¹ Aemashiwi akwa Mose ao alabile ku bena Isuleli bonse kutashi ya Yodano mumayamba, mwilungu lya nika ya Yodani mu mikolo ya Sufi, pakati ka Palani, Tofeli, Labani, Azeloti, kabili na Dizaabi. ² Lwendo lwa nshiku ikumi nabumo kufuma ku Olebi kuya ne lyakulupili lwa Seili kuya ku Kadeshi Balinea. ³ Kyalimonekele mumwaka wabu makumi ane, mu mwenshi wabu ikumi imo ne bushiku bumo, pabushiku bwakutanga ubwa mwenshi, eli Mose alabile ku bena Isuleli, ukubabula fyonse ifyo ba Yawe bamukambishishe kukumana kulibo. ⁴ Apa yali pindi panuma ba Yawe baibika mubulemo imfumu ya bena Amoli, iyaleikala mu Eshiboni, kabili na Oga imfumu ya bena Bashani, uwaleikala mu Ashitaloti ku Edilei. ⁵ Bushilya bwa Yodani, mukyalo kya Moabi, Mose alitendekele kubilika iyi mishilo, kalabila, ⁶ ''Ba Yawe ba Lesa besu balilabile kuli fwebo, ukulabila ati, 'Mwaikala sana muli kino kyalo kya mpili. ⁷ Alukeni ne kubapa lwendo lwenu, nekuya ku kyalo kya mpili ikya bena Amoli kabili ne kunkende yonse iili pabwipi kulya mwilungu lya nika ya Yodani mu mukolo, mu kyalo kya mpili, mukyalo ikili munshi, mu Negevi, kabili ku kitulu kya kishiba - ikyalo kya bena Kenani, na mu Lebanoni kufika lukoso naku nika iikulu, iya Ufaleta. ⁸ Moneni, nabika ikyalo kutashi yenu; kabiyeni ne kwingilamo kabili ne kukipoka kilya kyalo iki ba Yawe balapileni kubwishinwe - Abulaamu, Isaki kabili na Yakobi - kubapela kabili ne fifyashi fyenu ifikesa panuma yenu.' ⁹ Nalilabile kuli mwebo pali iilya mpindi, kandabila, 'Shelelwe kumimpinta mwebo bushimwa bwangi. ¹⁰ Ba Yawe ba Lesa wenu bamufusha, kabili, moneni, mubushiku bwa lelo muli kinkupiti kya bantu bwingi koti tubangabanga twa mwiulu. ¹¹ Ba yawe, ba Lesa waba wishimwe, bamilenga ukuba makana pa makana ukukila fyo muli lelo, kabili ne kumipaleni, koti nifyo bamilaileni. ¹² Lomba nga nemo bushimwa bwangi nakupinta shani ifipinto fyenu, kukatasha kwenu, kabili ne kutosha kwenu? ¹³ Salululeni abalalume ba mano, ba milangwe, kabili abalalume abaline bwikashi bwelelwe ku bantu abafuma pamukoka pamukoka, kabili nkabalenga bakabe bakulu pali mwebo.' ¹⁴ Mwalingasukile ne kulabila ati, 'Ikintu mwalabila kiweme kuli fwebo ukukita ¹⁵ Nkashi nali bilile abakulu bonse bapafikota, abalalume bamano, kabili abalalume ababwikashi ubwelele, kabili nalibalengele ukuba bakulu pali mwebo, ifilolo fyapa makana, ifilolo ifya pa mañanda, ifilolo fyapa makumi asno, ifilolo ifys pa makumi, kabili ne filolo, pakikota pa kikota. ¹⁶ Nalikambishishe abapingushi pali ilya mpindi, nalabila, 'Mukoumfwa ukutosha kwapakati kabalongo benu, kabili ne kubapingwila bwino kulungeme pakati ka muntu ne mulongo wakwe, kabili ne mwina fyalo uuli naye. ¹⁷ Mwikakita imisalululo kuli uuli onse mukutosha; mukomfwe ku munini ne mukulu pamo. Mwikaba ne mwenso wakinso kya muntu, pakuti bupingushi bwa ba Lesa! ¹⁸ Nalimikambishe pali ilya pindi ifintu fyonse ifyo mufwile ukukita. ¹⁹ Twalwendele nekufuma ku Olebi ne kuya mukupita mu mayamba onse aakulu aalenga ne mwenso ao mwamwene, munshila yesu yesu kuya ku kyalo kya bena Amoli, koti nifyo ba Yawe ba Lesa wesu batukambishishe; kabili twalishile ku Kadeshi Balinea. ²⁰ Nalilabile kuli mwebo, 'Mwaisa ku kyalo kya mpili kya bena Moabi, ikyo ba Yawe ba Lesa wesu bakopana kuli mwebo. ²¹ Moneni, ba Yawe ba Lesa wesu babika ikyalo kutanshi enu; kabiyeni, kikale kyenu, koti ba Yawe ba Lesa ba bawishimwe, ifyo balabile kuli mwebo; mwibane mwenso nangu ukunakishiwa.' ²² Bonse pali mwebo mwalishile kuli nemo ne kulabila ati, 'Lekeni tutumeko abantu kutanshi yesu, pakwebati bakatufwaile fwaileko bwino, ne kutubweshesha amashiwi pafyo tungakita pakulukuka, ne ku mishi iitukesamo. ²³ Ayo amano alisekeshe makosa; nalisendele abalalume ikumi imo na babili ba muli mwebo, umwalalume umo umo pakikota. ²⁴ Balimine ne kuya mukyalo kya mpili, ne kwisa ku kyalo kya mukolo wa Eshikoli, ne ku kipesapesa. ²⁵ Balipinchile ifisepo fya mukilya kyalo mu maboko abo ne kuleta kuli fwebo. Kabili balituletele ne mashiwi ne kulabila ati, ''kyalo ikiweme ikyo ba Yawe ba Lesa wesu bakotupela. ²⁶ Sombi mwebo mwalikene ukubalukuka. Lomba mwalyalukile umukambisho waba Yawe ba Lesa wenu. ²⁷ Mwali lishanishishe mu matente enu ne kalabila ati, ''Nipa mulandu wakwebati ba Yawe balitupatile ekibatufumishe mu kyalo kya Ijipita, nekutupana mu maboko abena Amoli pakuti batonaula. ²⁸ Nga nikwisa ukutwa kuya? Abalongo besu balenga imitima shesu kusungulika, pa kulabila ati, 'Balya bantu ba panfi ne kwina kabili balilepele ukukila fwebo; imishi yabo ikulu ne kuba ne malinga aafikile lukoso na kwiulu; ukukilapa, twamona abana balalume ba bena Anakimu mulya.''' ²⁹ Penka nalilabile kuli mwebo, 'Mwiba ne kutina nangu kuba ne mwenso wakubatina yo-oo. ³⁰ Ba Yawe ba Lesa webu, abaya kutangile yenu, bakamulwileni, koti fyonse ifyo bakitile mu Ijipiti kutanshi ya menso enu, ³¹ Kabili na mumayamba, umo mwa mwene ifyo ba Yawe ba Lesa wenu bamimpintileni mwebo, koti fyenka umwalalume ampinta umwanawakwe umwalalume, konse uko mwaleya paka ne fyo naishile kuli inwe nkende.' ³² Sombi nangu kwali ili shiwi tamwabasuminepo ba Yawe ba Lesa wenu, ³³ abaile kutanshi yenu mukumi mweneni nkende yakusompapo inkambi, mu mulilo bushiku kabili na mwi kumbi akasuba. ³⁴ Ba Yawe balyumfwile amashiwi enu kabili balufulilwe; balapa ne kulabila ati, ³⁵ 'kyakine takulipo umo palibaba balalume bamuli ii nkulo ya bubifi bakamona ikyalo ikiweme ikyo nalapile ukukipela kufikolwe fyabo, ³⁶ Kufumyako lukoso Kalebi mwana umwalalume wakwa Yefune. Ena akakimona kabili kamupela neba muki fyashi kyakwe ikyalo ikyo angatilepo, pakuti kakonka makosa ba Yawe.' ³⁷ Kabili ba Yawe balinfulilwe nemo mulandu wa mwebo, kalabila, 'kabili na webo tawakengilemo mulya yo-o, ³⁸ Yoshiwa mwana umwalalume wakwa Nuni, uwaimakana kutanshi yobe, akengila mulya; mukoshe, pakuti eukatangilila bena Isuleli mukukipyana. ³⁹ Ukulundapo, abana benu banini, benka abo mwalabile ati bakabamulukatasho, aba mu bushiku bwa lelo tabalipo nekwishiba ikiweme nangu ikibipile - ebakengila mulya. Kulibo nkabapela,kabili bakakipoka. ⁴⁰ Lomba kuli mwebo, imeni ne kutendeka ulwendo mu mayamba kupita ku nika ya kukashika. ⁴¹ Penka mwalyasukile ne kulabila kuli nemo ati, 'Twapanga ububi kuli ba Yawe; tukaya ne kulwa, kabili tukakonka fyonse ifyo ba Yawe ba Lesa wesu batukambisha ukukita.' Umwalalume onse muli mwebo aliikakile amata akondo, kabili mwlipekanishishe ukulukuka ikyalo kya mpili. ⁴² Ba Yawe balilabile kuli nemo, 'Labila kulibo, ''Mwibalukuka kabili mwilwa, pakuti shakekale na mwebo, kabili bakamikifya kubalwani benu.' ⁴³ Nalilabile kuli mwebo muiidhila, Lomba tamwangufwile yo-o. Mwalyalukile umukambisho waba Yawe; mwali ne fitala kabili ne kuya mukulukuka ikyalo kya mpili. ⁴⁴ Lomba abena Amoli, abekala mu kyalo kya mpili, balimifumine posonde ne kumitafya koti ni nshimu, kabili ne kumipakawila pakawila mu Seila, kufika lukoso naku Olima. ⁴⁵ Mwalibwekeleko kabili ne kulila kutanshi yaba Yawe; Lomba ba Yawe taufwile ku mashiwi yenu yo-o, nangu kuposako amano kuli mwebo yo-o. ⁴⁶ Kanshi mwaikele mu Kadeshi ishinku ishingi, ishinku shonse mwaikele mulya.