¹ Omiruna nang, iring na amirunere nang Kristo. ² Ethahuyo nang ithai acha eyu ithai nang da asang bokolong ithai idep iring nayu omanyitha honya oberien iring nesahinerek nang dothai. ³ Dini awak ithai tho oteha ijan Kristo di hu no ohothing bokolong, ara othulo awon di hu ha athula nangoruo, ara Ojok awon di hu ho Kristo. ⁴ Othulo lo omojo kuya epropheta ibu ahu nanyong emuho olau ahu nanyong. ⁵ Ti angoruothi na mojo kuya epropheta ibu ahu nanyong awang hemuho olau ahu nanyong. Acha aning narijoro aboithe na arijoro ha ahu nayong na kitha. ⁶ Ara awang athulo na angoruo he imuhok ahu nanyong, ongida inyong ongerio ohofir iring ho osuk. Ara omonyo da athulo nangoruo di ngerio ohofir kuya di kicho ahu, inyong themuhok ahu. ⁷ Awang ahu no othulo imuhie, acha inyong arijori karik ethahuo no Ojok. Ti athulo inyong ethahuo no othulo. ⁸ Acha ike tha athulo ihuhumuni othulo, ti athula tho othulo. ⁹ Acha awang ho oyeuni othulo da athulo, ti oyeuni athulo do othulo. ¹⁰ Inyong nesarak athulo ethamijani ne lahabuore dihu honyong tha angelohyen ¹¹ Ti, da Lamolo, awang athulo he suka iring na awak inyong tho othulo dia isuka othulo iring nawak inyong tha athulo. ¹² Iring naindunerek athulo tho othulo, oindu dang othulo tha athulo. Ara asang bokolong avuni tho Ojok. ¹³ Ongochethe tha ahuandek tha hathai: Oyu da athulo di mojo do Ojok ibu ahu nanyong awang he muho? ¹⁴ Awang itha itehu tha ahuandek tha hathai ijaran ara ohodo ohofir ho othulo, iyanu amonyori donyong, ¹⁵ ti ara own athulo ho ohofir hohodori, iyanu ethahuo donyong? Acho ohofir hullo isahini donyong ara emuhit. ¹⁶ Ti ara owon lobo lowak ethafereyo hune, awang ohoi he won ho homok omanyitha, juk athuahio ha amojo ho Ojok. ¹⁷ Do otienitha ho vuni hulya, awang nang ethahuyo ithai, acah ara itha ara itha he suduha, ikere tha nayu, tha an monyo. ¹⁸ Di eterio, aningu nang ijan ara ithai hesuduha dithua ha mojo, awon ebuabua di hiji hothai, eruk nang tibai. ¹⁹ Kuya owon de obotok dihiji hothai, da ara heruhi atehi dihiji hothai. ²⁰ Acha ara ithai hesuduha, ike Eucharasia no Lamolo ne nyo ithai. ²¹ Ara itha henyo, inyo ithai omonyie angiriasik hathai kaang homok honyo angiriasik hasong. Oleng ahure lobo, ara lobo ebozo obalu. ²² Awang ithai he won ha ahangithek henyo ithai karik itha imatha dia? Ilau ithai athua na mojorik Ojok ara ithai isak ariri do ho awang ha aning nabo? Ainyong ngona achama nang dothai? Amuno nang ithai? Awang nang amuno ithai tho hune! ²³ Ethafothu nang tho Lamolo ainyong ethafothok nang do thai, Lamolo Yesu do oharie le thanyangahinerek inyong, eduhu apane, ²⁴ ajara athuk esahina humo, apinyo ajo,"Ahuan hindang na, do thai; ihandietha ahani di iyunerek nang." ²⁵ Athuhon an anyo iring ne edudu ohutie, ajo, "Ohutie lo emora angejuk dihotho honang. Ihandiethe ahani ara itha he matha inyong, di iyunerek nang." ²⁶ Do omiru bokolong henyerek ithai apane itha imatha tho ohutie lo, ochamai bebe ayee no Lamolo man anyahuna nayong. ²⁷ Thene, othulo lonyo apane dia amatha tho ohutie lo Lamolo tho oyihoi tho lo omonyo, ipal da ahuan karik ahotho na Lamolo. ²⁸ Ongid othulo ingengelio ahuan kaang he handio aning nabo, ahani tho onyie apane karik tho omathai ohutie. ²⁹ Othulo lo onyo amaza kuong atehan ahuan, onyo karik omaza angotho dihuan honyong. ³⁰ Inyong na muai holwa hothai, athuk homok hothai ayeetha. ³¹ Ti ara ingengelio ohotha ahuandek hahothai awang ho ongochie ohothai. ³² Ti ara Lamolo langocho ohothai, esuka ohothai ara ho oyu, da awang ohothai otohori ha ahap. ³³ Thene, ha lalalai ha hanahani, ara ithai hefunu ara aboithe dinyo, ithilayethek ahuandek. ³⁴ Ara othulo lo oleng ahure, thonyie di hang, dara ara itha hefunu aboithe ikara iring hofuni di ngocho. Karik da asang hegerok ithai, esak nang de oyihoi ara nang lanyahu.