¹ Paulo ntumwa ya yezu kristo,oku bulonza bwa Nyamuzinda, omu kuyalagaza e ndagano ya kalamo kalimo YezuKristu. ² imoteyo mwana wani munzigirwa, inema, olukogo n'omurhula gurhênga emwa Nyamuzinda Larha, n'emwa Yezu Kristu mucunguzi wirhu. ³ Nkuzize Nyamuzinda, olya bashakuluza bani bakagi kolera, olya nkolera n'omurhima bucire, olya nkengera ubudufu n,omushi omu masâla gani. ⁴ Erhi nkengera emirenge yawe, n'erhi n'onza okukubona l'yonyunjul'omwishingo. ⁵ omukukengera obwemere bw'okuli walanzire muli we, obwemere buli muli nyakakulu Loisi na muli nyoko Yunisi, manyirîre bwinja oku bwaba buba muli we. ⁶ Co cirhumire nkuyinginzire ogusê enshokano ya Nyamuzinda wahabirwe erhi nkulambulira kw'amaboko. ⁷ Bulya gurhali murhima gwa buciga Nyamuzinda arhuhire, Ci murhima gwa misi, gwa buzigire na gwa burhimanya. ⁸ Orhabaga nashonyi z'obuhamiriza wakajirira Nyakasane wirhu, erhi z'obuhamiriza bwani nie mushwekwa. Cikwone oyemere olibuke rhwembi enyanya z'emyanzi y'akalembe. ⁹ Okubuhashe bwa Nyamuzinda warhucizagya anarhuhamagala mpu rhube lunaba lwage, arhali emikolo rhwajijire yoyarhumire, Cikone oku arheganyize yene n'oku lukogo arhushobozagya. Arhushobozize lwo muli Yezu kristu amango garha cihika. ¹⁰ Nabyo biribyaciyalagaza ene omukuyisha kwa Nnawirhu Yezu kristu, wahimaga olufu, ahebaho akalamo n'okurhafâ Kugerera emyanzi y'akalembe. ¹¹ Kugerera emyanzi y'akalembe nabire mwigiriza na ntumwa y'okuyigiriza abapagani. ¹² Enyanya z'oko, ndinalumwa n'ebyo, Cikone ntabiyumviza shonyi bulya manyire Indi nayemire, na manyire oku agwerhe n'obuhashe bwokulanga enguli yani kuhika olwo lusiku. ¹³ osere omubwemere n'omubuzigire buli muli Yezu kristu olwiganyo lw'ebinwa bicire wahabagwa kurhenga emwani. ¹⁴ Obike bwinja, muli mûka ocîre oba muli rhwe. ¹⁵ Omanyire bwinja oku abali e Asia bandekêrire, mulibo rhwana derha Figelo na Hemogene. ¹⁶ Nnawirhu alambule olukogo lwage oku nyumpa ya Onesiforo, bulya anakazi ntuliriza, arhanagwerhe nashonyi z'obudagule bwani. ¹⁷ Bulya erhi ayisha e Roma andonza n'obushiru bunji anambona. ¹⁸ Nnawirhu amuhe obwonjo emalanga ga Nyakasane mwolulya lusiku. Omanyire bwinja emikolo anjirire e Efeso.