¹ Nze wunu wuya giese mapaana ma baada bambaana, si wigi nawa, ² yabaaga ni gubiyi gunu guwuya mono bagwene, nzege se wugu sala nga biwi, wuya lugieseene duumbu nzege beene. ³ Nze wutu mudigi Nzaama mu pimi? Nze ni buwini bingi ya misi minde? ⁴ Nzaama wugu zila ni wusobo mugeleene waaga. ⁵ Nze wunu wuya kono guzolo gusobo, matu gusala nzege. Nzaama gini saamasa hoso muudu mu bisala biana yataa maana maama. ⁶ Gini wa hoso muudu matabisi mana mama fana ande nde. ⁷ Bana baya sala mapimi bini baga moono wu mvulande mvulu, ⁸ asi bana baya sala gubiyi bini baga duumbu; ⁹ bini gala mu pasi ande kiene mu bufugu bu nsugu, ¹⁰ asi baada bana baya sala mapimi ande gusaga lugugu lu Nzaama, bini gala mu mugieme; Nzaama gini badala mu disi lupimi mu bufugu bunu ¹¹ ginaga nde lowo gigi ande gadongo. Bini mono tomo pasi bayudu, bigaana bimbaana mangooyo; bini mono se mugieme tomo bayudu, bigaana bimbaana mangooyo. ¹² Baada bana bakono guyaba misigi mi Mose lowo bini basaamasa mu misigi mini mu gubiyi gibiwi, nga baada bana bayaba misigi mini, ¹³ asi bana bamiyaba bini basaamasa labeene mapaana maba yaba mutulu hoso muudu gigi mu gumi saleene mu guzolo gwana. ¹⁴ Gifa gimoso nga baada ba bigaana bimbaana bana bama kono misigi mini, asi munu gumisaleene ¹⁵ ginaga Nzaama gaguumunuga baada bana baya zidisi misigi, asi lowo ni bana baya miwugu, asi gukono gumi saleene, manungu mabiwi maya badwala mu nzili .... ¹⁶ Mu bufugu bu nsugu misigi bumini bingisi baada bamoso, bumini belese baada bambaana, labeene mapaana bmigi mu kebe ga Ndaga-Nzaama. ¹⁷ Nze muudu wunu wuya lusigisi ni wigi muyudu, wuyaba misigi, wuya longo baada bambaana, wuya leese bifa-misi nzili, ¹⁸ lowo wuya zolo ni baada basalaaga ginduumu ni lowo bbasaamaaga bidegi, ¹⁹ abunu si nzege wuyaya sala ginduumu ande guwibi bidegi mu manzo ma Nzaama ma baada bana? ²⁰ Ni nze wuyaba misigi, abunu si wumi saleneege? ²¹ Nze wuya milongo baada bambaana peele, nzege lowo? ²² Wuya longo baada ni bakono guwibi, asi nzege munu gwa wibi; ²³ wuya longo misigi mi Nzaama, asi wuya muwa Nzaama nsono daanga lu wuyaya zwa misigi miana. ²⁴ Mugaana wu Nzaama wuya dodo ni bayudu bigi mu gudugusu Nzaama gugele baada ba bigaana bimbaana. ²⁵ Guyaadigi gunze labeene misigi mibini kiwi guya monogoso ni nze lowo wuya laba misigi? ²⁶ Ni muudu wuba kono guyaadigi wulaba misigi, wumi zidisa, Nzaama lowo gini museene ngagwi ni bamu yaadigi? ²⁷ Muudu wunu bugini gufuunu nze muyudu wunu wuba yaadigi mutulu guyaadigi gunze gwigi gu gimuudu, gu muswini, asi lowo gwigi gu mudimaaga, lowo wuya sala mapaana migi mu misigi, gisi mapaana ndemana maba sonogo mu misigi maya nanga misigi. Guyaadigi gunze gwigi gupamba. ²⁸ Muyudu mupimi gwigi wunu wuya laba mapaana maba sonogo, ²⁹ asi lowo ni wunu wuba yaadigi, asi mu mudimi Muhunga-Nzaama lowo gwana, gamu lumusaaga gwana Nzaama, asi nde baada bamu lumusa.