¹ Àmyɛ́ Pwǝǝ, à wɔ́ Yezu Kristǝ tùntúm, sǝ à yǝ̀ ń tùntúm jǐrh ǹdǝ́ numbyíní pùbùlǝ̀ yé. È k'ê dǝ̀ numbyíní cã̌ nɛ à zɔ nɛ́ a m'a jǐrh ń tùntúm yé. Wɔ́ ńmyɛ̌ ǹdǝ́ nǝ́ Da Yi rí rǝ̀ bwìrhì mù mú jàn yil à jǐrh ń tùntúm. ² Àmyɛ́ ǹdǝ́ nǝ́ da-byǎ bɛ́ bǝ̀ ŋwɛ́nɛ́ nyɔ̀nɔ̀ mɔ́ gakó, nǝ́ r'é kɛ̃ sɛ́bɛ́ rɛ́ tɛ̀bɛ́ nǝ́ la ámyɛ̌ Yi gùúlí rǝ̀ ŋwɛ́nɛ́ Galǝshi ní mú lyì bí ni pɔ, nǝ́ m'é ce ába. ³ Nə́ Da Yi ǹdə́ nə́ Cǐnnə Yezu Kristə m’a cĩ́ bwəl á yó, sə bə pə ába yǝ̀-zùlə́. ⁴ Wɔ́ Kristə cìcì ń pɔ ń myə̌l ré n mə n vwǎrh nə́ba nə́ yə̀-bəlwàálɛ́ wẽ́, mùnì ga n zwẽ nə́ba ǹdə nə́ Da Yi gə́ nə́ ń yǎl nɛ́, èlǎsɛ̃́ lũ ò bə càn mɔ́ wẽ́. ⁵ Yi nə còrhó byinə nə̀ bə zhɔ̌ zhe yilə. ⁶ Kɔn jàr nɛ́ dɛ̃́dɛ̃́, á gə́ yàl làlà á pú á yẽ̌ mɔ̀bɔ́ ń tó Yi pɛnɛ́ y nánfò w dɛnnɛ n byẽ̀ ába mó ne, á k'á zwẽ yò-ècɔ̀nɔ̀ nyí dõ mó yilə. ⁷ A yě bə̀ lyì ŋwɛ́nɛ́ bə̀ n'ê zhizhiri á wun ni. Bə̀ n'ê yǎl bə pyìrhí Yezu Kristə yò-ècɔ̀nɔ̀ nyí rí, e jà yò-ècɔ̀nɔ̀ nyí dõ tɛ̀nɛ́ yé. ⁸ Bá è gə wɔ́ nə́myɛ̌ cìcì myɛ, bá è wɔ́ màlɛ́ka è shí dɛ̃̌ myɛ, e bwə̀l yò-ècɔ̀nɔ̀ nyí dõ, è də̀ tɛ̀bɛ́ nə́ bwə̀l nə́ byili ába mɔ́, sə Yi zhìlì rə̀-ná-cí yò ! ⁹ Nə́ jɛ̀rɛ̀ nə́ byili ri ába, sə à k'â n'â byili ri ába èlǎsɛ̃́ èta mɔ́ ; lò gə bwə̀l yo-ènɔ̀nɔ̀ nyí dõ ń byili ába, rə̀myɛ́ tɛ̀bɛ́ á zwẽ mó də̀ rə̀dù, sə Yi zhìlì rə̀-ná-cí yò. ¹⁰ Zɔ̀mà nɛ́ à zɔ̀m èta mɔ́, wɔ́ numbyíní pùbùlə̀ à n'â pyà ráá Yi wɔ́ pubùlə̀ à n'â pyà ? Wɔ́ numbyíní wu-nyɔ̃̀ à n'â pyà nà ? È gə y'à wɔ́ numbyíní pùbùlə̀ à n'â pyà à gə y'à k'â də̀ Kristə tùntúm yé. ¹¹ Da-byǎ, à n'â wə̀l ába, bə̀ nyǐ yò-ècɔ̀nɔ̀ nyí rí à n'â bwə̀l mó də̀ numbyíní nyǎn yé, ¹² Wɔ́ Yezu Kristə ń byili ri ni, s'e də̀ numbyíní è byili ri ni, è də̀ numbyíní è cèrhè rè ne myɛ yé. ¹³ Á nyɛ̀ɛ̀ à tùntwĩ̀ĩ̀ rí gǝ́ y'à wɔ́ nɛ́, ǹdǝ́ à y'à gwẽ̌ ŋwɛ́nɛ́ Zhwifubá Yi-sɔ́má y wẽ́ mó. Á yě b'à y'à n'â nwɛ̀nɛ̀ Yi gùlú w lyì bí dɛ̃́dɛ̃́, à y'à n'â yǎl a zhìlì bǝ̀ yò. ¹⁴ Rǝ̀myɛ́ yi ní, à y'à n'â zwẽ Zhwifubá Yi-sɔ́má y nyǝ́ né du à shí-dwã bɛ́ nánzhǝzhɔ̌. À y'à zhe yǝ̀wǎl dɛ̃́dɛ̃́ du bi nǝ́ nàmbala bɛ́ lùl-e-pwírí y nyǝ́ né wẽ́. ¹⁵ Sə kɔn yàl Yi pubùlə̀ rə cír ne ǹdə́ à gwẽ̌ ŋwɛ́nɛ́ à ná wẽ́, rə cĩ́ kwã nɛ́ rə̀ pɛnɛ́ y nánfò w jàn yilə, ¹⁶ Rə̀ ńê yǎl rə byili ni rə̀ Byǐ mú párá, mùnì a bwə̀l ń yò a byili lyì bí byɛ̀bɛ́ bə̀ də̀ Zhwǐfubá mó ne. Rə̀ gǝ́ byẽ̀ ne, rə̀myɛ́ yi ní cìcì a j'a zɛ̃̀, à yǝ̀ lò sõ tó a bwə̀rh bə̀ kaka yé, ¹⁷ à yə̀ Zhərəzalɛm myɛ zhə̀l a bwə̀rh byɛ̀bɛ́ bə̀ jɛ̀rɛ̀ bə jǐrh tùntúmə́ mó myɛ nɛ bə̀ kaka yé. A j'a zhì à kùr yó gàà a lyɛ̃ a vò Arəbyi, a zhì gàà mɔ́ a k'a kwɛ̃̀ a bə̀ Damaasɛ. ¹⁸ A wɛ̀rhɛ́ byinə nə̀tɔ̀. Rə̀kwã nɛ́, a zɛ̃̀ a vò Zhərəzalɛm mùnì ga a lwar Pyɛɛrɛ párá, a yí a wɛ̀rhɛ́ dwã shí ǹdə́ nə̀nù ń sono. ¹⁹ À yə̀ tùntúm dõ nɛ gàà yé. Wɔ́ Cǐnnə mó da-byǐ Zhakɛ à nɔwa. ²⁰ Kɔn rɛ́ dɛ̀bɛ́ à n'â kɛ̃ à la ába pɔ èta mɔ́, à n'â byili ába Yi yé né b'è də̀ kɔma à n'â gòm yé. ²¹ Rə̀myɛ́ kwã nɛ́ kə́dò, a zhǐr a vò Siri ǹdə́ Shilishi tənèsé wə, ²² rə̀myɛ́ yi ní ǹdə́ Zhide tənà y kristə-lyì gùúlí lyì bí y'à gwẽ̌ yə̀l à pár yé. ²³ Sə wɔ́ nyɛ́ bə̀ y'à nyɛ̌ lyì jàlà n'ê zɔ̀m à yò bə̀ zhe : Shãã ga, bal mɔ́ mɔ̀bɔ́ èta mɔ́ yà ń nə́ ń nwɛ̀nɛ̀ nə́ba, ńmyɛ̌ ń zɛ̃̀ èlǎsɛ̃́ ń nə́ ń bwə̀l Yi-ni-zhú yò-ècɔ̀nɔ̀ nyí rí, e jà ń yà ń nə́ ń yǎl n cɔ̀ rə̀ yò. Wɔ́ rə̀myɛ́ dúdú bə̀ y'à yě, ²⁴ sə bə̀ y'à n'ê cèrhé Yi à yilə.