¹ Ba le bantsi ba lekile go bega ka ga dilo tse di rurifadiwang mo go rona, ² jaaka ba re di begetse, rona ba e rileng go tswa tshimologong ra bo re le basupi le batlhanka ba molaetsa o. ³ Ka jalo ke bona go ntshwanetse - ke sena go tlhotlhomisa ditiragalo tse go tswa tshimologong -go go kwalela polelo e e lolameng, Theofilo yo o molemo. ⁴ Gore o itse boammaruri jwa dilo tse o di rutilweng. ⁵ Mo malatsing a ga Kgosi Herote wa Jutea, go ne go le moperesita mongwe a bidiwa Sakarea, wa setlhopha sa Abija. Mosadi wa gagwe e le mongwe wa barwadia Arone, a bidiwa Elisabetha. ⁶ Ba ne ba le tshiamo mo matlhong a Modimo, ba obamela melao le ditaelo tsa Morena. ⁷ Mme ba sena ngwana ka gonne Elisabetha o ne a le moopa, mme ba setse ba tsofetse ka nako eo. ⁸ Jaanong ga diragala gore Sekarea a bo a le mo tempeleng, a dira ditiro tsa boperesite go yeng ka fa setlhopheng sa gagwe. ⁹ O ne a tlhophilwe ka khupele khupele go ya ka fa mokgweng wa tlwaelo ya go tlhopha yo o tla a direlang mo tempeleng ya Morena go tshuba maswalo. ¹⁰ Botlhe ba ne ba rapela kwa ntle ka nako ya maswalo a tshubiwa. ¹¹ Moengele wa Morena a bonala mo go ene, a ema ka fa mojeng wa aletare ya maswalo. ¹² Fa Sekarea a mmona a tshoga thata. ¹³ Mme Moengele a mo raya a re ''Se boife, Sekarea, ka gonne thapelo ya gago e utlwilwe. Mosadi wa gago Elisabetha o tla go tsholela morwa. Mme o tla mmitsa Johane. ¹⁴ O tla itumela o ipela, ba le bantsi ba tla ipelela go tsholwa ga gagwe. ¹⁵ Gonne ene o tla nna mogolo mo matlhong a Modimo. A seka a nwa mofine kana bojalwa jo bo bogale, o tla tladiwa ka Moya yo o Boitshepo go tswa mo sebopelong sa ga mmagwe. ¹⁶ Mme Baiseraela ba le bantsi ba tla retologela ko Moreneng Modimo wa bone. ¹⁷ O tla a etelela Morena pele ka moya le nonofo ya ga Elija. O tla a dira se go retolola dipelo tsa bo rraabana ko baneng, gore ba ba kgopo ba tsamae mo botlhaleng jwa basiami-go ba baakanyetsa go dumela molaetsa wa Modimo.'' ¹⁸ Sekarea a raya moengele a re, ''Ke ka tlhomamisa se jang? Ka ke monnamogolo le mosadi wa me o tsofetse.'' ¹⁹ Moengele a mo araba a re, ''Ke Gabariele, yo o nnang teng mo boleng teng jwa Modimo. Ke romilwe go bua nao, go go tsisetsa mafoko a a molemo a. ²⁰ Mme bona, o tla nna semumu, go fitlhelela dilo tse di diragala .Ka gonne ga o a ka wa dumela mafoko a me, a a tla a rurifadiwang ka nako e e siameng.'' ²¹ Batho ba bo ba emetse Sekaria. Ba gakgamaletse gore o diegile mo tempeleng. ²² Mme e rile a tswa, a bo a sa kgone go ba buisa. Ba lemoga gore o nnile le tshenolelo a le mo tempeleng. A tswelela a bua le bone ka diatla a ntse a didimetse. ²³ Mme ga diragala fa malatsi a bodiredi jwa gagwe a tla bokhutlong, a boela lapeng. ²⁴ Morago ga malatsi a, mosadi wa gagwe Elisabetha a ima. A itswalela dikgwedi di le tlhano, a re ²⁵ ''Se ke se Morena a se ntiretseng ka a ntlhomogetse pelo a tlosa ditlhong tsame fa pele ga batho.'' ²⁶ Mo kgweding ya borataro ,Moengele Gabariele o ne a rongwa go tswa ko Modimong go ya toropong ya Nasaretha mo kgaolong ya Galalea, ²⁷ ko lekgarejwaneng le le neng le bidiwa Marea le le beeleditsweng ke Josefa. E le wa ntlo ya ga Tafite. ²⁸ A tla mo go ene a re ''Dumela, wena mosegofadiwa wa Modimo! Morena o na le wena.'' ²⁹ Mme a tsietsega thata ka ntlha ya mafoko, a ipotsa gore ke madume a mofuta o fe one a.'' ³⁰ Moengele a raya Marea a re, ''Se boife, Marea, gonne o bone lesego mo Modimong. ³¹ Bona o tla ima e bile o tla tshola ngwana wa mosimane .O tla mmitsa leina o re 'Jeso.' ³² O tla a nna mogolo ebile o tla bidiwa morwa Mogodimo. Morena Modimo o tla mo fa setilo sa bogosi sa ga Tafite rragwemogolo. ³³ O tla busa ntlo ya ga Jakobe go ya bosakhutlheng le puso ya gagwe e tla nna go ya go ileng.'' ³⁴ Marea a raya moengele a re, '' Se se tla a diragala jang, ka ke sa itse monna?'' ³⁵ Moengele a mo araba a re, ''Moya yo o Boitshepo otla a tla mo go wena, le nonofo ya Mogodimo e tla go apesa. Mme yo o boitshepo yo o tla a tsholwang o tla bidiwa Morwa Modimo. ³⁶ Bona, Elisabetha yo e leng lesika la gago le ene o imile morwa mo botsofeng jwa gagwe .O mo kgweding ya borataro, ene yo o neng a bitswa moopa. ³⁷ Gonne ga gona se se sa kgonegeng mo Modimong.'' ³⁸ Marea a re, ''Bona ke motlhanka fela wa Morena . A go ntiragalele go ya ka fa molaetseng wa gago.'' Moengele a tswa fa go ene. ³⁹ Foo Marea a nanoga a ya ko lefatsheng le le dithaba, ko toropong ya Jutea. ⁴⁰ A tsena mo ntlong ya ga Sekarea a dumedisa Elisabetha. ⁴¹ Ga diragala gore fa Elisabetha a utlwa madume a ga Marea, ngwana mo sebopelong sa gagwe a tlola, mme Elisabetha a tladiwa ka Moya yo o Boitshepo. ⁴² A bua ka lentswe le le ko godimo a re, ''O sego mo basading, leungo la sebopelo sa gago le lone le segofetse. ⁴³ Mme ke eng go diragetse gore mma Morena wa me a bo a tlile ko go nna. ⁴⁴ Gonne bona, fa ke utlwa madume a gago fela ngwana yo o mo sebopelong same a tlola ka boitumelo. ⁴⁵ E bile go sego yo o dumetseng fa se a se boleletsweng ke Morena se tla diragala.'' ⁴⁶ Marea are, '' Pelo ya me e baka Morena, ⁴⁷ le mowa wa me o itumetse mo Modimong mmoloki wa me. ⁴⁸ Gonne o bonye bobotlana jwa motlhanka wa one. Gonne bona, go tloga fano dikokomana tsotlhe di tla mpitsa mosegofadiwa. ⁴⁹ Gonne ene mothataotlhe o ntiretse dilo tse di kgolo e bile leina la gagwe le boitshepo. ⁵⁰ Boutlwelo botlhoko jwa gagwe bo ntse go tswa mo kokomaneng go ya kokomaneng mo go ba ba mmoifang. ⁵¹ O supile maatla ka letsogo la gagwe; o phatlhaladitse ba ba neng ba ikgogomositse ka dikgopolo tsa dipelo tsa bone. ⁵² O tlositse magosana mo mebusong, a tlhatlosa ba ba botlana. ⁵³ O file batlhoki dilo tse di molemo, mme a koba bahumi ba iphotlhere. ⁵⁴ O thusitse Iseraela motlhanka wa gagwe, gore a gakologelwe go supa kutlwelobotlhoko ⁵⁵ (jaaka a reile bo rraarona) ko go Aborahama le kokomane ya gagwe go ya bosakhutlheng.'' ⁵⁶ Marea a nna le Elisabetha dikgwedi di ka nna tharo a bo a boela ko ga gagwe. ⁵⁷ Jaanong nako ya ga Elisabetha ya pelegi ya tla a tshola morwa. ⁵⁸ Baagisanyi le masika a gagwe ba utlwa fa Morena a mo utlwetse botlhoko, ba ipela nae. ⁵⁹ Ka letsatsi la boferabobedi ba tlisa ngwana go tla go rupisiwa, ba ne ba ka mmitsa ''Sekarea,'' jaaka rraagwe. ⁶⁰ Mme mmaagwe a araba a re, ''O tla a bidiwa Johane.'' ⁶¹ Ba mo raya ba re, ''Ga go na ope yo o bidiwang Johane mo lesikeng la gago.'' ⁶² Ba supa ka diatla ba bontsha rraagwe gore ba batla a bitswa mang. ⁶³ Mme rraagwe a kopa lentswe, a kwala a re, ''leina la gagwe ke Johane.'' Se sa ba gakgamatsa botlhe. ⁶⁴ Ka bonako a mumologa a bua a bo a paka Modimo. ⁶⁵ Baagisane ba tlelwa ke poifo, polelo e ya anama mo lehatsheng la Jutea. ⁶⁶ Le botlhe ba ba e utlwang ba nna ba e gopotse ba ipotsa gore ''ngwana yo o tla nna motho wa mofuta ofe?'' Gonne letsogo la Modimo le ne le le mo go ene. ⁶⁷ Rraagwe e bong Sekaria a tladiwa ka Moya yo o Boitshepo mme a porofita a re, ⁶⁸ ''A go bakwe Morena, Modimo wa Iseraele, ka gonne o tlile go re thusa le go golola batho ba gagwe. ⁶⁹ O re tsoseditse lenaka la poloko mo ntlong ya motlhanka wa gagwe Tafite, ⁷⁰ jaaka a buile ka melomo ya baporofite ba gagwe ba ba boitshepo ba bogologolo. ⁷¹ O tla a re golola mo babeng ba rona le mo go ba ba re tlhoileng. ⁷² O tla a dira se go utlwela botlhoko bo rraarona le go gakologelwa kgolagano ya gagwe e e boitshepo, ⁷³ Kgolagano e a e buileng le Aborahame rraarona. ⁷⁴ O ikanne go re e neela, gore e re re e golotswe mo letsogong la baba ba rona re mo direla re sena poifo, ⁷⁵ re le boitshepo le tshiamo fa pele ga gagwe malatsi otlhe a rona. ⁷⁶ Ee, mme wena, ngwanaka, o tla bitswa moporofita wa mogodimodimo, gonne o tla etelela pele Morena go baakanya ditsela tsa gagwe, le go baakanyetsa batho go tla ga gagwe, ⁷⁷ go itsise poloko le boitshwarelo jwa dibe mo bathong ba gagwe. ⁷⁸ Se se tla diragala ka ntlha ya mautlwelo botlhoko a Modimo, Yo ka ene re tlhabetsweng ke lesedi go tswa godimo go tla go re thusa, ⁷⁹ go phatsimela ba ba ntseng mo lefifing le mo moriting wa leso, go goga dikgato tsa rona mo ditseleng tsa kagiso.'' ⁸⁰ Jalo ngwana a gola a tia mo moweng, mme a nna mo sekakeng go fitlhelela letsatsi la a itshupa mo Iseraele.