¹ Ana, muyuve ashemi enu kwa Fumu, mukonda thzoliyo swanelo. ² ''Okuteke tata oe na mama oe'' (oliyo mulao o matatekelo uli no shikulupelisho), ³ ''ci yoye iloe ne oyoye shikati shoshile pa kaye.'' ⁴ Atata o ana, lelo mwashethza shethza anenu ci anjipe. Unone, muwakulishe mu likute no kuwa limukisha Fumu. ⁵ Apika, muyuvele an'athsile enu ko kuthza ko nyama ko likute lyolikulu nene no kucilisha, mu kusepahala ko mucima wenu. Muwayuvele eci eli muyuvela Kilesite. ⁶ Mwawayuela pohuma kwamimona, ci an'athsile enu aloele. Unone, wayuvele eci apika a Kilesite, oyu kwama ei ahima Nyambi mu mucima wenu. ⁷ Muwakwamene ko mucima wenu wouhe, eci mwakwamena Fumu kali anu, ⁸ mukonda twalimuka ci yoihe enu yoiwa akwama munu kenge akutambula muyambo kutunda kwa Fumu, shanga ci mupika nji wakuliyala. ⁹ An'athsile, mukwame apikenu mu mukalelo ofoci. Lelo mwawacilisha. Mwalimuka ci aye oyu li n'athsile wo no n'athsile wenu oli muwilu, ne kwithsa ketululo kukwenji. ¹⁰ Ko kumanenena, mulitanalishe kwa Fumu no mu ukolo wo ukulu wenji okupila eshi akwanga. ¹¹ Muvate yoihe ilwisho ya Nyambi, ne ci mutweshe kuimana ko munatala ku maayalo oamango a davulosi. ¹² Mukonda mvo thzetu kali thza kulwa no nyama no onyinga, unone thza kulwa nakakuendisha, kulwa nookolo wakakuendisha, kulwa no okolo o milema, kulwa no okolo o mipepo thzo thzimango mu ivaka yo kuwilu. ¹³ Honine muvate ilwisho ya Nyambi yoihe, ci mwakutwesha kuimana mu liyuwa lyo limango, ne ou mumana kukwama enu yoihe, mutale. ¹⁴ Nehoni mutanale, ko munalianga mwiya mu mbunda, no kuvata sho pa mbando sho kuluka, ¹⁵ ne, maulu enu avate kuliloishela oku kutunda pa evangeli thzo kuliyala. ¹⁶ Mumikalelo thzothzihe mushimbe teve thzo shitawo, ethzo mwakutakisha mikili thziyuuma thzoyu o mumango. ¹⁷ Kalo muvate huthsi thzo ushswalale thzo kuyoisha no mwele o mupepo, alyo liywi lya Nyambi. ¹⁸ Mu malombelo oahe no kulomba, mulombele shikati shoshihe mu mupepo. Kumanenena, mukwatelel kutatelela ko mulombelela anu a Nyambi o kukena. ¹⁹ Ne munilombelele name, ci nipiwe maywi ou niamba. Mulombele ci nimilimukishe ei inaholekiwa yo evangeli ko ondume. ²⁰ Ethzi evangeli thzoliyo thzinaleta ci nikale mukakuimanena oyu li mu mawenge, ci nithziambe ko kukana kuyapa, omu niloela kuamba. ²¹ Tikikasi, mwapetu oyu himiwa no ngamba oyu sepahaa kwa Fumu, kenge amilimukisha enu yoihe, ci mulimuke omu nikwamena. ²² Ninamutumu kukwenu mukonda weli livaka, ci mulike eli tuli, ne ci kalo atanalishe micima thzemu. ²³ Kuliyala kukale kwa apetu, no shihemo sho shitawo shitunda kwa Nyambi Tata no Fumu Jesu Kilesite. ²⁴ Shihemo shikale kwa anu wahe awa ahima Fumu wetu Jesu Kilesite ko shemo shikana kualuka.