¹ Ezao ro tsarae Yaveh: "Naho hadisoa telo Moaba reo, mare, na efatse aza, le tsy hagnafake ty fagnalilova raho, satria iereo le nagnoro reo taola ty mpanjaka Edoma ho sokay. ² Handefa afo amy Moaba eo raho, vaho Haravako ty fiaro mafe Kiriota, ho mate agnate ty Kotaba ao naho korake vaho ty feo ty anjomara i Moaba. ³ Haravako ty mpitsara amine ao, vaho ho vonoeko miarake amine ty roandria iaby, "hoasa Yaveh. ⁴ Ezao ro tsarae Yaveh: "Naho reo hadisoa telo i Joda, mare na efatse aza, le tsy hagnafake ty fagnafaiza raho, satria iereo le nagnary ty lily Yaveh vaho tsy niambe liline reo. Nampandeha iereo tagne amity lalan tsy mare ty vande gniereo, le nandeha nagnorike izay avao kea razane reo. ⁵ Handefa afo amy Joda eo raho, vaho haleve reo fiaro mafe Jerosalema." ⁶ Ezao ro tsarae Yaveh: "Naho reo hadisoa telo Israely, mare efatse aza, le tsy hagnafake ty fagnafaiza raho. Satria avily gniereo volafoty ty tsy manan-tsiny vaho ty tsy mana ho kapa. ⁷ Nagnidia ty loha ty tsy mana manahake ty fagnitsaha ty ndatty lemboke amity tane iereo; nandroake ty osa iereo. Ty lahilahy naho ty raene le sambe miarake amity ampela raike avao vaho mandoto ty agnarako masy. ⁸ Miroro agnila ty alitara iaby eo amity siky azo tamity antoke iereo, vaho agnanjomba Nagnahare ao iereo ro hinomane ty divae ze bakamy reo faize. ⁹ Nefa fa rinavako tagnoloa gniereo eo ty Amorita, ty halava gnizay le manahake ty halava ty sedera, nimafe manahake Oka reo. Fa rinobako ty voane ambone, naho ty vahane ambane. ¹⁰ Vaho kea, ninday anareo niboake bakagne amity tane Egypta raho ka nitarike anareo efapolo tao tagnefetse agne mba hahazoa ty tane ty Amorita. ¹¹ Nanondrotso mpitoky bakamy anakelahinareo reo naho Nazirita bakamy somonjara nareo reo raho. Feie vao tsy izay, nareo vahoa Israely?-Izay ro fitalilia gn'Yaveh. ¹² Nefa nareo le nandresy lahatse Nazarita reo hino divae vaho nandily mpitoky reo tsy hitoky. ¹³ Ingo, hagnitsake anareo manahake ty fagnitsaha ty sarete feno vare ty ndaty raho. ¹⁴ Tsy hahisake hilaisa ty ndaty fetse; tsy hampitombo ty herene ty matanjake; na ty mafe hahavonje ty vatane. ¹⁵ Tsy hahatsanga ty mpandefa kiditse; tsy ho tafa lay ty mpilay mahimba; tsy hahavonje ty vatane ty mpitikitsovaly. ¹⁶ Na le ty mpialy be herem-po aza le hilay tsy aman-tsiky amy ze andro zay-Izay ro fitalilia gn'Yaveh."