¹ Gungoya mvulu guuma-yina (14) luyi fudugu gu Yelusalemi mu gwa leese bambudu ba Dibundu ni gisala gimeeme gitomo ande gini gima laba gigi mu bigaana bimbaana lowo gigi gipamba, asi gigi ndebunu bu tumu Nzaama. ² Yigie ande Tito ande Balabasa. ³ Baada bambaana mu kebe gabisi bazola ni bayaadigi Tito ginaga gagele mwisi Ngelese, ⁴ bazola gudala gimvugu gibisi ande Mfumu Yesu mu ndungu, gisi lowo bagele baada babisi. ⁵ Asi lowo dusala guumunu maana yini. ⁶ Nzaama gadalaaga nzie yi muudu, meeme lowo yisala yabeene ni bagale banawa, lowo yimona mfunu yi guba yabeene si bunu bagele baada bamfunu, ⁷ yibaleele kaga ni Nzaama wupe gisala gi gulongo Ndagaana mu kebe ga bigaana bimbaana ⁸ ndebunu buga dumusu Piele mu kebe ga bayudu. ⁹ Jagi ande Piele ande Yowani daanga luba yabeene ni Nzaama wudu gabeene bisala bamoso mu kebe ga bayudu, bisi mu kebe ga bigaana bimbaana, si luba duwe mbodo mu guleese ni duguumunu gisala gini. ¹⁰ Luba duloomo mu gunungeene baada bana bama kono gibageene mu kebe ga Dibundu lu Yelusalemi; luyi guumunu. ¹¹ Luyi duulu meeme ya Antioso, buyi muwele Piele mu gubiyi guga sele. Tomo buga diaya ande bapaanga ba bigaana bimbaana, ¹² asi luya duulu bapaanga baga dumusu Jagi, luga wesele gudia ande biwi, bawuga Balabasa boomo ¹³ mutulu bagele bakono guba yaadigi. ¹⁴ Yimu leele ya midi mi baada babosogo ni nze wigi muyudu, mu kebe ga baada ba bigaana bimbaana wuma monogaaga nga bisi, abunu luulu wuya pusu baada bana ni bagalaaga nga bayudu? Ndaga-Nzaama lowo wutu yilaba. ¹⁵ Bisi twigi bayudu ba matsili, asi Nzaama gadalaaga bigaana. Luulu dugwigili mu Nzaama ande mu Yesu, Nzaama gaya dudala bisi babosogo mu lugwigili lunu; lowo duma bisa saala baada ba misigi mi Mose; ¹⁶ twini hulugu mu lugwigili, asi lowo ni mutula misigi mini. ¹⁷ Ni duguumunu ni Yesu wudu fileene mutulu gudu dogolo mu masumu, asi bisi munu gubisa sala masumu, guya leesege ni Yesu wudu dumuga mu gusala masumu? Galowo. ¹⁸ Asi gafileene kiwi? Meeme yifi nzili yimoso ande Yesu yataa kulunsi, luulu lowo ni meeme ngwigi wumoono, ¹⁹ asi Yesu wigi wumoono mu kebe ga meeme ²⁰ mutulu nde wuleede moono waana mu gu togolo meeme mu lufa ndebunu buga zolo ndege beene ande gufa ya gihene gi meeme. ²¹ Meeme lowo yima nanga ni Nzaama wudu dala mu disi lwana lupimi, ²² asi ni wuma guumunu muudu mutula misigi, mfunu yi lufa lu Yesu gubwasa!