¹ Umwalalume umuntu waba yawe alishile ukufuma mu Yuda kwishiwi lyaba yawe ku Beteli.Yeloboam ali kaemakene ku kyalo mukokya ubunga bwakena akasuma. ² Alibilikile kwi shiwi lyaba yawe ukwalukila ikyokelo: "kyokelo, kyokelo! ifi efyalabila bayawe, mona, umwana umwalalume uweshina lya Yosiya akafylwa ku kifyashi kyakwa Davida, kabili pali webo akalambwilapo abapapatilishi aba pamapunsha aapamulu abo pano abakookya ubunga bwakokya ubwakena akasuma pali webo.Pali webo bakokyelapo amafupa abantu.''' ³ Penka umwalalume umuntu waba lesa alipene ikilangililo bwenka bulya bushiku bumo, kalelabila, "iki ekilangililo bayawe balabila: 'mona, ikyokelo kikakanapo, kabili ne matoi aali palikyo akafukumukako."' ⁴ Ili ifumu yaufwile ifyo umwalalume umuntu wa balesa alabile ati, abilika ukwalukila ikyokelo kya ku Beteli, Yeloboam alitanikile ukuboko kwakwe ukufuma ku kyokelo, kalelabila, "mwikateni."Penka ukuboko uko atanikile ukwakwalukila umwalalume, kwalwumine, pakuti tekuti akubweshepo kuliye umwine yoo. ⁵ (kyokelo kabili kyalyakenepo kabili ne matoi ali fukumukilepo pa kyokelo, koti nifilya kyalangile ikilangililo ikyo umwalalume umuntu waba lesa apene ukukonka ne shiwi lyaba yawe.) ⁶ Imfumu Yeloboam yalyasukile nekulabila kumwalalume umuntu waba lesa, "ndombeleko kunkumbu yaba yawe ba lesa bobe ne kutembelelako, pakuti ukuboko kwangi kubwekele kuli nemo libili koti ifyo kwali."Kanshi umwalalume umuntu waba lesa alitembele kuli ba yawe,kabili ne kuboko kwa mfumu kwalipakutanga. ⁷ Imfumu yalilabile ku mwalalume umuntu waba lesa, "Isa kuñganda nanemo kabili utusheko wemwine, kabili kakupela ikilambu." ⁸ Umwalalume umuntu waba lesa alilabile kumfumu, "nangu kyakwebati mwapela kabeya kamo aka bononshi bwenu, shayepo namwebo yoo, nangu ukulya kalyo nangu ukunwa amenshi muli inwepunsha, ⁹ pakuti bayawe balinkambishishe ne shiwi lyabo, 'wikalya umukate yoo nangu ukunwa meenshi, nangu ukubwekela inshila wakishilamo yoo."' ¹⁰ Kanshi umwalalume umuntu waba lesa alile inshila imbi kabili tabwekelepo ku ñganda kwakwe ukubofya inshila ii aishilemo ku Beteli yoo. ¹¹ Pano kwali ñganga waba lesa umukote uwaleikala mu Betili, kabili umwana wakwe umo umwalalume pa bana bakwe abalalume alishile nekumubula fyonse ifintu ifyo umwalalume umuntu waba lesa akitile bulya bushiku. Abana bakwe abalalume balimwebele kabili amashiwi ao umwalalume umuntu wabalesa alabile ku mfumu. ¹² Wishibo alilabile kulibo, "akilola isa pakuya?" pano abana bakwe abalalume balimwene inshila umwalalume umuntu wabalesa ukufuma ku Yuda abofyeshe pakuya. ¹³ Kanshi alilabile ku bana bakwe abalalume, "mbikilenipo ikya kwikalapo pa mbongolo."Kanshi balibikilepo ikya kwikalapo pa mbongolo kabili alinishilepo nekuya. ¹⁴ Ñganga wa balesa alile nekukonkela umwalalume umuntu waba lesa kabili alimusangile alikele munshi ya kiti kya Oka; kabili alilabile kuliye, "niwebo umwalalume umuntu waba lesa uwaishile ukufuma ku Yuda?" alyasukile, "ni nemo." ¹⁵ Penka iñanga yabalesa umukote alilabile kuliye, "isa nanemo ku ñanda kabili ne kulya kalyo." ¹⁶ Umwalalume umuntu waba lesa alyasukile, "shabwekelepo nawebo yoo nangu ukuya nekwingila nawebo koku, shalyepo akalyo nangu ukunwa meenshi nawebo muli ii punsha yoo, ¹⁷ pamulandu wakwebati nalikambishiwe kwi shiwi lya bayawe, 'wikalya kalyo nangu ukunwa meenshi kulya yoo, nangu ukubwekela munshila wakishila pakwisa yoo."' ¹⁸ Kanshi umukote ñganga waba lesa alilabile kuliye, "nanemo nji ñanga ya balesa koti ifyo uli webo, kabili malaika akingeba ukukonka ne shiwi lya ba.yawe, kalelabila, 'mubwekeshe ku ñanda yobe, pakuti alye akalyo ne kunwa meenshi."' Lomba alebepa ku mwalaluume umuntu wa ba lesa. ¹⁹ Kanshi umwalalume umuntu wa balesa alile ne kubwekelamo ne mukote ñganga yaba lesa kabili alilile akalyo ne kunwa ameeshi. ²⁰ Ili baikele kwi tebulu, ishiwi lya bayawe lyalishile ku ñnnga wa ba lesa uwamubwekeshemo, ²¹ kabili alibilikile ku mwalalume umuntu wa balesa uwaishile ukufuma ku Yuda, kalelabila, "Bayawe balabila, 'pamulandu wakwebati taunakilile kwishiwi lya ba yawe kabili tausungile umukambisho waba yawe balesa bobe bakupeele yoo, ²² Lomba wabwekelamo kabili walya akalyo kabili ne kunwa ameenshi mu punsha umo bayawe bakwebele ukubula ukulya kalyo ne kunwa meenshi yoo, umubili obe takashikwepo mu kabuli kabakulu bobe koku."' ²³ Panuma yakulya kalyo kabili panuma yakunwa, iñanga ya balesa yalibikile ikyakwikalapo pa mbongolo wa mwalalume umuntu waba lesa, umwalalume uwabwekele naye. ²⁴ Ili umwalalume umuntu waba lesa aile, inkalamu yalikumene nakwe pa nshila kabili ne kumwipaya, kabili ne mubili wakwe alishele mu nshila.Penka imbongolo yalimakene kumubili kabili nenkalamu yalimakene ku mubili. ²⁵ Ili abantu abalalume bapitileko ne kumona umubili kashele alala pa nshila, kabili ne nkalamu kaimakene kumubili, balishile kabili ne kukyeba mu mushi umwaleikala iñganga yaba lesa umukote. ²⁶ Ili iñanga ya balesa iyamubwekeshemo yaumfwile fi, yalilabile, "uyo umwalalume umuntu wa balesa uo tanakile ishiwi lya bayawe. fyo pelefyo bayawe balimupene ku nkalamu, iyamutabawile tupimfwa tupimfwa kabili ne kumwipaya, koti nifyo ishiwi lya bayawe lya mukengeshe." ²⁷ Kanshi iñanga ya balesa umukote kalabila kubana bakwe abalalume, kalelabila, "mbikile ikyakwikalapo pa mbongolo,"kabili balibikilepo. ²⁸ Alile kabili ne kusanga umubili ali mushila, kabili imbongolo ne nkalamu filimakene ku mubili. Inkalamu tailile umubili yoo, nangu ukulukuka imbongolo. ²⁹ Iñanga yaba lesa yaliminye umubili wa mwalalume umuntu wa balesa, nekumubika pa mbongolo, kabili ne kumubwesha ne kumushika . ³⁰ Alibikile umubili mu kabili kakwe umwine, kabili bali mulosheshe, kalelabila, "yoyoyo, mulongo wangi umwalalume!" ³¹ Penka panuma yakumushika, iñanga umukote alilabile ku bana bakwe abalalume, kalelabila, "kani kamfwa, mukanshike mu kabuli umwashikwa umwalalume, umuntu wa balesa. Mukabike amafupa angi ku mafupa akwe. ³² Pakuti imbila abilikile ukukonka ne shiwi lya lesa, aya kwalukila ikyokelo ikili mu Beteli kabili ne kwalukila amañanda onse aali pa mpunsha apamulu munshi ya Samaliya, kyakine fikamoneka." ³³ Panuma yafifi Yeloboam tapilibukilepo nekufuma kunshila yakwe iya bubifi koku, lomba alitwalilikile ukusonta abapapatilishi yaweyawe ukuba pa mapunsha aapamulu ukufuma lukoso mubantu abali bonse lukoso. Uyo onse uufwile abomba alimushilikile ukuba umupapatilishi. ³⁴ Imilandu iyi yalikele bubifi ku kifyashi kyakwa Yeloboam kabili bwalilengele ikifyashi kyakwe kyalyongukile kabili kyalifumishiwe pano pesamba ya kyalo.