¹ Yitu nudumusu paangabisi wu mukaada, Folowebe, gigi gisiele mu Dibundu lu Senkele, ² numu seene pima-pimi mu kebe gabini, numu salasa mu mamosogo magini galamiwi mfunu mu kuuma-mfumabisi Yesu, ndebunu buga nsalasa meeme ande baada bambaana. ³ Pilisigi ande Akilasa, bapaanga babisi bayi salagabiwi gisala gi Mfumu Yesu, nuba we mbodo. ⁴ baada basi mudwe mu gupulusu meeme. Lowo ni meeme peele iya badoono, asi ande baklisto ba mabundu mamosogo ma bigaana bimbaana. ⁵ Nubawe baklisto ba dibundu lubiwi ande mbayaama Yepayinede wuyi zologa mbodo, wunu wulu leede magaba ma mbenge yitomo yi maana ma Aziyi gugele Yesu. ⁶ ande Madiyi wunu moneene bini pasi yivulu ⁷ ande Andolonikusu ande Yuniasa, bigaana giama, badusalabiwi gisala, badugelabiwi mu bologo, ⁸ bana badedegeene mu guyaba Yesu, bigi baada bamfunu yivulu mu kebe ga batumu ande Apiliyasa wuyizolo mu Yesu ⁹ ande Yulubene ande Sitakisi, bayizologa ¹⁰ ande Apelese ande gigaana gi Alisitobulu ande paangaama Elodiono ¹¹ ande gigaana gi Nalasisi, bigi mu Yesu ¹² ande Tidifene ande Tidifoso ande Pelesidi wuyizolo, bigi baada ba gisala ba Yesu ¹³ ande Lufusu wunu wuga soolo Nzaama ande maaya wubisi ¹⁴ ande Asinikilidi ande Felegono ande Helemese ande Potobasa ande Elemasa ande bapaanga bagigabiwi; ¹⁵ ande Filologo ande Zulu ande Neele ande paangaama Olempe ande baada babosogo bagigabiwi ¹⁶ ande baklisto ba mabundu mamosogo; nuleedagana mbodo yigono ande gono bini babosogo. ¹⁷ Gebaana ande baada bana bayaya gaabala mabundu ande gwasala mapaana ma nsono mu malongi mabiwi ma bupala, ¹⁸ lowo bigi baada ba gisala ba Nzaama, baya nungeene zumu lubiwi, gubesagana ande biwi lowo ni lowo bama bwisi baada bana bama kono ngolo mu lugwigili. ¹⁹ Ngwigi kiesi mutula luzidi lubini, baada babosogo balu yabeene; iya zolo ni nugele ndungu mu mapaana mafa ande mu mapaana mapimi. ²⁰ Mfumabisi Yesu ganudele mu disi lupimi. ²¹ Timote wuyi salagande ande bapaanga baama Lusiwusu ande Yasono ande Sosipatele batu nudumusu mbodo ²² ande Gayusu wunu wungiamba gu nzwana, wunu se wuyambaga baklisto babulu lwana mu bisaama gu nzwana gatu nudumusu mbodo ande Elasidi wunu wuswegega nzimi yi baada ba bulu lwana babosogo ande paangaabisi Kalatusu batu nudumusu mbodo. ²³ Meeme Teletiwusu, iya nusonogeene mugaana wuwu, yitu nudumusu mbodo mu kuuma-Yesu. ²⁴ Dumu lumusaana Nzaama wubisi, nde munga-ndungu yi mvulande mvulu ande munga-ngolo wunu wuzologa ni mapaana mana maga swege duugu tama mayabagana mu migaana misonogo babigili ²⁵ mutulu baada babosogo bama yabeene, basileene Mfumu Yesu mudimi, bamu zidisi. ²⁶ Ganudele mu disi lupimi Mfumabisi Yesu, ²⁷ Daada Nzaama galumu mvulande mvulu mu kuuma-Mwanaana Yesu. Amen.