¹ God Yawe i ken amamas, em i ston bilong mi, em man husat i lainim han bilong mi long pait na ol finga bilong mi long stap insait long pait ² Yu ples hait bilong mi na man bilong kisim bek mi na longpela tawa bilong mi na dispela man husat i mekim mi i kamap fri, yu karamap bilong mi na yu dispela man husat mi i save kam hait long yu na yu dispela man husat i save bringim ol manmeri i kam aninit long mi. ³ God Yawe, man em wanem samting tru na yu luksave long em o pikinini bilong man yu save tingting long em. ⁴ Man em i olsem win tasol na dei bilong em long dispela graun em i olsem tewel tasol olsem san i save i kam na igo. ⁵ Mekim skai i go insait tru na kam daun, God Yawe; tasim ol maunten na mekim ol i kamap smuk. ⁶ Salim ol lait bilong laitning i sut i go na tromoi nabaut ol birua bilong mi; sutim ol wantaim spia bilong yu na rausim ol i go bek wantaim kain kain tingting i no orait. ⁷ Putim dispela han bilong yu i stap antap tru i kam daun na helpim mi long kam aut long planti wara, long han bilong ol lain bilong narapela hap. ⁸ Ol i save tok giaman long maus bilong ol na han sut bilong ol tu em i giaman tasol. ⁹ Mi bai singim nupela song long yu God, long gita i gat 10-pela string na bai mi singim song long litimapim nem bilong yu, ¹⁰ husat i save kisim bek ol king na husat i mekim Devit, wokman bilong yu i kamap fri long bainat nogut. ¹¹ Helpim mi i kamap fri long han bilong ol man bilong narapela hap. Maus bilong ol i save mekim tok giaman na han sut bilong ol em i save giaman tasol. ¹² Inap ol pikinini man bilong yumi bai i kamap bikpela tru olsem ol diwai taim ol i yangpela yet na ol pikinini meri bilong yumi bai kamap olsem ol bikpela kona pos, ol i sapim wankain olsem ol dispela i stap long haus bilong king. ¹³ Inap ol haus kaikai bilong yumi i pulap wantaim ol kain kain kaikai bilong gaden na inap ol sipsip bilong yumi ol i ken karim planti moa pikinini inap olsem tausen na ten tausen long ol hap graun bilong mipela. ¹⁴ Na ol bulmakau bilong yumi bai i gat planti yangpela. Nogat man bai brukim i kam insait long banis bilong mipela na bai i nogat moa ol kalabus lain na nogat moa bikpela krai long ol liklik han rot. ¹⁵ Ol manmeri husat i gat ol kain samting i mas amamas na tu ol manmeri husat ol i mekim God i stap God Yawe i mas amamas.