¹ Dispela tok bilong God Yawe i kam long Hosia pikinini man bilong Beri, insait long taim bilong Usia, Jotam, Ahas na Hesekia, ol i bin i stap king bilong Juda na Jeroboam pikinini man bilong Joas i stap king bilong Israel. ² Taim God Yawe i bin tokim Hosia, em i tokim em olsem, ''Go painim wanpela pamuk meri na yu maritim em. Bai em i karim pikinini olsem kaikai bilong dispela pasin pamuk, long wanem dispela graun i mekim planti pasin pamuk na ol manmeri i givim baksait long God Yawe. ³ Olsem na Hosia i go na maritim Goma pikinini meri bilong Diblaim na em i gat bel na karim wanpela pikinini boi. ⁴ God Yawe i tokim Hosia, ''Kolim nem bilong em Jesril, em i olsem klostu taim bai mi mekim save long lain bilong Sehu, long wanem ol i bin kilim ol man long Jesril na bai mi stopim ol manmeri long kingdom bilong Israel. ⁵ Long dispela taim bai mi brukim bunara bilong Israel long ples daun bilong Jesril.'' ⁶ Goma i gat bel na i karim wanpela pikinini meri ken. God Yawe i tokim Hosia olsem, ''Kolim nem bilong em Lo-Ruhama, long wanem bai mi no inap marimari long ol Israel na lusim sin bilong ol. ⁷ Bai mi sori long ol Juda na kisim bek ol long strong bilong mi yet God Yawe, God bilong ol. Mi no inap kisim bek ol long strong bilong bunara o bainat o ol hos na long ol hosman." ⁸ Taim Lo-Ruhama i bikpela pinis, Goma i gat bel ken na i karim narapela pikinini boi. ⁹ Na God Yawe i tok, ''Kolim nem bilong em Lo-Ami, long wanem, yupela i no manmeri bilong mi na mi no God bilong yupela. ¹⁰ Namba bilong ol manmeri bilong Israel bai i olsem wesan bilong nambis na yupela bai i no inap skelim o kauntim. Em bai i olsem wanem em i bin tokim ol, 'Yupela i no manmeri bilong mi, em bai i tokim ol olsem, 'Yupela ol manmeri bilong God i gat laip.' ¹¹ Ol manmeri bilong Juda na Israel bai i bung wantaim na makim wanpela lida bilong ol yet na ol bai i go aut long dispela graun. Long wanem em i gutpela long dei bilong Jesril.