¹ E bhana mworukiri e bhabhuti bhiinu, etukana na Nyerekuritu, bhushwa 'ndo ng' er' eira. ² Subhaha iso na nsoko nge mwomba waroso hima na ndaani, ³ Kongo ubhese na ngoa n' imana matu miingi mo chuo. ⁴ Na bhanu bhatita, ang' imushosha ebhana bhinu, eina murembere bho mwihakanya bho na mwihana bho itukana na Nyerekuritu. ⁵ E bhakori, morukiri ebhakakare bhinu etukana n' emubhi, mu bhobha n' ikake mu kwihoheya re mutima winu kuri Kirisitu, ⁶ Ritabhesingi ho mo meso abho, bhuri ikokomya bhea, eina bhuri bhakori bha Kirisitu, bharonjange mu mutima wakonda er' isasa ra Ongo. ⁷ Mukori bho na ngoa, bhuri bhakorengi Nyerekuritu nti bha bheya, ⁸ Musibhanga kinsi uma wabhesa nti mukobhe, wabhesa nt' uri shu, waaninkwayo etuka kuri Nyerekuritu itukana n' ebyahunda bhisekora we. ⁹ Na bhanu, bhakakare, muronjei bho 'mbo, na musie er' ikemyae bho, mw' esibha 'mbu e mukakare waabho na winu uri mo mbingu, na kubhusondori nae kusir' e simiriswa. ¹⁰ E chasiya mwesumye kumunda na Nyerekuritu na mo maa ae ebhunkangwe bhuti. ¹¹ Mumbare ebyuma bhiti bya Ongo, kongo mw' etingire mo mpuse ya mushumbu. ¹² Bhusha nti t' uri mw' ikwana ra mubhi na nchama, eina ikwana n' ebhunkangwe, ikwana n'e bhakakare, ikwana n' ebhabhake bh'e chuo kino che mwerimya, ikwana n'e mitima yema, mo chuo ch' emitima. ¹³ Ngyasingwa, mutingi e byuma bhiti bya Ongo, kongo mukoch' ihimana mor' otu rwema n' itinge nguru kuruma n' er' ikoch' ebhiti. ¹⁴ Mutingi nguru: mubhesi mo mangati er' eira bhuri mukobha, mumbar' engubha y' er' eira, ¹⁵ Murie mo bhisando bhuri tunantiro e muho uninkanwange n' e mwasiy' akonda w' e buhoro; ¹⁶ Mutingi hambasiro n' e biti mbyo e nguba y' er' esimira hima na 'ro mumukoch' erimya emisungu iti isakange y' e nkarange;hh ¹⁷ Mutingi hotu ekembo k' e nchukayo, n' er' obhasi rw' e mutima, ng' ekinwa cha Ongo. ¹⁸ Muronje mo ntambi siti mo Mutima kinsi bhususe bwa mahemo na kw' itondoora. Mukohye muncho hima n' e kemine kati, na muhemi ebhashuururwa bhati. ¹⁹ Munihemi, kongo naninkwa ihana mu bhunkangwe na 'shu e nama y' e mwasi wakonda namobhor' ebhunu. ²⁰ Muncho ngi muri ani mukori mu muri, na n'ebhe mucho anga mitikotiko imbu bwakomenw' iebha 'nicho. ²¹ Kongo na bhanu, musibhirira ebyankae, ebhikiyangy' ani, Tishike mirani munakitu na mukori w' eira kumunda na Nyerekuritu, wasebhutur' ebhiti. ²² Namurebheka kuri bhanu, kongo musibhirira ebhuri bhate, na wabhongebhong' emitima yinu. ²³ Muninkwe bhuhoro, na nchime hima n' er' esimira kuri bhanakitu bari kuri Ongo Tita wa Nyerekuritu Yesu Kirisitu! ²⁴ E nchumo ibhesi hima n' ebhati 'mbi bashima Nyerekuritu Yesu Kirisitu mu nchime isir' ebhiha bhiha.