¹ Mose be bakulu abena Isuleli balyebele abantu ati, ''Lamani amafunde onse ayo namifundeni lelo. ² Pabushiku mukapita mu Yodani ne kuya ku kyalo ikyo ba Yawe ba mipeleni, mulilingile ukusala amabwe akulu neku asompa kabili neku ashingwila. ³ Kabili mukanembepo amashiwi onse aino mishilo ili mukapita. Pakwebati mukaye mu kyalo ikyo ba Yawe Lesa wenu bamipeleni, ikyala ikiswile ameleki ne buki, ikyo ba Yawe Lesa, Lesa wa kakolwe kwenu bamilayeni. ⁴ Ili mukabuka bushilya bwa Yodani, mukasompe aya mabwe ndemilayeni lelo, palupili lwa Ebulon, kabili ne ku ashingwila. ⁵ Kulya mukasompe nekya mulambu kyaba Yawe Lesa wenu, ikyakokelepo ikya mabwe; lomba tekwesha ukwimyapo ikyela ikili kyonse ukukibomya kulya ya mabwe. ⁶ Mulilingile ukusompa iki kyokelo kya ba Yawe Lesa wenu ne mabwe aya tangabombapo; mulilingile ukulambula umulambu wakokya enka kuli ba Yawe Lesa wenu, ⁷ kabili mulilingile nekulambula umulambu wakukwatankana nekulya kopele kulya; kabili mukaba abasangalele ku menso aba Yawe Lesa wenu. ⁸ Kabili mukanembapo palya ya ambwe amashiwi onse aapali yenkeyi mishilo apa swetelele.'' ⁹ Penka Mose ne bapapatilishi, nebena Levi, kabalabila kubena Isuleli bonse ati, ''Tulumaneni mumfwe, mwebena Isuleli: Lelo mwaba abantu baba Yawe Lesa wenu. ¹⁰ Penka mulilingile ukunakila ishiwi lyaba Yawe Lesa wenu nekunakila amafunde abo nafyonse ifi ndemyeba lelo.'' ¹¹ Kabili Mose alyebele abantu bwenka bulya bushiku ati, ¹² ''Iyi mitundu ililingile ukwimakana palupili lwa Ngelishimu mukubashukisha abantu ili mwapita Yodani: Shimyoni Levi, Yoda, Isaki, Josefi na Benjamini. ¹³ Iyi amilaka ilingile ukwimakana kulupili ulwa Ebuloni mukulukupingula imilandu: Rubeni, Gadi, Asa, Sebuloni, Dani na Nefutali. ¹⁴ Kabili abena Levi bakasuka ne kulabila kuli bonse abalalume abena Isuleli ne shiwi ilikulu: ¹⁵ Afingwe amafingo umuntu onse uyo ukapanga ikibumbwa bumbwa nangu kyakubasa, kuli ikyabunya ba Yawe, nangu kyakusungulula ikyakupagwa kumaboko, akwa sendwe nekukimakanika ukufisamikile.' Kabili abantu bonse bakasuke ati, 'Ameni.' ¹⁶ Afingwe amafingo umuntu onse ukapafya ba wishi nangu nibanyina.' Kabili abantu bonse bakalabila ati, 'Ameni.' ¹⁷ 'Afingwe amafingo uyo muntu ukatesha umupaka wampango yamunakwe.' Kabili abantu bonse bakalabile ati, 'Ameni.' ¹⁸ 'Afingwe amafingo uyo muntu uwa kupasushamo impofu munshila ne kuilengesha ukupapala.' Kabili abantu bonse bakalabile ati, 'Ameni.' ¹⁹ 'Afingwe amafingo umuntu onse utwala imilandu ya mweni mumbi, nangu ya bana banshiwa, nangu fitushi.' Kabili abantu bonse bakalabila ati, 'Ameni.' ²⁰ 'Afingwe amafingo umuntu onse ukalala na bamukaba wishi, pakuti abalengesha insoni bawishi nekubapoka insambu.' Kabili abantu bonse bakalabila ati, 'Ameni.' ²¹ Afingwe amafingo umuntu onse ukalala ne nama.' kabili abantu bonse bakalabila ati, 'Ameni.' ²² Afingwe amafingo umuntu onse ukalala ne kashi yakwe, nangu umwana umanakashi ufyelwe kuli bawishi, nangu umwanakashi ufyelwe kuli ba nyina.' Abantu bonse bakalabile ati, 'Ameni.' ²³ 'Afingwe amafingo umuntu onse ukala nemuko wakwe.' Kabili abantu bonse bakalabile ati, 'Ameni.' ²⁴ 'Afingwe amafingo umuntu onse uwipaya umubyakwe mubumfisolo.' Kabili abantu bonse bakalabile ati, 'Ameni.' ²⁵ 'Afingwe amafingo umuntu onse upoka indalama sha kufwaya ukwipaya umuntu uwakubula imilandu.' kabilili abantu bonse bakalabila ati, 'Ameni.' ²⁶ 'Afingwe amafingo umuntu onse uyo tafwaya ukwikalika amashiwi onse auno mushilo, ukwebati anakile.' Bantu bonse bakalabile ati, 'Ameni.'