¹ Njigno ze vola ze tsinara gn'Yaveh taminareo zao, nareo ndaty Israely, amy longo iaby reo ze nindeseko hiboake ty tane Egypta: ² "Inareo avao ro finiliko amy longo iaby reo ambone tane eto. Naho izay, le hofaizeko nareonaho hadisoagnareo iaby reo." ³ Feie vao hiarake hindeha ty roe laha tsy nirae hevetse iereo? ⁴ Feie vao hitrero agnala agne ty liona laha tsy misy haza re? Feie vao hitrero andavane ao ty liona anane laha tsy nahazo ndre ino ndre ino re? ⁵ Feie vao afake mitonta agnate fandrike amity tane etoy ty voro laha tsy misy talivarara vitapetake ho aze? Feie vao hihily ty fandrike amity tane etoy laha tsy nahazo ndre ino ndre ino re? ⁶ Hagneno an-tana ao vao ty trompetra ka tsy hangitikitike ty ndaty? Ho avy an-tana ao vao ty loza laha ysy Yaveh ro nandefa izay? ⁷ Azo antoke vao fa tsy hanao ndreino ndre ino ty Tompo Yaveh laha tsy mitalily vetsevetsene reo amy mpitokyne mpanompone reo re. ⁸ Ia ro tsy hatahotse; laha nitrero ty liona? Fa nivola ty Tompo Yaveh, ia ro tsy hitoky? ⁹ Atalilio amy fiaro mafe Asdoda reo agne zay, vaho amity fiaro mafe ty tane Egypta agne; volagno tihoe: "Mivoria nareo amy vohy Samaria reo egne vaho henteo ty fifandognabey ze amine ao, vaho ino ty fijalea amine ao. ¹⁰ Fa tsy mahay ty fanova ty mare iereo-izay ro fitalilia gn'Yaveh-Magnajary hereloha naho harava amity mandane ao iereo." ¹¹ Naho izay, izao ro tsarae gny Tompo Yaveh tihoe: "Hameno ty tane ty fahavalo. Handrava fiaronao mafe reo re vaho handrobake manadagnao reo. ¹² Ezao ro tsarae gn'Yaveh: "Manahake ty famonjea ty mpiambe agnodry ty tomboke roe avao amity vava ty liona, na ambi-tsofy, ro hamonjea ty ndaty Israely ze mitoboke a Samaria agne, anjoron-tseza eo avao, na kea anjoron-parafara eo avao." ¹³ Minjajigna vaho mitsangana ho vavolombelo mandietse ty longo i Jakoba-Izao ro fitalilia natao ty Tompo Yaveh, Zagnahare Tompo ty maro: ¹⁴ Fa amity andro ze hamaizako hadisoa gn'Israely reo, le ho faizeko avao kea ty alitara i Betela. Hotampaheko tsifa alitara reo vaho hitonta amity tane. ¹⁵ Horavako ty tragno asara miarake amity tragno fahavaratse . Ho simba ty tragno ivory vaho tragnobey reo le hanjavo,_izay ro fitalilia gn'Yaveh."