¹ Mwe Bashiba, mukaha bambali binyu ebishinganine n'ebikwanine. Mumanye oku ninyu mugwerhe Banawinyu omu mpingu. ² Muyorhe kurhenga, mukayiza omu kuvuga omunkwa Nnamahanga. ³ Muhune haguma enyanya zirhu, lyo Nyamuzinda ayigula olunvi kanwa kage karhuma, kuderha ihwe ly'okuli lya Kristu. Enyanya lyako nashwesirwe emigozi. ⁴ Muhunage lyo mpasha okuliheba bwalagale, nkoku binanshinganine okuderha. ⁵ Mugende oku bwenge kwa balya bali embuga, murhahezagya akasanzi. ⁶ Emyanzi yinyu ebe ya lukogo akasanzi koshi, erhwe omunyu akasanzi koshi, lyo muhasha okumanya oku mwankashuza ngasi muntu. ⁷ Oku bintu binyerekire niono, Tikiko ajira biyalagale emwinyu. Ali mwene wirhu muzigirwa, mukozi mwikubagirwa, na wirhu muja omugarhi Ka Nyakasane. ⁸ Enyanya ly'oku murhumire emunda muli, lyo mumenya binji enyanya zirhu, kandi lyo munabaha n'omurhima. ⁹ Murhumire haguma na Onezime, mwene wirhu mwikubagirwa, na muguma winyu. Bababwira ngasi byoshi byagezire hano. ¹⁰ Arisitariko, wirhu mushwekwa, abalamusize, na Marko muzala wa Barheba mwarholeraga kwo obwirhohye, "Erhi ankayisha emunda muli mumuyankirire," ¹¹ Na Yezu ohamagalwa Yusto. Omu bakembule boshi bali birhu bakozi enyanya ly'obwami bwa Nyamuzinda. Baba burhulirize bwani. ¹² Epafra abalamusize. Aba muguma mulimwe, na muja wa Kristu Yezu. Ahanyire obushirhu omu mahuno lyo muhasha okuyimanga oku binali n"okuhamiriza okuli omu obulonza boshi bwa Nyamuzinda. ¹³ Bulya nankahana obudima oku anakole emikolo omubushibirizi enyanya zinyu, emwa balya bali e Laodikiya, na emwa balya bali e Hiyerapoli. ¹⁴ Luka munganga muzigirwa, na Dema babalamusize. ¹⁵ Mulamuse bene wirhu bali e Laodikiya n'e Nimufa, n'olurhamba luli omu kwage. ¹⁶ Hano musoma aga marina egarhi kinyu, gasomwe n'omu lurhamba lw'e Laodikiya, Ninyu mumanyirire oku aga maruba gasomirwe e Laodikiya. ¹⁷ Obwire Arikipo, "Ololage emikolo wayankirire kurhenga Nyakasane, okwanine oguhikirize". ¹⁸ Ogu musingo guli gwani niene Paulo. Mukengere okubohwa kwani. Olukogo lube haguma Ninyu.