¹ Byὲbέ bə wɔ yómə mómə sə bə nyὲ bə yó-cìnə bé, mùnì ga lyì bí bək'á Yi yil ré ǹdə nə kàrmɔ yò námməlwὲlέ yé. ² Yómə bé byὲbέ bə yó-cìnə bé wɔ Kritə-lyì mú, bək'a tə bə wɔ da-byǍ yil bə cẽ be nyám yé, bə mə se bə kwɛrhɛ bə nyὲ bέ, bə wɔ Kristə-lyì byὲbέ bə só ne bə n'ê twĩ bə pɛ. Cèrhè bə ywẽ dé rəmyέ, ń ce bə wὲrhέ rɛ. ³ Lò gə tú ń nə ń kàrmɔ mɔbɔ mə wɔ kɔma nyǎm, mə j'à t'â tó zɔm-ècənà nέ nyὲbέ nə Yo-cébal Yəzu Kristə byili mú ni, mə súlí mə t'â tó nə Yi-ni-zhú mú nyǎm mɔ nɛ, ⁴ rə ná-cí zhe cìn-dɛ-zhõ, ń yəl kaka myɛ yé, nyə-pǎr mǎ zɔmà címí y zhe mo. Wɔ rəmyέ è ce bwɛ-dǔr, búlə, dwã tùùrì, garmɔ, dwã cərh ceré, ⁵ ǹdə nyə-pǎr mǎ kɔn lyɛ cɛ nɛ ŋwέnέ bə cəcəl wə, bə k'ê yəl zhən pár yé. Bə zὲ bə n'ê bùl bə Yi-ni-zhú mú wɔ kɔn dὲbέ rə m'a ce numbyíní jǐrh nəcὲm-bal. ⁶ Zhənà, Yi-ni-zhú mú wɔ nəcὲndὲ nánfɔlɔ numbyíní yilə, ǹdə è gə n'ê bùl bə tὲbέ è zhe mó yú yə. ⁷ Nə yə kaka zal nə m'e bə cɛ yó yé, nə k'é t'â la kaka zal nə m'e kwὲ myɛ yé. ⁸ Nə gə zhe kùjú, nə zhe yala gɔnɔ, rəmyέ já ǹdə nəba. ⁹ Sə byὲbέ bə n'ê pyà sə bə jǐrh nəcànà nánfwààlὲ mɔ n'ê twi sòlò ǹdə pɔmɔ wẽ, sə shilə né námməlwǎlsέ shὲbέ sə bə kùr zhe sə n'ê swèlè numbyíní e jé, è yò zhìlì mú n'ê jəjὲrέ bɛ. ¹⁰ Zhənà, zwini tὲbέ gakó rə n'ê zal numbyíní mú kùr n'ê shí wέrέ y sónó w dέdέ mɔ wẽ. Lyì nánzhəzhɔ pyà y kɔn lyɛ cɛ nɛ. Wɔ rəmyέ è ce bə jé bə Yi-ni-zhú mú wẽ, bə pə nɔnɔ nánfɔlɔ bə cìn nì, e jà wɔ bə cìcì yò. ¹¹ Ǹmyέ mɔbɔ ǹ wɔ Yi lò mó, yẽ rəmyέ mɔ gakó ne, pyǎ sə yə wu-cánga cí, ń pə ǹ cìn námpúm Yi ni, ń zhí ri. Zə sónó ǹdə cìn-pyɔnɔ ǹdə wu-bɔnɔ. ¹² Zə Yi-ni-zhú zãã y náàcὲnέ. Zə nyǔ mə t'â la zhɔ mɔ kẽkẽ, bə wɔ məmyέ yil Yi byẽ mó, ǹ gə wὲrhέ ǹ nyì-bwəl náàcὲnέ y zhə-cìnə nánzhəzhɔ dɛ rέ yùwə. ¹³ À n'â pə mɔ nyí Yi rí tὲbέ rə n'ê pɛ éshìrhə kɔn dwí gakó ne mó yé né, ǹdə Yəzu Kristə mó ń yàl nə zhə-cínnə Pɔs-Pyəlatɛ yé né mó yírh wə: ¹⁴ Zwẽ nyə né nəmyέ, sə yə wárhgáá, dóó bək'a yə ǹ yó w yé, kɔn m'e yí nə Yó-cébal Yəzu Kristə twírí y dɛ rέ. ¹⁵ Mɔbɔ ń la ce Kristə bə ǹdə yi rí gə tú è yú mú, wɔ Yi. Wɔ rəmyɛ sõ wu-nyɔ w ò bə dom zhe mó n'ô shí ní. Rə wɔ pyǎ bέ gakó pyɔ, yó-cìnə bé gakó yó-cébal. ¹⁶ Rəmyέ dúdú rə t'â cì yé, rə jě pwẽ wẽ, ò lò wàr ń nə ń bwəlse re yé. Wɔ rəmyέ rə zhe zùwə ǹdə jàn, byinə nə bə zhɔ zhe yilə! Amὲn! ¹⁷ Byili lũ w kɔbɔ nəcὲnà bέ nɛ, bə bək'a zhẽ bə cìn dɛ bə zə bə nəcὲndέ zhən yé, sə bə zə Yi zhən dέ, bə wɔ Yi rə n'ê pɛ nəba kɔn dwí gakó nánzhəzhɔ nə jí. ¹⁸ Byili bi bə bə twĩ cὲnὲ, sə bə yə nəcὲnà bə tùntwəə né wẽ, sə bə tə bə jὲ-kɔn ǹdə lyì bí dwã bέ ǹdə wu-nyɔ. ¹⁹ Èta bə m'a ŋwὲnέ bə tɛnɛ nəcὲndὲ bə cĩ jàà kὲbέ è jì-byòló w càn wẽ, mùnì ga ba nə nyǔ mú páá mɔ. ²⁰ Timote, zə tὲbέ Yi pɔ mɔ cὲnὲ, sə dὲ ǹ cìn ǹdə zɔm-fwəəré tὲbέ rəmyέ ǹdə Yi-ni-zhú mú də rədù mú. Sə dὲ ǹ cìn myɛ ǹdə kɔn dὲbέ lyì bí y'a wɔ bə bə yě, rə jà bə kùr zhe mó. ²¹ Jàlà jəjὲrέ bə cìn bə bə yě, rəmyέ ce bə jé bə Yi-ni-zhú mú wẽ dέdέ. Yi pɛnέ y nánfò w yál nέ ǹd'ába!