¹ Pano ishiwi lyaba Yawe lyalishile kuli Yona umwana wakwa Amitati, nokulabila ukuchi, ² ''Imakana kabili kabiye ku Ninive ulya umushi ukulu, kabili kalabile mubukali, pantu ububi bwabo bwaima bwafika kuli nemo. ³ Pano Yona alimine nokubutuka ukufuma kumenso aba Yawe kabili alile kutashishi. Alile ku Yopa kabili alisangile ubwato ubwaleya ku tashishi. Fyenkefyo alilipile ishakwendala kabili alile nabo ku kutashishi, ukutali ukufuma mukyeni kyaba Yawe. ⁴ Pano ba Yawe bali fumine umwela umukulu pakishiba kabili ne kuba amabimbi ayakulu pakishiba. Pakashita kanini ubwato bwalimonekele kwachi bulefwaya ukumokauka. ⁵ Nabali mubwato balyufwine umwenso kabili kila muntu alitampile ukwita pali tulesa twakwe. Baliposele ifipe ifyali mubwato mu kishiba pakuti bupubeko. Pano Yona alile mukachi umwine mubwato, kabili alilele mutulo utwine. ⁶ Umukulu wabwato alishile kuli ye nokumwebachi, ''Findo ulekita walala? Ima! ita pali kalesa kobe! Limbi ka lesa kobe kakutumona kabili tatwaonaike.'' ⁷ Onse umuntu alilabile kumupalamano wakwe, ''Iseni, tuteye ububale pakuti twishibe uwalenga ifi ifibi ifilekichika kuli fwebo fyopelefyo baliteyele ububale, kabili nobubale bwali ponene pali Yona. ⁸ Kabili balilabile kuli Yona, ''twapapatatwebeni uwalenga fyonsefi' ifibi ifilekichika kuli fwebo. Ninsankito ubomba? Wafumapi? Insa kyalo wafuma kwinsabatu?'' ⁹ Yona kalabila kuli bo, ''ni nemo umu ibulu; kabili ndachina ba Yawe ba Lesa ba mwiulu abapangile ikishiba nemushili umine.'' ¹⁰ Kabili abalalume balichinine nasana kabili balilabile kuli Yona,'' Nifindo ifi wakita?'' pakuchi abalalume balishibile alebutuka kumenso aba Yawe, pantu alibebele. ¹¹ Kabili balilabile kuli Yona,'' Findo twakukita kuli webo pakuti ikishiba kitalale?'' Sombi ikishiba kyalebelako fye namabimbi. ¹² Yona alilabile kulibo, ''Ngimyeni kabili mumpose mukishiba. Kabili ne kishiba kya kutalala, pakuchi naishiba achi nipamulandu wangi ayamabimbi ayakulu alekichika kuli mwebo.'' ¹³ Nangu nifyenkefyo, abalalume balyesheshe achi babwelele ukwali umushili, pano balifililwe pantu ikishiba kyalebipilako fye kulibo. ¹⁴ Fyenkefyo balililile kuli ba Yawe nokulabila, ''twamipapateni, ba Yawe twamipapateni, mwetuleka tufwe pamulandu wabumi bwa uno muntu, kabili mwebika imilopa shakaele pali fwebo, pamulandu wa mwebo, ba Yawe, nakita ukonka nafilya mufwaya.'' ¹⁵ Balimwimishe Yona balimuposele namukishiba, kabili ikishiba kyalilekele namakampa. ¹⁶ Kabili abantu balichinine ba Yawe apakulu. Balipele umulandu kuli ba Yawe kabili balipangile nama layo. ¹⁷ Pano ba Yawe balipekenye isabi ilikulu ilyakumina Yona, kabili Yona ali mukapafu kalisabi inshiku shitatu akasuba ne shinku shitatu ubushiku.