǝ-byǐsí sǝ yǝ̀ cángá á pɔ̃. ⁴ Lò mǝ̀dù ń yà ń tú gɔ-elũ èpòlò wǝ, ń yíl Zhã: Ń yà ń nǝ́ ń bwǝ̀l ń byili lyì bí ni, bǝ̀ bǝ̀ pyìrhí bǝ̀ wun, bǝ mɔ́lɛ́ bɛ nɛ̃̌ wa, mùnì ga Yi pɛ bɛ́ bǝ̀ yǝ̀-bǝlwàálɛ́ sǔbri. Sǝ ń yà ń nǝ́ ń mɔ́lɛ́ bɛ nɛ̃̌ wa: ⁵ Zhide tǝnà y púlǝ́púlǝ́ lyì bí y'à n'ê twí ń sono, bǝ̀ y'à n'ê byili bǝ̀ dwǝ́ǝ́ré. Zhã zɛ̃̀ n mɔ́lɛ́ bɛ Zhɔdɛ̃ bwǐ y nɛ̃̌ mɔ́ wa. ⁶ Zhã kàmǝ̀-zwǐ y ń yà ń zù mú y'à wɔ́ yómó kur bǝ̀ y'à m'e sɔ̃̀ yà, n zǝ cã̌-tɔ̀nɔ̀ n mǝ n lyẽ yǝ. Sǝsɛ̀mɛ̀ ǹdǝ́ gɔ-tùr rǝ̀ y'à wɔ́ ń kùkú, ⁷ Ń yà ń nǝ́ ń bwǝ̀l ń byili lyì-zhǎ bɛ́ nɛ ń zhe: Nyǐ-nǝ lò ŋwɛ́nɛ́ kwã nɛ́ ń bànà, ń du àmyɛ́. À yǝ̀ yírh swí s'a kó tɛ̃́ a lwǝ̌r ń nǝ̀cìlǝ̀ né nyínsí myɛ cìcì yé. ⁸ Ámyɛ́ wɔ́ nɛ̃̌ w à n'â mɔ́lɛ́ ába nɛ́, sǝ ńmyɛ̌ wɔ́ Eshirhǝ y wẽ́ ń la ába nɛ́ mɔ́lɔ́. ⁹ Dwã nɛ́ nǝ̀myɛ́ wẽ́, Yezu shí Gǝlile tǝnà y cɔ w bǝ̀ n'ê byẽ̀ bǝ̀ Nazarɛtɛ mɔ́ w n bǝ̀ Zhɔrdɛ̃ bwǐ y yó. Zhã mɔ́lɛ́ mɔ́ Zhɔrd:ẽ bwǐ y nɛ̃̌ mó wẽ́. ¹⁰ Yezu gǝ́ shí nɛ̃̌ mɔ́ w ń nǝ́ ń dwi yi ní, n nǝ dɛ̃̌ yi rí rǝ̀ pul, n nǝ Eshirhǝ Náàcɛ̀nɛ́ è nyɛ̌ ǹdǝ épwéné ta, è n'ê swé ń yó wǝ, ¹¹ n zɛ̃̀ n nyɛ̀ɛ̀ cǝl rǝ̀ shí dɛ̃̌ rǝ wɔ̀: Ǹ wɔ́ à Byì-sónó. À só mó dɛ̃́dɛ̃́. ¹² Rǝ̀myɛ́ kwã nɛ́, Eshirhǝ y zǝ mɔ e zhǐr e vò gɔ-lũ èpòlò w wǝ. ¹³ n jòm gàà dwã shǝ́-èna, Shǝtana zẽ̀ n ji kùr è n'ê swèlè mo. Ńmyɛ̌ ǹdǝ́ gɔ-vwàmá nɛ́ y'à ŋwɛ́nɛ́ ǹdǝ́ dwã, sǝ màlǝ́kabá y'à n'ê yìlì mu. ¹⁴ Rǝ̀myɛ́ kwã nɛ́, bǝ̀ zɔ Zhã bǝ ce byǝ̀nǝ́-jù wǝ̀. Yezu zɛ̃̀ n vò Gǝlile ń nǝ́ ń bwǝ̀l yò-ècɔ̀nɔ̀ nyí rí rǝ̀ shí Yi sõ mó. ¹⁵ Ń yà ń nǝ́ ń wǝ̀lǝ̀: «Yi rí tɛ̀bɛ́ bǝ̀ y'à byili mú yúwǝ́. Yi pyɛ̀lɛ̀ rɛ́ bwǝlse. Pyìrhí-nǝ á wun, á zwẽ yò-ècɔ̀nɔ̀ nyí rí.» ¹⁶ Ń yà ń ŋwɛ́nɛ́ Gǝlile nwǝ̃́ y vɔ̃̀ nɛ ń nǝ́ ń zhǝ̀lǝ̀, n nǝ gwànnà bǝ̀lyè bǝ̀ y'à n'ê gwɛ̃̀ mwǝ̃́ y wǝ. È wɔ́ Shǝmɔ ǹdǝ́ ń da-byǐ Andrǝrɛ. ¹⁷ N zɛ̃̀ n wɔ̀ bɛ: Bà-nà á tó ne. À m'a ce á gwɛ̃̀ numbyínsi. ¹⁸ Bǝ j'a zhǐr kùr yó, bǝ yẽ̌ bǝ̀ gǔndwǝ̌ né ne gàà, bǝ tó mo. ¹⁹ N kǝ́ n twẽ̌ n yí yé né námpɔ́lɛ́, n nǝ Zebede byǎ bɛ́, Zhakɛ ǹdǝ́ Zhã bǝ̀ y'à ŋwɛ́nɛ́ bǝ̀ bǔ-bwǝl wẽ́, bǝ̀ n'ê kwɛrhɛ bǝ̀ gùndwǝ̌. ²⁰ N já n zhízhílí n byẽ̀ bǝ̀myɛ. Bǝ zhǐr bǝ yẽ̌ bǝ̀ da Zebede ne ǹdǝ́ ń tùntùnnǝ̀ bé ne bǔ-bwǝl ré wẽ́ bǝ tó Yezu ni ²¹ Rǝ̀myɛ́ kwã nɛ́ Yezu ǹdǝ́ ń kwã-lyì bí zhǐr bǝ vò cɔ òdù bǝ̀ n'ê byẽ̀ bǝ Kapernaɔm. Shìrhǝ́ dɛ̃ rɛ́ gǝ́ yúwǝ́, n zɛ̃̀ n vò dwã-gùlú jì y wǝ, ń nǝ́ ń cèrhè kàrmɔ lyì bí ni. ²² Ń gǝ́ yà ń nǝ́ ń cèrhè ńdǝ́ ń sǝ̀pwà ŋwɔ̀nɔ́ mɔ́ ce, ń kàrmɔ́ y'à n'ê jàr bɛ dɛ̃́dɛ̃́. Ń kàrmɔ́ y'à dǝ̀ ǹdǝ Muyiisi nyǝ́ né byilnǝ bé nyǎn mɔ́ ta yé. ²³ Rǝ̀myɛ́ yó, bal mǝ̀dù yà ń ŋwɛ́nɛ́ dwã-gùlú jì y wǝ, nǝ̀cílí námmǝlwɛ̀lɛ́ y'à zhe mo,. N zɛ̃̀ ń nǝ́ ń bya ń zhe : ²⁴ Bǝ̀kɔ́n ǹ tú pyǎ nǝ́ sõ Nazaratɛ lyì bal Yezu? E zɛ̃̀ wɔ́ nǝ́ zhìlù yil ǹ túwǝ́? ²⁵ À yě lò ná-dwí yil ǹ wɔ́: Yi lò ǹdǝ́ mɔ́. Wɔ́ rǝ̀myɛ́ rǝ̀ twĩ̀ mú ń bà. Yezu zɛ̃̀ n bú nǝ̀cílí y n wɔ̀: gu ǹ nyí, sǝ́ du bal mɔ́ wẽ́. ²⁶ E zɛ̃̀ e vúvǔ bal mɔ́, e mà wìrhí nánfwɛ̀lɛ̀, e du ń wẽ́. ²⁷ Kɔn jàr lyì bí dɛ̃́dɛ̃́, bǝ zɛ̃̀ bǝ̀ n'ê bwǝ̀rh dwã bǝ̀ zhe: bǝ̀kɔ́n yò ǹdǝ́ kɔ̀bɔ́ èta mɔ́? Ń nǝ́ ń cèrhè kàrmɔ̀ nándùl ǹdǝ lò mɔ̀bɔ́ ń zhe ŋwɔ̀nɔ́ ta. Ń nǝ́ ń pɛ nyí nǝ̀cílsi námǝlwǎlɛ myɛ nɛ, sǝ shɛ̀nɛ́ sǝ zwẽ ń nyí ni. ²⁸ Yezu yil ré pú e du rǝ yí Gǝlile tǝnà y gakó wẽ́ làlà. ²⁹ Yezu zɛ̃̀ n shǝ́r dwã-gùlú jì y wẽ́, ńmyɛ̌ ǹdǝ́ zhakɛ ǹdǝ́ Zhã vò shǝmɔ ǹdǝ́ Andǝrɛ sõ kɛ̀lɛ́ wa. ³⁰ Sǝ Shǝmɔ cǝ̃́-kɛ̃ mɔ́ yala y'à shɛ̃̀ ń pyě tɛ̃́. Yezu gǝ́ yúwǝ́, bǝ j'a zɔ̀m nǝ̀bwɛ̃̀ mɔ́ yò ǹdǝ́ mɔ. ³¹ N yí ń nyí ni, n zǝ ń jɛ̃̀ nɛ n zhẽ̌ mo dɛ̃̌.Ń yala nɛ́ k'a só, n zɛ̃̀ ń nǝ́ ń tɛnɛ bɛ. ³² Yi rí gǝ́ tú rǝ zù, cɛ y n'ê byíbyílí, lyì bí zǝ nǝ̀bwànà bɛ gakó ǹdǝ́ byɛ̀bɛ́ nǝ̀cílsi námmǝlwǎlsɛ y'à zhe mó gakó bǝ m'e bǝ̀ Yezu sono. ³³ Cɔ w lyì bí gakó y'à tú dwã yó bwǝ̀rǝ̀ y nyí ni. ³⁴ Sǝ ń wárh bǝ̀ nǝ̀bwànà bɛ́ dwí gakó, n jì nǝ̀ílsí námmǝlwǎlsɛ́. Sǝ sǝ̀ gǝ́ y'à yě ń gǝ́ wɔ́ lò ná-dwí yil mó ce, ń yà ń tá ń yẽ̌ sǝ̀ zɔ̀m yé. ³⁵ Yezu dùlí n zɛ̃̀ nǝkɔkɔlɛ́ shãã shãã n zɛ̃̀ n du ǹdǝ́ cɛ y gwẽ̌ yǝ̀ wárh yé, n vò èpòlò wǝ, lò gǝ́ tɛ̀nɛ́ mǝ̀gã̌, ń nǝ́ ń ce Yi. ³⁶ Shǝmɔ ǹdǝ́ ń tó-dwã bɛ́ zɛ̃̀ bǝ̀ n'ê pyà mɔ. ³⁷ Bǝ̀ gǝ́ tú bǝ nǝ mɔ, bǝ wɔ̀ mɔ̀: Lyì bí gakó n'ê pyà mɔ́. ³⁸ N zɛ̃̀ n wɔ̀ bɛ: Bà-nà nǝ́ vò jàà dõ wǝ, cǝ-bwǎlsɛ́ sǝ̀ ŋwɛ́nɛ́ bwǝ́lbwǝ́l mó wẽ́, mùnì a bwǝ̀l yò-ècɔ̀nɔ̀ nyí ní rí gàà mɔ́ myɛ, bǝ̀ wɔ́ rǝ̀myɛ́ yil à túwǝ́. ³⁹ N zhǐr n byɛ́lɛ́ Gǝlile tǝnà y púlǝ́púlǝ́, ń mǝ́ ń bwǝ̀l yò-ècɔ̀nɔ̀ nyí rí bǝ̀ dwã-gùúlí jìsí wẽ́, sǝ ń yà ń nǝ́ ń jì nǝ̀cílsi námmǝlwǎlsɛ ⁴⁰ Dɛ̃ rǝ̀dù, nɔ cǝ́bal mǝ̀dù tú Yezu sono, n jòm ń nǝ̀dwǝ́nǝ́ yó, n wùlì ń yé né, n lwǝ̀l mo n wɔ̀: kɔn gǝ wɔ́ ǹ bùlǝ̀, ǹ wɔ̌ ǹ wárh nɛ a jǐrh wárhgáá. ⁴¹ Ń nɔ̀nɔ̀ zǝ Yezu, n cèlè ń jɛ̃̀ n dwǝ̀rh mo, n wɔ̀: Kɔn wɔ́ à bùlǝ̀. Wárh ń jǐrh wárhgáá. ⁴² Nɔ w j'a zhɛ̀ kùr yó, n jǐrh wárhgáá. ⁴³ Yezu zɛ̃̀ n gwirhi ń yé, n zɔ̀m ǹdǝ́ mɔ n wɔ̀: ⁴⁴ Zhǝl, sǝ́ dɛ̃̀ ǹ cìnǝ̀. Bǝ̀ká shɛ̀nɛ́ ń wɔ̀ lò lò ne yé, sǝ́ vò ń byili ǹ cìn Yi jì y vwĩ̀-zwǝ́lnǝ mó ne, sǝ́ pǝ kɔn ǹ gǝ́ wárh ń jǐrh wárhgáá mɔ́ yilǝ, ǹdǝ Muyiisi gǝ́ kɛ̃ nyǝ́ né sɛ́bɛ́ rɛ́ wẽ́ n byili ní. Rǝ̀myɛ́ m'a yǝ̀ zhǝ̀n kɔna, rǝ̀ n'ê byili lyì bí ni bǝ̀ ǹ wárh. ⁴⁵ Sǝ bal mɔ́ gǝ́ zhǐr, n bwǝ̀l yò w n ce dɛ̃̌ n byili. Rǝ̀myɛ́ ce Yezu yà ń kǝ́ ń wàr ń nǝ́ ń zwì cɔ w wa, ǹdǝ́ è gǝ dǝ̀ shéé ń shèè yé. Ń yà ń ŋwɛ́nɛ́ gɔ sono, lò gǝ́ tɛ̀nɛ́ mǝ̀gã̌, sǝ lyì bí y'à n'ê shí jààsɛ́ gakó w bǝ̀ twí ń sono.