¹ Gwigi meeme Poolo, wugasi Nzaama mu gisala giana mu guzolo gwana ande paanga wubisi Timote, ² duya nusonogeene bini baklisto nwigi ya bulu lu Koloso. Daada Nzaama ganu dele mu disi lupimi. ³ Mu kebe ga bisaama bibisi bibiosogo duya doono Nzaama hoso daanga ⁴ Nukono gulaba muudu wunu wuya lu nungeene ndeege beene mu gulu .... ande mu bisaama bi bupala, ⁵ gisi lowo gwana gigi ande Yesu mu kebe ga mudimaana, ⁶ gaya luleese ya misi mi baada ngagwi ni wanzio, asi lowo gwana gamu yaaba Yesu, mudwe wu Dibundu. ⁷ duugu lunu yinu yiwugu mu mbala yitomo mu kebe gabini, nuyabeene guzolo ande kiene yi Daada Nzaama ni yigi paana-paana ⁸ ndebunu bunu yiwugu gugele paangabisi wu mudimi Epalagasa, muuda-gisala wu Mfumu Yesu, bugaya dudeleene mapana mabini manuya sala. ⁹ Bisi se duugu ludu wugu paana yibini, duya nusaameene hoso daanga ni Nzaama ganu dwalasa mu nzili ande mu Muhungaana ¹⁰ mutulu nubudu mbenge yipimi ande ngolo yini yima faana, nudwala gisala ginde gu gilungunu, ¹¹ ganu yulusu ndungu ande yaana ande kangeene-mudimi mutulu hoso daanga nudindamana ande kiesi. ¹² Numu doono Nzaama ande kiesi mutulu wudu gidili baana baana bini baga mbingi yinde gu tala; ¹³ wunu doogolo mu kebe ga gihigi gi masumu munu gele, wunu duusu mu kebe ga pibi, wunu wingisi mu kebe ga mooso ande ¹⁴ gunu dwala mu Gimfumu gi Mwanaana wu gazolo. ¹⁵ Yesu gigi gifani gi Nzaama, gigi Mwana-Nzaama wutomo, gigi yataa bimi bibiosogo biga sele, gabi sele we nde, gabi sele mutula nde ande mu nzilande; ¹⁶ bimi bibiosogo bini biya monogo ande bini biya kono gumonogo ande ngolo yiyosogo ande bimfumu bibiosogo ande mihungu mimiosogo mu kebe ga tala ande yataa maana. ¹⁷ Bimi bibiosogo bubiya muwaneene, tomo nde wudedegeene mu gisi; gigi mudwe wu Dibundu lu Nzaama. Dibundu lwigi luudu lunde, ¹⁸ gigi luyanaga ande muudu wutomo wunu wunimigi mu kebe ga baada bana bafi, ndelunu wugidigi muudu wutomo yataa mapaana mamosogo. ¹⁹ Ginaga Nzaama gazolo ni baada babosogo mu gisi gimutsini gaba gidili baana baana mu nzila Mwanaana Yesu ²⁰ ande guba dala mu disi lupimi ande guba bwisi midimi duugu gu tala tii yataa maana mu matsili mana maga diaga yatala kulunsi. ²¹ Bini se nugele tomo guleye ande Nzaama mutula mapaana mabini mafa, nugele bamenge ba Nzaama, ²² asi lunu wugu paana yiyi yipimi yi moono, Nzaama wunu goso mu kebe ga baana baana mu nzila-lufa lu Mwanaana, gaya zolo ni nugidigi baada bapimi bana bama kono gifu ya misi minde. ²³ Mudimi wunu yaasa ande lugwigili lubini nulu duungu yataa midoyo nga lumeeme; gudala lowo saama lumbaana. Paana beene yipimi ndeyiyi yiba yaya longo mu gisi gimutsini, yi ndeyiyi yiyi gidigeene meeme muuda-gisala. ²⁴ Ngwigi mu kiesi givulu mugu gugusu pasi yisisi Mfumu Yesu yiga mono mu kebe ga gisala gigi ²⁵ mutulu guleese gisi gigiosogo gimi gi mfunu giga swege Nzaama, loolo gama zolo ni giyabagana. ²⁶ Gimi beene gigi ni Mfumu Yesu gigi mu kebe ga baada babosogo bana baya muguumunu. ²⁷ Paana beene yiga tumuseene meeme Daada Nzaama mu gwa nulongo ndeyiyi, nuyi sileene mudimi bunwini yibageene gobo mu mugieme wu Nzaama. ²⁸ Ndebunu bisi duyaya longo baada babosogo ande guluugisi hoso muudu mu guwingini mu gimpeve mu kebe ga gimvugu gi Yesu. ²⁹ Ngolo yi gisala gimeeme gigi gwigi ndege Mfumu Yesu wuya paaga, sa giya monogo.