¹ Cofyil, à zɔ̀m kɔn dɛ̀bɛ́ gakó Yezu wɛ̀rhɛ́ ǹdǝ́ dɛ̀bɛ́ gakó ń cèrhè lyì bí ni kùr-ju yi ní, ² kɔn m'e yí dɛ̃ rɛ́ tɛ̀bɛ́ Yi kwè mò n vò Arǝzana w mɔ́ yò, à sɛ́bɛ́ rɛ́ nã́yéé ré à kɛ̃ mɔ́ wẽ́. Ń byili ń zɔ̀mà nɛ́ tùntúmǝ́ bé ń cír mó ne ǹdǝ́ Eshirhǝ náàcɛ̀nɛ́ ŋwɔ̀nɔ́. ³ Wɔ́ bǝ̀myɛ́ nɛ ń byili ń cìn ń cu mú kwã nɛ́, n wɛ̀rhɛ́ wẽ̀ nánzhǝzhɔ̌ n ce bǝ lwar pamparɛ̃ɛ̃ bǝ̀ ń ŋwɛ́nɛ́, tǝ́tɔ̀ná tɛ̀nɛ́ yé. Ń lyí bi dwã shǝ́-èna, sǝ ń zɔ̀m Yi pyɛ̀lɛ̀ rɛ́ yò ǹdǝ́ bɛ. ⁴ Dɛ̃ rǝ̀dù, ń yà ń nǝ́ ń tó be ń jí kùjú, n zɛ̃̀ n pǝ bɛ nyí n wɔ̀: «Mɛ̃-na Zhǝrǝzalɛm nɛ́, á dɛ̃̀ kɔn rɛ́ dɛ̀bɛ́ à Da bwǝl rǝ̀ nyí mú, dɛ̀bɛ́ à byili ába mó. ⁵ Zhã wɔ́ nɛ̃̌ w ń yà ń nǝ́ ń mɔ́lɛ́ lyì bí ní, sǝ nyɔ̀nɔ̀ ǹdǝ́ dwã màngɛlɛ́ ámyɛ̌ wɔ́ Eshirhǝ náàcɛ̀nɛ́ wẽ́ bǝ̀ la ába nɛ́ mɔ́lɔ́.» ⁶ Dɛ̃ rǝ̀dù, Yezu ǹdǝ́ ń tùntúmǝ́ bé y'à jě dwã yó. Bǝ zɛ̃̀ bǝ bwǝ̀rh mò bǝ wɔ̀: «Cinnǝ, wɔ́ èlǎsɛ̃́ ǹ b'ǎ zwẽ Esǝrayɛl lyì bí cɔ w ń pǝ bɛ bǝ̀ cìn-cìnú?» ⁷ N wɔ̀ bɛ: «Rǝ̀myɛ́ yi rí ǹdǝ́ rǝ̀ dɛ̃ rɛ́ lwar mɔ́ dǝ̀ ámyɛ̌ yé yé. Wɔ́ à Da ǹdǝ́ ń sǝ̀pwà jàn ń cír rǝ̀myɛ́ n cĩ́. ⁸ Sǝ Eshirhǝ náàcɛ̀nɛ́ gǝ tú è só á yó w yi ní, á m'ǎ nǝ jàn, sǝ á m'ǎ yǝ̀ à zhǝ̀n-cínnǝ Zhǝrǝzalɛm nɛ́, ǹdǝ́ Zhide ǹdǝ́ Samarɛ tǝnèsé púlǝ́púlǝ́ wǝ, kɔn m'e yí lũ w cǝ-yala gakó.» ⁹ Ń gǝ́ tú n zɔ̀m n zhɛ̀, Yi kwè mò ń la dɛ̃̌ ǹdǝ́ bǝ̀ gwẽ̌ zhǐ bǝ̀ n'ê nyǐ mu. Ébɔ̃ círhí mu, bǝ̀ k'ê bǝ mɔ nɛ yé. ¹⁰ Lyì bǝ̀lyè bǝ̀ y'à zù gã̀-pwẽ̀ bǝ̀ bǝ lyí bi, ǹdǝ́ bǝ̀ gwẽ̌ zhǐ bǝ̀ n'ê nyǐ ń jàà wà. ¹¹ Lyì bí wɔ̀ bɛ: «Gǝlile lyì, byè yil á zhǐ á n'á nyǐ dɛ̃̌ èta? Yezu mɔ̀bɔ́ Yi kwè ń la Arǝzana w mɔ́, ń mà n ká n bǝ̀ èta, ǹdǝ á gǝ́ nǝ mɔ ń la nɛ́.» ¹² Rǝ̀myɛ́ yó, tùntúmǝ́ bé k'a shí pyɔ̀ w bǝ̀ n'ê byẽ̀ bǝ̀ Olyivyǝ́r pyɔ̀ mɔ́ yó bǝ só tɛ̃́ bǝ vò Zhǝrǝzalɛm. Pyɔ̀ w òmyɛ́ ǹdǝ́ Zhǝrǝzalɛm bǝ nyɛ ǹdǝ́ dwã yé. Kɔn b'a myɛrhɛ ǹdǝ coló òdù ta. ¹³ Bǝ̀ gǝ́ yúwǝ́, bǝ vò dɛ̃̌-yó jì y bǝ̀ n'ê gùlí dwã è wẽ́ twéé twéé mó wǝ. È y'à wɔ́ Pyɛɛrɛ ǹdǝ́ Zhã ǹdǝ́ Zhakɛ, ǹdǝ́ Andǝrɛ ǹdǝ́ Shilipu, ǹdǝ́ Tɔma ǹdǝ́ Bǝtǝlǝmyi ǹdǝ́ Mǝco, ǹdǝ́ Alǝfɛ byǐ Zhakɛ ǹdǝ́ yǝ̀wǎl cìnǝ́ bé gùlú w lò mǝ̀dù ń yíl Shǝmɔ e súlí Zhakɛ byǐ Zhidǝ. ¹⁴ Bǝ̀myɛ́ ǹdǝ́ kana jàlà, ǹdǝ́ Yezu ná, ǹdǝ́ Yezu da-byǎ bɛ́ y'à wɛ̀rhɛ́ wu òdù bǝ̀ n'ê gùlí dwã bǝ̀ ce Yi twéé twéé. ¹⁵ Dɛ̃ rǝ̀dù, lyì bí byɛ̀bɛ́ bǝ̀ y'à zù Yezu Kristǝ mó y'à tú dwã yó; bǝ̀ y'à yú lyì zɔ̌m ǹdǝ́ shí-èlyè. Pyɛɛrɛ zɛ̃̀ n zhì bǝ̀ gakó yé né n wɔ̀ bɛ: ¹⁶ «Da-byǎ, bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ̀ Dǝvyidi yà ń dámǎ n zɔ̀m kɔn rǝ̀dù Zhidǝ shò-kwã nɛ́. Wɔ́ nyɔ́ɔ́ bǝ̀ kɔn rɛ́ rǝ̀myɛ́ mɔ́ pyǐrh. Wɔ́ Zhidǝ mó ńmyɛ̌ ń zǝ lyì bí n bǝ̀ bǝ zǝ Yezu mú. ¹⁷ Ń yà ń ŋwɛ́nɛ́ nǝ́ wẽ́ ń nǝ́ ń tó nǝ́ba ń twĩ̀ tum rí Cinnǝ mú co nǝ́ jɔ̃̀ w mɔ́. ( ¹⁸ Ń zǝ wársɛ́ shɛ̀bɛ́ bǝ̀ kwɛ̃̌ mɔ n zɛ̃̀ n mǝ n twĩ̀ ń lwɛlɛ rɛ́ mɔ́ n vò n mǝ n ye cɛ. Sǝ ń tu tɛ̃́ cɛ y èmyɛ́ wẽ́, ń pwǐ y lá, ń lyuuré gakó sàrh rǝ̀ pyě tɛ̃́. ¹⁹ Zhǝrǝzalɛm lyì bí gakó nyɛ̀ɛ̀ yò w òmyɛ́. Wɔ́ rǝ̀myɛ́ è ce, bǝ̀ co cɛ y èmyɛ́ yil ǹdǝ́ bǝ̀ lũ zɔ̀mà nɛ́ bǝ̀ Akɛlǝdama. Rǝ̀ kùr wɔ́: «Jal cɛ».) ²⁰ «E jà bǝ̀ y'à kɛ̃ Nwíísí sɛ́bɛ́ rɛ́ wẽ́ bǝ wɔ̀: ‹Ń kɛ̀lɛ́ y kùr b'a jé; lò lò tá ń la gàà jǒm kǝ́dò yé.› Bǝ̀ kɛ̃ rǝ̀ jàà dõ myɛ wẽ́ bǝ wɔ̀: ‹Sǝ lò dõ mà n zhì ń jàà wà.›» ²¹ Pyɛɛrɛ súlí n wɔ̀: «È gǝ́ wɔ́ èta, kɔn wɔ́ nyɔ́ɔ́ bǝ̀ lò dõ zwí nǝ́ wẽ́, n tó nǝ́ba n yǝ̀ Yezu bùrhù mú zhǝ̀n-cínnǝ. Lyì ŋwɛ́nɛ́ bǝ̀ y'à n'ê tó nǝ́ba Cinnǝ Yezu gǝ́ yà ń gwẽ̌ ŋwɛ́nɛ́, nǝ́myɛ̌ ǹdǝ́ ńmyɛ̌ n'é tó dwã nǝ́ zhǝ̀l cɛmɛ nɛ́ wa, ²² Zhã gǝ́ pɔ mɔ nɛ̃̌-shɔ mɔ́ yi ní, kɔn m'e yí Yi gǝ́ kwè mò n vò Arǝzana w mɔ́; nǝ́ b'ǎ cír bǝ̀myɛ́ mǝ̀dù.» ²³ Bǝ vùr lyì bǝ̀lyè. È y'à wɔ́ Zhozefu mú mɔ̀bɔ́ bǝ̀ n'ê byẽ̀ bǝ̀ Barsabaasɛ mɔ́, ń yà ń zhe yil dõ bǝ̀ n'ê byẽ̀ bǝ̀ Zhusǝtuusi; sǝ ń dõ mó yà ń yíl Macaasɛ. ²⁴ Bǝ̀ gakó zɛ̃̀ bǝ tó dwã bǝ lwǝ̀l Yi bǝ wɔ̀: «Cinnǝ, ǹmyɛ́ ǹ yě lò gakó wu. Byili nǝ́ba mɔ̀bɔ́ ǹ cír byɛ̀bɛ́ bǝ̀lyè y wẽ́ ²⁵ bǝ̀ ń yál tùntúm n zhì Zhidǝ jàà y wa, n twĩ̀ tum rí tɛ̀bɛ́ Zhidǝ zhǐr n yẽ̌ n vò ń sǝ̀pwà jàà y w mɔ́.» ²⁶ Bǝ zɛ̃̀ bǝ tǝ́ tántɛ́ɛ́ bǝ̀ la m'e cír mǝ̀dù, sǝ tántɛ́ɛ́ y zɔ Macaasɛ. Wɔ́ ńmyɛ̌ bǝ̀ ce ń zù tùntúmǝ́ bé shí ǹdǝ́ mǝ̀dù y wẽ́.