¹ Wuwu meeme Poolo, tumu wu Mfumu Yesu iya nusonogeene bini baklisto ba Dibundu lu Efese, mbodabini mu kuuma Daada Nzaama ande yi Mfumabisi Yesu Klisto. ² Nzaama ganu dululu midimi, Mfumu Yesu ganu wugene kiene mu guzolo gunu guga dusagamana mu gimvugu gi Mfumu Yesu mu tala tala. ³ Daada Nzaama galumu gwana. ⁴ Nzaama lu guzolo gwana wudu soolo ni dugele baana baana duugu luyanaga lu gisi gigi. ⁵ Wudu gidili baana baana mu nzili yi mwanaana Yesu, ⁶ ndelunu bien dumu lumusaaga mutula guzolo gwana gu kiene, gudu makono gusuumu mu nzimi. ⁷ Yesu wudu suumu mu matsili maana, ⁸ wu duwe gimbaga gi Nzaama ande gimvaama ⁹ ande guyabeene giswaama gi Nzaama. ¹⁰ Nzaama wudu yidigeene mapaana mana mini gugu mu daanga lunu luga gene mu bufugu bunsugu yataa maana ande gu tala nga bunu bwigi guzolo gwana. ¹¹ Bisi dubege gobo lubisi mu bimi biga dugenese daanga luga dusoolo. ¹² Bisi dumu lumusu Nzaama, dumu sileene mudimi mutula bunene bwana mu nzila mwanaana Yesu. ¹³ Mu nzili ndeyini bini se nubege gidimi gi Muhunga-Nzaama ya mbunzu mu ndaga yini yi nuwugu, yini yileedega moono wu mvulande mvulu. ¹⁴ Muhunga-Nzaama wuya gugusu mana madu genese Nzaama ni butwini mabaga mu bufugu bunu. Luulu bisi dumu lumusu Nzaama mu bunene bwana. butwini mono Gimfumu gi Nzaama. ¹⁵ Ndelunu mu lugwigili lubini mu Mfumu Yesu ande guzolo gubini, ¹⁶ meeme iya nuloomeene gugele Nzaama ni ganu we gimbaga ande ndungu nuyabeene mapaana mande; ¹⁷ ndelunu iya nuwa madoono. ¹⁸ Iya nu saameene ni Nzaama se ganu we kangeene yi mudimi tii gunu gunwini mono bimvaama bi Gimfumu gi tala. ¹⁹ Mu kebe ga gusaama bimeeme iya nuloomeene ni nuyabeene bunene ande ngolo yi Nzaama. ²⁰ Mu ngolo ndeyini Nzaama gadogolo Yesu mu lufa, gamu si mu kuuga gidi ginde gi gimfumu, gayaalagande gu tala ya googo lunde lu gidaada. ²¹ Yesu wubege gimfumu gima digi bimfumu bibiosogo ande ngolo yima digi ngolo yiyosogo ande kuumu yima digi makuumu mamosogo mvulande mvulu. ²² Nzaama wuniadasa mwanaana Yesu mapaana mamosogo gu tsina mili, wumu si mfumu munene wu Dibundu. ²³ Yesu gigi ya dibundu lwana, hoso daanga dibundu lwigi luudu lunde luyuulu mu gisi gimutsini.