¹ Uwa mwine umukulu wa bakemba; uwaikalikwa pa musango wa Gitti Salamo wakwe Davifi. Ba Shikulu besu ba Yawe, Ishina lyenu ifyo lyi weme pano pa kyalo ponse, mweba limwesha ubukata bwenu mwiulu umwine. ² Mutunwa twa banyike ne twana twalukeke emo mwaikalika amakosa umulandu wa balwani beni, pa kweba achi mu bashilikepo bonse abalwani na bashinkanya. ³ Nga na keba mwiulu mwenu, ifyo iminwe yenu yapanga, umwenshi ne tubangabanga, ifyo mwikalika mu mpunsha, ⁴ Kanshi umuntu ewashani ifyo mwaposako umuchima, Nangu abana babantu pa kwebati muposeko amano kuli beni? ⁵ Pakuti mwali bapangile fye pa nini muushi ukukila pa ba mwiulu kabili mwabafwika ubukata ne mukinshi. ⁶ Mwa mupela ne nsambu iya kutangilila pafya milimo ya maboko enu; mwabika ifintu fyonse muushi yamolu akwe: ⁷ Imikoko yonse ne nombe, kabili ukubikapofye ne nama sha muupanga, ⁸ Ifyoni ifipita mwiulu, kabili ne masabi amufishiba, fyonse ifipita mushila iya fishiba. ⁹ Yawe mwe Shikulu wesu, ishina lyenu ifyo likulilepo pa kyalo kyonse!