¹ Paulo, ndjumwa, yita ya bandju ilyi ya mundju, si ndjumwa ya Yesu Kristo ne Ongo tata, yi wamufu laa kutenga mwa bafu, ² na emwa benyewe tchu balume n'e bakasi, balyi alauma nanyi, emw'e makanisa malyi e Galatia. ³ E bwolo n'e mutchula, bibe era mwenyu kute nga e mwa Ongo tata n'enawetchu Yesu Kristo. ⁴ Yi watchanaa yeyine kwa byaa byetchu, ilyi atchukula mwa butambusi bw'ene myaka yibi, kwa kuhonda kwa Ongo tata wetchu. ⁵ Era mwaye yi yilyi e buashe n'e bukuse e myaka n'e myaka! Amen! ⁶ Nyisomerwe, kute mwa alukire kulyi ngokuno, kureka ola wa babalangiraa kwa lukoo lwa Kristo, mwa kukulyikira e mandji meyilyisa. ⁷ Ata kwa kwa kuba n'e mandji meyilyisa, si kwa bushi kulyi e bandju bendjire babalyibusa, n'ekuhunda kualula e meyilyisa ma Kristo. ⁸ Si kweyine, e mango tchubano, ilyi malaika w'omwo mbingu anga beyilyisa mandji meyilyisa, kulusha ilyi lureka amo tchwabeyilyisaa, atakirwe. ⁹ Tchwababiraa bye e muhondo, kandji nyihubi re kubakengesa bye mwa kano kashangi: Ilyi e undji mundju angesha kubeyilyisa mandji meyilyi sa kureka amo mweyilyisibwaa atakirwe. ¹⁰ Na batcha, ilyi bunguke bwa bandju bu nyihondire ilyi bwa Ongo? Ilyi nyihondjire ekusimisa e bandju? Nga nabaa wakusimisa e bandju, ndangabere mukosi wa Kristo. ¹¹ Nyiba bilyire bye benyewetchu balume n'e bakasi, e meyilyisa nabeyilyisaa mata ma bandju. ¹² Kwa bushi nda maangilyiraa ilyi kumeyilyisi bwa na mundju, si kwa bibonekeresi bya Yesu Kristo. ¹³ Kwa bushi Mwalolaa ilyi mwonvaa e mango marengaa, kute e kalamo kanyi kabaa butanzi mw'e dini ly'e Bayahudi, kute nyendee nalyibusa e kanisa ka Ongo kulusha e luero. ¹⁴ Na kute nabaa nyihondore mwa meyilyisa m'e Bayahudi bako kashangi kanyi n'omo tchiwo tchanyi, nera kutchisesa busibu kukulyikira eby'ekutenga e mwa ba tata. ¹⁵ Si kweyine, e mango bikasimisa ola wanyi hombolaa kutenga mwanda ya nyama, na yi wanyibalangiraa kwa lukoo lwaye. ¹⁶ Yi wabonaa kulyi kubuya e kubihula e mwana waye kurengera nyono, ilyi nyimwiyilyisa era mw'e bandju b'e lubaa, na batcha, ndabusaa mubilyi ilyi mikira. ¹⁷ Na ndayaa e Yerusalemu e mwa bala babaa ndjumwa e muhondo sanyi, si nera kuya e Arabuni. Na, businda, nera kuhubira e Damaski. ¹⁸ E nyuma sa myaka eshatchu, nera kuya e Yerusalemu kuya kubonana ne Kayafa, na nera kwikala siku ekumi n'etanu e mwaye. ¹⁹ Si nda bonaa ku yindji ndjumwa, nga ata Yakobo yeyine, mwenye wabo Enawetchu Yesu. ²⁰ Mwebine nyibaandjikilyire, mulolae, e muhondo sa Ongo, ndekire bisha. ²¹ Busina bwa nyuma nera kutenga e Yerusalemu, nera kuya e Siria n'e Kilikia. ²² Na, ndabaa nyimenyekene e busu bwanyi n'e makani sa m'e Buyahudi malyi mu Kristo; ²³ Si bwonvaa mbanga bateta kwa: "Paulo, ola wendee watchulyibusa endjire eyilyisa e bwemere bula endee atchisesa kusheresa." ²⁴ Amo ma kanisa mera kutonga Ongo kwa bushi nanyi.