¹ Lebuh Paulus seduai Silas udah bejalai nengah menua Amfipolis, enggau menua Apolonia, seduai iya alu datai di Tesalonika, ti bisi sebuah sinagoge urang Yahudi. ² Baka ti selalu dikereja iya, Paulus lalu tama ngagai tembung sida, pengelama alam kandang tiga hari Sabat beturut-turut, iya betukar penemu enggau sida ari Kitab Suci, ³ madah sereta nerangka Kristus endang nda tau nda kena perinsa, lalu angkat idup baru ari mati. Ku Paulus bejako, “Yesus ke dipadahka aku ngagai kita nya meh Kristus.”. ⁴ Sekeda sida pecaya, lalu nitihka Paulus seduai Silas, lalu baka nya mega mayoh amat urang bansa Yunani ke takutka Allah Taala alu enggau mayuh indu ke tinggi pangkat. ⁵ Tang orang Yahudi iri ati, lalu ari saup orang ke jai ba sebelah pasar, sida ngempuru ka urang mayoh alu nyungkak urang alam nengeri nya begau. ⁶ Lebuh sida begiga ka Paulus seduai Silas, deka mai seduai iya ngagai bala mayoh, sida nyerang rumah Yason. Lebuh sida nadai tetemuka seduai iya, sida lalu ngirit Yason enggau sekeda sida ke seiman ngagai bala pemesai di nengeri nya. Ku sida manjung, “Orang tu udah ngaga pengachau di semua endur, ⁷ lalu seduai iya udah mega datai ditu, lalu Jason udah nerima seduai iya nyadika temuai iya. Seduai iya ngelaban atur Raja Besai, madahka bisi siku agi raja ke benama Jesus.” ⁸ urang mayoh enggau bala pemesai di nengeri nya alu irau ati ninga nya, ⁹ lalu lebuh sida udah ngambi duit jamin ari Yason nggau ari sida ti bukai, sida lalu ngelepas ka ( Paulus seduai Silas.) ¹⁰ Malam nya sida ke pecaya alu nganjung Paulus seduai Silas ngagai Berea, lalu lebuh seduai iya datai, seduai iya alu mansang ngagai sinagoge urang Yahudi. ¹¹ Nyadi urang Yahudi di Berea badas agi ati ari urang ke di Tesalonika, laban sida nerima Firman Tuhan enggau gaga, sereta mansik Kitab Suci tiap hari keran deka nemu enti jako nya amat tauka nda. ¹² Nya alai mayuh sida nyadi pecaya, nyengkaum mayoh indu enggau lelaki bansa Yunani ke tinggi pangkat. ¹³ Tang leboh, urang Yahudi di Tesalonika ninga Paulus udah mega meritaka jako Allah Taala di Beria, sida alu mansang ngagai nengeri nya mega alu belaboh nyungkak sereta megau ke orang mayoh. ¹⁴ Sida ke pecaya alu tekala nya nganjong Paulus ngagai tebing tasik, tang Silas seduai Timotius tinggal di Beria. ¹⁵ urang ke nganjong Paulus alu mai iya nyentuk ngagai Atena. Lebuh sida udah nerima atur ari Paulus ngasuh Silas seduai Timotius datai ngagai iya di Atena enggau jampat, sida alu ninggalka iya. ¹⁶ Leboh Paulus benong nganti Silas seduai Timotius di Atena, roh iya balat tusah meda nengeri nya penuh laban reramba. ¹⁷ Nya meri iya becekeh enggau orang Yahudi alam sinagoge sereta enggau urang bansa bukai ke takut ka Allah Taala, enggau sebarang orang ke enggau iya betemu tiap hari ba sebelah pasar. ¹⁸ Sekeda raban urang ke dikumbai Epikurios enggau raban urang ke dikumbai Stoik mega betemu enggau iya. Ku sekeda sida, “Nama utai ti disebut orang ke kutap-kutap tu?” Ku sida ti bukai bejako, “Iya munyi ke bejako ka berita petara urang menua bukai.” Sida nyebut nya laban Paulus nusui berita Yesus enggau pengangkat ari mati. ¹⁹ Sida alu mai Paulus ngagai ndur ti dikumbai Areopagus, alu ku sida bejako, “Kati uleh nuan madah ngagai kami ajar ti baru ti dibai nuan tu? ²⁰ Ajar tu munyi ke nyelai didinga kami, nya alai kami keran deka nemu reti nya.” ( ²¹ Nyadi semua orang Atens, enggau orang kampar ke diau di nengeri nya, nadai pengawa bukai tang semina madahka tauka ningaka penemu ti baru.) ²² Nya alai Paul bediri di mua raban Areopagus, lalu bejaku, “Kita orang Atens, aku meda kita tu orang ke kering amat ba agama. ²³ Laban lebuh aku bejalai nengah nengeri kita, lalu meratika utai ti disembah kita, aku tetemuka siti alta ti ditulis enggau leka jaku tu, ‘Ke petara ti enda dikelala.’ Petara ti enda dikelala kita, ke disembah kita, nya meh petara ti dipadahka aku ngagai kita. ²⁴ Surat Pasal Kereja Allah Taala ke ngaga dunya enggau semua utai ti dalam dunya, nya meh Tuhan ke merintah serega enggau dunya, lalu Iya ukai diau dalam rumah sembiang ti digaga mensia. ²⁵ Lalu Iya pen enda mega begunaka tulung ari mensia, laban Iya Empu ke meri pengidup enggau seput, enggau semua utai bukai, ngagai semua mensia. ²⁶ Iya udah ngaga semua bansa ari siku orang, lalu Iya ngasuh sida diau di serata dunya. Iya mega ngeletak umur sida, enggau endur alai sida diau, ²⁷ ngambika sida ngiga Allah Taala, nyangka begama ngiga Iya, lalu tetemuka Iya, taja pen Iya enda jauh ari kitai siku-siku. ²⁸ Laban ‘Kitai idup, engkebut, sereta diau dalam Iya’ Munyi ti disebut sekeda bala kita empu ti landik bepantun, ‘Laban kitai tu mega anak Iya.’ ²⁹ Nya alai, laban kitai tu anak Allah Taala, kitai enda patut ngumbai Iya baka anak patung ti ditempa ari emas tauka ari pirak, tauka ari batu ulih pengelandik enggau penau mensia. ³⁰ Taja pen Allah Taala enda ngingatka pemeli kitai mensia, tang diatu Iya ngasuh semua mensia di semua endur nesal ati ke dosa sida, ³¹ laban Iya udah ngeletak siti hari alai Iya deka ngakim semua dunya ngena pengelurus, ulih orang siku ke udah dipilih Iya, lalu Iya udah ngasuh semua mensia nemu utai nya deka nyadi, lebuh Iya ngangkatka orang nya ari mati!” ³² Lebuh sida ninga Paul bejakuka pasal pengangkat ari mati, sekeda sida ngelese. Tang ku sida ti bukai bejaku, “Kami keran deka mendingka nuan baru ba pasal pekara tu.” ³³ Ba senentang nya Paul lalu ninggalka sida. ³⁴ Tang sekeda ari bala sida nya nitihka Paul, lalu arap, nyengkaum Dionisius, ke raban Areopagus, enggau siku indu ke benama Damaris, enggau orang bukai ke enggau sida.