¹ Wɔ́ àmyɛ́ Pwǝǝ ǹdǝ́ Shǝlvɛ̃ ǹdǝ́ Timote nǝ́ r'é kɛ̃ sɛ́bɛ́ rɛ́ tɛ̀bɛ́ nǝ́ la ámyɛ̌ Tǝsǝloniki Kristǝ-lyì gùlú w lyì bí ni pɔ. Á zhí nǝ́ Da Yi ǹdǝ́ Cǐnnǝ Yezu Kristǝ ne. Yi b'a cí bwǝl á yó, sǝ rǝ pǝ ába yǝ̀-zùlǝ́! ² Nǝ́ n'é ce Yi nǝ̀bán twéé twéé á yilǝ. Nǝ́ gǝ n'é ce Yi gakó, nǝ́ t'á swě á yò yé. ³ Nǝ́ n'é lyǐrh á Yi-ni-zhú tumǝ né ǹd'a sónó tùntwĩ̀ĩ̀ rí yò. Nǝ́ n'é lyǐrh á n'á pyɛ́nɛ́ á cìn á m'á dɛ̃̀ nǝ́ Cǐnnǝ Yezu Kristǝ twírí y mú myɛ yò nǝ́ Da Yi yé né twéé gakó. ⁴ Nǝ́ yě bǝ̀ Yi swéné ába, rǝ cír ába á jǐrh rǝ̀ lyì. ⁵ Yò-ècɔ̀nɔ̀ nyí rí nǝ́ bwǝ̀l nǝ́ byili ába mɔ́ dǝ̀ ǹdǝ́ nyì-gwàl dúdú yé; nǝ́ bwǝ̀l re ǹdǝ́ jàn tɛ̀bɛ́ rǝ̀ n'ê shí Eshirhǝ náacɛ̀nɛ́ sõ, sǝ nǝ́ yě pamparɛ̃ɛ̃ bǝ̀ tɛ̀bɛ́ nǝ́ bwǝ̀l mó wɔ́ zhǝ̀nà. Á cìcì yě nǝ́ gǝ́ y'ǎ zhe nǝ́ cìn ní á sõ, sǝ rǝ̀myɛ́ y'à wɔ́ ámyɛ̌ sãɔ̃ yilǝ, ⁶ Sǝ á kwè nǝ́myɛ̌ ǹdǝ́ Cǐnnǝ mó nà. Á nwɛ̀nɛ̀ dɛ̃́dɛ̃́, sǝ ndǝ́ rǝ̀myɛ́ ga, á zwẽ Yi zɔ̀mɛ̀ rɛ́ ǹdǝ́ wu-nyɔ̃̀ kɔ̀bɔ́ ò n'ô shí Eshirhǝ náàcɛ̀nɛ́ sõ. ⁷ Èta, Masǝdwaanɛ ǹdǝ́ Akǝyi tǝnèsé Kristǝ-lyì bí gakó n'ê kwè /myɛ nà. ⁸ Zhǝ̀nà, è dǝ̀ Masǝdwaanɛ ndǝ́ Akǝyi dúdú Yi zɔ̀mɛ̀ rɛ́ shí á sõ rǝ yí ní yé; lũ w lyì bí gakó yě b'ǎ zhí Yi ni. Rǝ̀myɛ́ ce, nǝ́myɛ̌ k'é bǝ kaka zhe nǝ́ la byilu á Yi-ni-zhú mú shò-kwã nɛ́ yé. ⁹ Lyì bí gakó n'ê zɔ̀m nǝ́ gǝ́ tú á sõ á zwẽ nǝ́ zhǝǝlé né mó, ǹd'á gǝ́ yẽ̌ wẽ̀ tɛ̀bɛ́ bǝ̀ n'ê zwǝ́l rǝ̀ dǝ̀ Yi mú ni mú yò. Bǝ̀ n'ê zɔ̀m b'ǎ zwẽ nyí á pyìrhí á wun á n'á tó Yi rí tɛ̀bɛ́ rǝ̀ wɔ́ nã́nyì, rǝ j'à wɔ́ zhǝ̀n mɔ́ nɛ, ¹⁰ sǝ á n'á dɛ̃̀ rǝ̀ Byǐ Yezu ń la shí Arǝzana w n bà. Rǝ̀ bwìrhì mu n du cùùri wẽ́. Wɔ́ ńmyɛ̌ ń mà n zwẽ nǝ́ba bursí sǝ̀ bwǝlse Yi la kɔ́ mɔ́ yi ní.