¹ Tomo nugele nga baada hangars mutulu nusala gubiyi guvulu, ² nusala mapaana ma nuzola bini beene, nulaba pwisabini yi luudu ande mudimi nga baada ba gisi gigi. ³ Bisi se dugele ndebunu nga baada babosogo. Gusaamasa gu Daada Nzaama gugele gudu zila. ⁴ Asi mu guzolo gu Nzaama ande kiene yi Mfumu Yesu mu gimvugu gini gitwigi mu Mfumu Yesu, wudu rigolo mu manzili mana. ⁵ Luulu duya laba guzolo gu Nzaama ⁶ mutulu wudu hulusu, wudu dogolo mu lufa lunu lugi mpeve, wudu gidili baada baana,butwini yaalaagande gu tala. ⁷ Mu kiene yi Yesu ande guzolo gu Nzaama guga duleese mu nzila mwanaana duhulugu, dumono se gimvaama giga duswegeene gu tala; ⁸ lowo gwigi ni mu ngolabisi ni lowo mapimi mabisi, asi gwigi mu kiene kiene yindeege Nzaama. ⁹ Gwigi mu lugwigili lunu lutwigalwi mu Yesu Klisto. ¹⁰ Ndelunu mu gimvugu gini gibisi ande Mfumu Yesu, dusalaaga mapaana mapimi. ¹¹ Nungaana bu nugele tomo, bini lowo nugele baana ba Nzaama, nugele banzenzi, nugele guleye ande Nzaama, ¹² lowo nugele mu gigaana gi Nzaama, ¹³ asi luulu lunu tumu yabeene Yesu ndeege beene wuya dugoso mu gimvugu gitwigande, dugidigi baada bamoso bayudu ande baada bana bamakoono bayudu. ¹⁴ Yesu wudu se luudu lunde, wububulu gibege gini gidu gabala tomo ande Nzaama, ¹⁵ wuzwe misigi mi bayudu, wudu dululu midimi. ¹⁶ Mu gimvugu ndegini Yesu wufi yataa kulunsi, wuya goso baada babosogo, wuba gidili gigaana gimoso gifini. ¹⁷ Nzaama wugidigi Daada wu baada babosogo, hoso muudu wuma fana gubesaganande mu gimpeve. ¹⁸ Yesu wuya dogolo gimbeni mu kebe ga baada babosogo mu nzila kulunsi lwana ande matsili maana magaya diaga. ¹⁹ Bini baada ba bisi bimbaana, lowo se nwigi banzenzi mu Gimfumu gi Nzaama ²⁰ mutulu Yesu wuya nuwingisi mu kebe ga gigaana gi baana ba Nzaama, ndege wuduungu nzo yini yi gigi, ndege wuduungu yataa babigili ande yataa batumu bana baga dedegese gu gilungunu. ²¹ Ndege gigi gunzu lunu lugeme nzo, gigi wunu wuleedege ngolo mu kebe ga nzo-Nzaama. ²² Mu gimvugu ndegini bini se nwigi ndaama yi nzo yini mutulu Mfumu Nzaama gigi mu kebe gabini mu gimpeve